Read Sumi Naga EZEKEL 17 Bible Online

EZEKEL 17 - Sumi Naga bible

EZEKEL 17

¹AMPEU no iputsa puzu ivilo pi,

²“Thinikuau timio, Israilmi pelo ni, Akughushu MPEU no panoqo vilo kiu piani keno ithipe nike kimighikeu tsa hipau pilo.

³Aluqu akuloghi kije lakhi acheke, amhiye jukighilepu eno achishiboye kije kushuwa sukhope ake. Pano Libanon Naghuto kudau yewu puzu Kedar subo lakhi aketsugho suchhevetsu,

⁴eno pano tipau xapusu lhidi shiche keu yeghilo wuve eno alhikishimi phughi lakhilo qhive.

⁵Tithiu pano Israil yeghi lono mulosubo lhothe lakhi pesu ighi eno aghuma yeghi lakhilo tipau shosuve, tipau thuwulu kepushi, pulhapuju azu akeu yeghiloke.

⁶Asubono ishe ipeghive eno tiye aqhou aqha kumtsu khonhalu keu atsayibo toi shiluve. Alokaqono kunguu aluqu kudau thuikuve eno akuhuno thonhei qu ilove. Atsayibo huye aloka ngo anipano nhaluve.

⁷“Tilehi aluqu kuloghi kutau lakhi ae, achishibo kije eno amhiye shishoi puae. Ikelo atsayi kighibono tipau kudau akuhu qupuwu eno panipa tikudau khonhapuwoke, tishi anguno tipau pelo aghutu khipa-a lono thuwu akeno tipau nguno alau azu tsupeniye lajuke.

⁸Ikemu atsayiboye aghuma akeu, azu akivishi achekeu lulo shope puake, ikehu tiye anipa mini eno atsayithi pithi kulupu shiache eno jukighilepu tsayibo shikulupu shiake.

⁹“Ikehu ni, Akughushu MPEU no iniju: Atsayibo hipauye xulu eno thuwulu nani kema? Aluqu atughiuno tipau akuhu lono nhuvemoni kesha? Atsayithi muxulevetsu, alokaqo suchhevetsu puzu tipaqo thizumyive pemoni kesha? Tipau nhuve nikeulo akuka kumtsu chilo lumo nanike momu ashiayeh kumto lakhi lumo nani.

¹⁰Iye, tiye shosupe ani ikemu xulu eno thuwulu nani kemo kya? kughou kipela mulhuno tipau ghah ighikelo tiye thizumyi monima? Tiye khilehi thuwu ani keno tipa-a lono thizumyimo nima?”

¹¹AMPEU no ivilo pi,

¹²“Aghekulu kumomi hipaqo vilo kimighike tsa kiqi ithiani kemokela inijulo. Panoqo vilo pilo, Babilon kukauno Jerusalem lo ighi puzu tilehi akukau ngo sakiphemi sasu pa gholo Babilon lo idewove.

¹³Pano akukau bolomi lakhi salu puzu pa sasu visho lakhishi eno paye aghokulu shinikeu shoqhi shipeke. Pano aghakhulo akhotomi sawuve,

¹⁴tishi anguno tipau shiayeh pelo mtsha ivu puzu itaghi ide ithughi pemo niyeke eno visho pelughi xupeniyeke.

¹⁵Ikemu Juda kukauno hebideve eno khurshi ngo aghushimi saghinike alachemi Ijip lo puwuke. Paye tolu nani kesha? Paye tikithipu shipuzu pokulupu kesha? Paye visho kuboleve puzu aghime sholumove nani kesha?”

¹⁶Akughushu MPEU no pike, “Kuchouno niye xuakeu Lhou ke, akukau hipauye Babilon lono thi nani kughengu paye pa shoqhi kuboleve eno pa pesu akuka lakhulo qhikeu Babilon kukau sasu visho shikeuhu kuboveke.

¹⁷Kughou Babilonmino timi kutomo pithive tsu nike ayeghi pukishepewo ghowo eno aqo chhuwoni keno Ijip kukau aghushimi kumto kutsasa akeu pinamu aghukishilo Juda kukau kuphulu kepu shimo nani.

¹⁸Paye pa shoqhi ngo visho pano shipuakeu kuboleve. Pano hipaqo thime kumtsu shiveake eno itehi paye povemla nanike.”

¹⁹Akughushu MPEU no piani, “Kuchouno niye xuakeu Lhou ke, visho khipau penikepi pano ije lono tushoqhi keno tipau kuboleveke ghenguno niye pa ghime nani.

²⁰Ino ashihami khame sukho puzu tipau lono pa meluve nani. Ino Babilon lo pa sawuve nani eno tilauno pa ghimeqhi nani kughengu paye ilau amikucho kumo shiveake.

²¹Pawu ghushimi akivimiqoye aghushi lono pithive nani eno ghupe puxu puaghi kemiqoye aqha kumtsulo kohave nani. Tileno ni, AMPEU no piveakepi nonguno ithi nani.”

²²Akughushu MPEU no kiu pikeno tiye hike; “Ino Kedar subo qhemghai keu kumtsu ikhilu nani eno tipaulo akhuni suchhe suwu nani. Ino naghuto kuchuqulo tipau shosu nani, tiye Israil naghuto kuchuqulo ke.

²³Tipauno aloka ishe ipeghi nani eno athi pithi eno jukighilepu Kedar subo shi nani. Aghau jeli kumtsuno tilehi acheuve nani eno tipau kicheqo lono kusuqholu nani.

²⁴Aghakhulo asubo kumtsuno niye AMPEU kepi ithulu nani. Ino asubo akuxu akeqo thizumuive tsuke eno asubo qhaive keqo akuxu shikitheve peke. Ni, AMPEU no piveake. Ino kiu shinikepi pivea keno ino tipau shini cheni.’