Read Sumi Naga EZEKEL 10 Bible Online

EZEKEL 10 - Sumi Naga bible

EZEKEL 10

¹Ino achishibo kupu kerubimqo kutsu shou akusali toikeulo jupuku ake tipaqo shou akuka lakhu toikeu kiukela safir tuno shikeu ae.

²Aphi kumtsha uakeu timi vilo Alhou no pi, “Lhoxuqo qholo iluchekeu kuluho akeqo dolo wulo eno oulo amibalu suluvelo eno tipau pesu aphughi shou kuthole suvelo.” Pano wuchekeu ino jukuto ake.

³Timi tipauno ilochekelo achishibo kupu kerubimqoye Achineki apeu kudau puthugho ae, ikelo khungkusu muqo lakhino achineki alou kikhala chhive.

⁴AMPEU kuvu saghu saghui keu lhoxuqo launo ikughi eno Achinekilo ilochekeu kichilo iqesu wuve. Tile khungkusuno Achineki chhive eno achineki kikhalaye akuvuno yevuqai ake.

⁵Lhoxuqo chishibono asutsa shikeu huye akikhala khalaulo ghi chilu ake, tiye Alhou Akiqheu sutsa toi ighake.

⁶Kughono AMPEU no aphi kumtsha u akeu timi vilo lhoxuqo qholo iluchekeu kuluho dolono ami ikhilu lopi ahza tsukeno, timi tipauno ilo puzu iluchekeu kuluho lakhi phivilo puthugho.

⁷Lhoxuqo gholo lakhino ami panoqo gholo akeulo pau chuxusu eno amibalu hami ikhipe akumtsha phi u akeu ulo tipaqo sutsu. Timi huno amibaluqo ikhiluveno wuve.

⁸Ino jukelo lhoxu lakhi khino pututa chishibo qholo timi u ju toikeu lakhi khi puae.

⁹Iluchekeu kuluho tipaqo gholo tilehi akeu ghi ino ithulu ike kumtsu aphiphi eno lhoxu lakhikhi phivilo tipau lakhikhi ae.

¹⁰Iluchekeu kuluho tipaqoye akughupu tu toi phuphu-phuyi ake eno kuluho kutau lakhi khino kuluho tipaqo lakhikhi mta lono chotha kumghupe ake.

¹¹Kughono lhoxuqo ithani keno panonguye xatsughumo puzu khikudau wunishi keno wuluke. Panongu kumtsu poveho ghi xatsughumo puzu panonguno wunishike kudau kumtsa qhai tikudau ithawulue.

¹²Panoqo phimpi ngo amqa, au, achishibo eno iluchekeu kuluho kumtsu anhethino kuzupusu ae.

¹³Iluchekeu kuluho tipaqoye ino kungunhetsu atughiulo ithulu puakeu sasu aphiphike.

¹⁴Lhoxu lakhi khino agi bidi puae. Agi atughiuye amshitsu gi, akiniuno timi gi, akuthuuno abongushu gi eno abidiuno aluqu gike.

¹⁵(Tipaqoye Kebar ghoki phivilo ino ithulu puakeu lhoxuqo athoke.) Kughou lhoxuqono amlhulo ikuve puzu ithauni keno,

¹⁶iluchekeu kuluhoqoye panoqo sasu wuke. Kughono tipaqono yewunike achishibo xachhoni keno tishimu iluchekeu kuluhoqoye panoqo gholo wuke.

¹⁷Kughono lhoxuqono ngoveni keno iluche keu kuluho ghi ngove; eno kughono lhoxuqono yewu keno iluchekeu kuluhoye panoqo gholo wuke kughengu lhoxuqono tipaqo peitha akehue.

¹⁸Tipathiu AMPEU kuvu saghu saghuikeu huye Achineki hukikha qhive eno lhoxuqo shou a-a akeulo iqesu wuve.

¹⁹Ino juakelauye, lhoxuqono panoqo chishibo xachho puzu ayeghi lono kunguu yewuve, ikelo iluchekeu kuluho ghi tipaqo gholo wuve. Achineki hukikha kipelau akeulo panonguno ado kitila ngove ikelo saghu saghuikeu kuvuno tipaqo shou ae.

²⁰Lhoxu tipaqoye Kebar ghokilo Israil Lhou qholo ino ithulu puakeu lhoxuqo sasu atho shi aghikeu ino michithai shiluve.

²¹Tipaqo lakhikhino agi bidi, achishibo bidi puae, eno timi u toikeu lakhikhi achishibo qholo puakeu.

²²Tipaqo giye ino Kebar ghoki phivilo ithulu puakeu ghi sasu aphiphike. Lhoxu lakhi khino vejoi azuu kudau ithasu wuke.