Read Sumi Naga EZEKEL 1 Bible Online

EZEKEL 1 - Sumi Naga bible

EZEKEL 1

¹Ampe shighi, aqhi abidiu, atsala apunguni ni Ezekel achineu, Buzi nuye Judami hakughutsuve kemi sasu Babilon lo Kebar ghoki phivilo akelo atsutsu kiyeve eno ino kungunhetsu lono Alhou ithulu.

²(Hiye Akukau Jehoiachin hapupove keu mpe apunguu shiake.)

³Babilon lo Kebar ghoki phivilo AMPEU no iputsakeu ino chilue eno niye pa kuka ithiluke.

⁴Ino jupuku kelauye ahuu kudauno pasapagha lakhi cheghi keu ithulu. Khungkusu kuloghi lono tsutsupha kuloake eno tipa sukumxalo atsutsu yevuqai ake. Tsutsupha kulo akeu alo kiu kela asapuyi toikeuno yepuvu ake.

⁵Pasapagha mtalo kiukela xuakeu lhoxu bidi toike timi koghe lono akeu ino ithulu,

⁶ikemu panoqo lakhikhino agi bidi eno achishibo bidi puake.

⁷Panoqo pukhuye muzuchoi eno panonguye amshitsu pukhu mutsu toi puake, tipaqoye alazayi suphe puake toi phu-phuyi ake.

⁸Panoqono agi bidi eno achishibo bidi puakeu nguno alauno panoqoye timi u bidi pua tiye achishibo lakhikhi qholo lakhikhi ake.

⁹Lhoxu lakhikhi chishibo kininiye xukhope ake, ikehu panoqo chishibo akumtsuno kuchokilepe akelo tipaqoye kodibo lakhi shive. Panonguno ithau kelo panonguye aphimpi tsughumono amqoshi ithauluke.

¹⁰Xuakeu lhoxu lakhi khino agi ajeli bididi puae: Agizuuno timi gi, ajeuno abongushu gi, piyiuno amshitsu gi eno azupouno aluqu gi, pu-ake.

¹¹Lhoxu lakhikhi chishibo kininiye peqhepe ake tishianguno tipauno lhoxu tipau phivilo akeu chishibo akumtsulo kuchokilepe ake, eno panoqo chishibo kutau kinini akeqoye panoqo phimpilo ghokhape ake.

¹²Lhoxu lakhi khino ako-bidi qha kumtsulo kughopuwo ake, ikehu panonguno khilau wunishi keno tsughu kidemo puzu amqoshi wulu ake.

¹³Lhoxuqo gholo akuluqhe iquake toikeu kiukela ngomomitheno itha akeu lakhi ae. Amikuyiqu huye iqu ipeghi puzu tsutsupha kulophayi ipeghi ake.

¹⁴Tishi akelo, lhoxuqo ghi tsutsupha kukulo lono ilheqho ilheqi ake.

¹⁵Ino lhoxu bidi hu juakelauye iluchekeu kuluho bidino ayeghi dipesu aghikeu eno lakhi khino tipaqo lakhikhi phivilo akeu ino ithulu.

¹⁶Kuluho bidikujo aju aphiphi; lakhi khino akughupu tu lakhi toi yevuqai eno lakhikhino itaghi kuluho kutau lakhino amta lono chotha kumughupe ake,

¹⁷ikehu kuluhoqoye khila khilaunomu ithawu kulupu shiae.

¹⁸Iluchekeu kuluho huye anhethino kuzu pesu ae.

¹⁹Kughou lhoxuqono ithauni keno iluchekeu kuluhoqo ghi panoqo gholono ithauke eno lhoxuqono ayeghi lono kunguu ikuve aye kuluhoqo ghi ikuveke.

²⁰Lhoxuqoye panonguno khila wunishi keno wuluake eno iluchekeu kuluhoqo ghi tipatho lono ithau ake, kughengu lhoxuno tipaqo peitha ake.

²¹Ikehu kughokughomu lhoxuqono ithauve momu ngove momu kunguu ikuve aye kuluhoqo ghi tipatho lono aphiphi shiake.

²²Xuakeu lhoxuqo kutsu shou kiukela lakhi aliholi toikeulo saghu saghui ake.

²³Ti aliholi toikeu qholo lhoxuqoye puthugho eno lakhikhino achishibo kinini pesu tipa phivilo akeu kudau sukhopuwu ae eno kini pesu pututa phimpi nhapu ake.

²⁴Yewu kelo panoqo chishibo sutsa ino chilu, tiye azughi ghugha toi, aghushimi muqo sutsa toi, Akughushu Lhou sutsa toike. Panonguno yewumono ngoveaye panoqo chishibo ghokutsuluveke,

²⁵ikemu tishive kethiu ghi panoqo kutsu shou aliholi toi akeu shou asutsa shiake.

²⁶Aliholi toikeu shou kiukela safir tuno shikeu lakhu lakhi toi ithulu ake eno alakhu shou iqa akeu kogheye timi lakhi toi ithulu ake.

²⁷Pa chita nguno kunguu toikeu loye alazayi amino suhopesu yepuvu akeu toike eno pa chita nguno aqhouye ami ju toike, eno tipauno aqha kumtsu veho pesu yevuqai ake.

²⁸Ikehu milisu vehope akeu julho kumtsu tile ake. Phuphuyikeu kuvu huno AMPEU tile akeu jumichi shi ake. Ino tipau ithulukeulo niye agi pishiqho pesu ayeghilo ikiqive. Tileno milakhino iputsakeu sutsa lakhi hitoi chilu,