Read Sumi Naga EZEKEL 13 Bible Online

EZEKEL 13 - Sumi Naga bible

EZEKEL 13

¹AMPEU no iputsa puzu pike,

²“Thinikuau timio, Israil lo tungkupmi khunoqono pano likhi panowu tungkuptsa piqhi cheni keno tipaqo hachilekeu tsa pilo. Panoqo vilo AMPEU tsa inilo pilo.”

³Akughushu MPEU no kiu piani keno tiye hike: “Anikha tungkupmi hipaqoye ahakusapue! Panonguye pano likhi pano nguagha pape ani eno pano likhi pano kungunhetsu iqiphe anike.

⁴Israil lo timiqo, sherqono aphughi ixapinyikeu lo achekeshi tungkupmiye avehupu kuhake.

⁵Panonguye aphughi kuptu ileiqivekeu-a khekutomoke, momu panonguye akuptu shikithe chemoe, ikehu AMPEU tsalalo aghukishi ighikeulo Israil ye shokhalumove nani.

⁶Panongu kungunhetsu ye kichileuke eno panonguno ashe azu shi pikeu tsaye akimkike. Panonguye itsa kepi picheni ikemu niye panongu puwumoke, ikeghi panonguye panoqo tsa kuchou shiaghi penishi acheni!

⁷Ino panoqo vilo pi, nonguno kungunhetsu khipaqo ithulukeno eno ashe-azu tsa khipaqo picheni keno tiye akimkike. Nonguno pikeuno tipaqoye itsa kepi cheni ikemu niye nongu putsa puamoe!”

⁸Akughushu MPEU no panoqo vilo piani, “Nongu tsaye kichileke eno nongu kungunhetsuye akimkike. Niye nongu tsalo mo pi aniputsae.

⁹Nongu tungkupmi khunoqono kichileu kungunhetsu ithulu cheni eno sabidekeu ashe-azu tsa picheni keno niye nongu ghimeqhi nikeu shianike. Kughou iwu timiqono xakutha shini keno nonguye tile ngomo nani; nongu jeye Israilmi kikihi yekutsukeulo sumo nani; nonguye khilemu noghakhulo idewomo nani. Tithiuno niye Akughushu MPEU kepi nonguno ithi nani.

¹⁰“Tungkupmino thwokha kumtsu viani kepi pikeu lono iwu timiqo sabide anike. Thwokha kumtsu viamo putsake! Iwu timiqono atupi iqunei yepe akuptu shike eno tungkupmino ighi puzu metsughoi nudakeu pesu tipau nhapuanike.

¹¹Tungkupmiqo vilo panowu akuptu huye ikiqive nani kepi pilo. Zaleqhive penike ino tsutsughu puwu nani. Tipau shou murasu qipuku nani eno pasapagha mulhu tipau shou ghaiku nani.

¹²Akuptuye ilaiqive nani eno timi kumtsuno metsughoi nudakeuye akivipu kiu shilu kelapi nongu vilo iniju nani.”

¹³Akughushu MPEU no kiu pikeno tiye hike: “Iloghu lono ino pasapagha, tsuqhu tsughukeu eno murasu puwu puzu akuptu kutsaleve penike.

¹⁴Panonguno akuptulo metsughoi nuda keu hephopinyive tsunike niye kumsupuvae, aboqha tuquqo thoqhalei qhinikeu shiani. Tipau ilaiqive nani eno nongu kumtsu pithive nani. Tithiuno niye AMPEU kepi kumtsuno ithi nani.

¹⁵“Akuptu ngo metsughoikeu pesu tipau nuda kemiqo kumtsuno iloghu kighide pu nani. Tithiuno ino pinani: akuptu ghi chevae eno tipau metsughoi nuda kemiqo ghi chevae.

¹⁶Tiye tungkupmi khunoqono Jerusalem ye thwokha kumtsu vimono akeghi viani kepi piche keqoke.” Akughushu MPEU no pivae.

¹⁷AMPEU no pike, “Thinikuau timio, itehiye nowu timiqo gholo totimi ashe-azu tsa pichekemiqo julo. Panoqo hachilelo

¹⁸eno Akughushu MPEU no panoqo vilo kiu pianikeno tipau pesu panoqo vilo pilo: “Nongu totimiqoye, ahakusapue! Nonguno kumtsu ghenguno kuduu ukukha tsughu cheni eno kumtsu pelo akutsulo pepu penike kuduu phi mla cheni, tishianguno panoqo pelo kutami kuxu shou akuka shilupenike. Nonguno iwu timiqo shou akuxu ngo akithi kuka pighinishi acheni eno tiye no vehupu shiniye tipau peitha cheni.

¹⁹Nonguno barli thi au kie lakhia kinia eno ashopa lakhia kinia ithuluni aye iwu timiqo gizu lono iphimo gihumo chenie. Nonguno timi thive kuzupu kumomi pithive cheni eno timi thive kuzupu timiqo puxupe qhive cheni. Ike nonguno iwu timiqo vilo akimki tsa picheni eno panonguye nongu pulu acheni.”

²⁰Itehiye Akughushu MPEU no kiu piani keno tiye hipauke: “Niye nonguno akuxu ngo akithi shou qasupe auveniye nonguno au kukha peitha chekeu niye mithi chenike. Ino nongu umlo lono tipaqo lekhove nani eno nonguno timi qhasupe akeqo phepuwuve nanike.

²¹Ino nongu umlo kutsugha phi suthave tsu nani eno ghuthu khavino alhokuthu ghenguno iwu timiqo nongu kuka lono pokauluvepe nani. Tithiuno niye AMPEU kepi nonguno ithi nani.

²²“Nonguno nongu kimki pesu kivimi khunoqo ino ghuza nishimono achekeqo mlo shikumkave tsuchenike. Nonguno alhoksami pelo pano lhoksa pheve penikeu lakha cheni eno pano kuxu xaluve nikeu lakha cheni.

²³Ike itehiye nowu kichile kungunhetsu ngo sabidekeu ashe azutsa pikeu kumtsu tavae. Niye nongu kuka launo iwu timiqo hakholuveni cheni, tishianguno niye AMPEU kepi nonguno ithi nani.”