Read Sumi Naga EZEKEL 11 Bible Online

EZEKEL 11 - Sumi Naga bible

EZEKEL 11

¹Alhou ghunguno ikhape qheluve no Achineki hukikha kipela kudau akeulo sawuve. Tilehi ahukikha phivilo ino timi muku pungu ithulu, tipaqo gholo Azur nu Jazaniya ngo Benaiya nu Pelatiya, pano shiayeh sakiphemi hipama ghi ake.

²Alhou no ivilo pi, “Thinikuau timio, timi hipaqono aphughi hipaulo alhoksa kupughu mla cheni eno alhoksa kukutsu tsuchenike.

³Panonguno pikeuno, ‘Ninguye itaghi kighitheno aki shiwolu nanike. Aphughiye belho akeu li toi ani eno ninguye tipaulo ashi akeu toike, tishiepimu amino ningu pitinikeu lono alino nisusho pesu aketoi anike.’

⁴Ikehu itehi mtazu panoqo lakhakeu shi ghi tungkuptsa piwulo. O thinikuau timio.”

⁵AMPEU ghunguno ipeithaluve eno AMPEU no timi hipaqo vilo atsape hipau tsulopike: “Israil lo akemiqo, nonguno kiu piani eno akukughu shiani keno ino ithi ani.

⁶Nonguno aphughilo timi kumzapu ghiqhiqheve kehu alaghilaqoye akithi kumono chhitoi anike.

⁷Tighenguno ni, Akughushu MPEU no nongu vilo hipau pianike: Aphughi hipauye kuchouno belho akeu li lakhike ikemu kiuno ashi kya? Nono ghiqhivekemiqo kithi kumoke! Nonguye hile qhimove nani, ino aphughi lono khalau nongu vepheve nanike!

⁸Nonguye azutakihi musa cheni kesha? Ino azutakihi peche kemi sawo nongu le nani.

⁹Aphughi lono khalau ino nongu saipe puzu inaghami ulo suvetsu nani. Niye nongu pithive penikeulo xathabeve tsuae,

¹⁰nonguye nolikhi noghakhulo aghu shikeu lono pithive nani. Tileno kumtsuno niye AMPEU kepi ithi nani.

¹¹Aphughi hipauye alino ashi tipau alou akeu shopesu ake toikeu shi nongu susholuni chemoe. Nonguno Israil yeghilo khile khilehi aghi namu ino nongu ghimeqhi nani.

¹²Niye AMPEU kepi nonguno ithi nani, kughengu nonguno acheaxulo ashiayeh akeqo khuayeh pimhe akeulo nonguye iyezah hexave anike eno ino ahza tsukeu papemove anike.”

¹³Ino tungkuptsa pi akelauye Pelatiya ye ikiqi thive. Ino igi pishiqhope ayeghilo dape puzu ighamuku pi, “O Akughushu MPEU, khilemu kumoe! Noye Israil lo ghu puaghikeqo kumtsu pithiveni kesha?”

¹⁴AMPEU no iputsa puzu pi,

¹⁵“Thinikuau timio, Jerusalem lo timi khunoqo xuani keno tipaqoye oghili ngo nokusami Israilmi halepupove keulo akemiqo ghili kugha anike. Panonguno ishi piani, ‘Halepupove keqoye AMPEU mllani keulo ighono putosuu anie. Ayeghi pighiluve penikeu shi pano ningu tsuvae.’

¹⁶Ike itehino nokusami halepupove kemiqo vilo ino kiu piani keno pesu pilo. Panoqo pelo ashiayeh putou akemiqo gholo xupenike puwuvekeu hiye inoke, ino aghakhu kutauqolo panoqo kuthole puwuveke. Tishimu, itehi doloye panonguno khuno yeghilo wuvea keno tilau ino panoqo gholo ananike.

¹⁷Tighenguno ni, Akughushu MPEU no piakeu pesu panoqo vilo pilo. Khilehi ino panoqo kutholesuve keno tipaqo yeghi lono ino panoqo hekutsu nani eno Israil yeghi pesu panoqo tsuchile nani.

¹⁸Panonguno kughou ideighini keno panonguye aphikumqhupu, kuchhube kutsula julho jeli ithulukeu kumtsu pevemasa nani.

¹⁹Ino amlo kithe eno akukumsu kithe panoqo tsu nani. Ino panoqo mlo atuqu toi kuthovi chekeu ikhisuwuve tsu nani eno aghokulupu mlo panoqo tsu nani.

²⁰Tithiu panonguye iyezah pelu nani eno ino ahza tsukeu kumtsu pichebekulu shi agholu nani. Panonguye iwu timi shive nani eno niye panoqo Lhou shive nani.

²¹Ikemu timi khunoqono aphikumqhupu kuchhube kutsula julho mllani keno ino tipaqo ghimeqhi nani. Panonguno kiu shikeno tipau ghenguno ino panoqo ghimeqhi nani.” Akughushu MPEU no pivae.

²²Xuakeu lhoxuqono yewu thuve eno iluchekeu kuluhono tipaqo gholo wuve. Israil Lhou no sasu akeu kuvu saghu saghuikeu huno tipaqo shou auve.

²³Tileno saghu saghuikeu kuvu huye aphughi qhive eno tipau kipelau naghuto akeulo iqesu wuve.

²⁴Kungunhetsulo Alhou ghunguno ikhapesu ikuve eno Babilon lo hale pupove kemiqo lau sachile saghive. Tipathiu kungunhetsu huye hailove,

²⁵Tileno hale pupove kemiqo vilo AMPEU no ipiyekeu thwokha kumtsu pesu panoqo vilo pike.