Read Sumi Naga EZEKEL 19 Bible Online

EZEKEL 19 - Sumi Naga bible

EZEKEL 19

¹Alhou no ivilo pikeuno Israil lo kukapumi mikini ghenguno amloksa le hipau phelopike:

²Ozaye abongushu gholo aqu lakhike! Lino abongushu yikusaqo gholono atiqo saputhuke.

³Lino ati lakhi saputhu puzu ashi hanikeu sapheke; pano timi tsu-kuchuu shiveke.

⁴Ashiayehqono pa ghili chiluve eno aqoh lakhi lono pa khathasuluve. Ayi kughuho pesu panonguno Ijip lo pa sunhephe sawuve.

⁵Liye lajupu kumtsu hauveke kutolo khe acheke. Tithiu lino liti kutau lakhi saputhu, paye ayikusa bongushu lakhi shiluve.

⁶Kughou pano asakithe shi thuwuve keno, abongushu kutau gholo tsunike iqho iqike. Paghi ashi hanikeu shithive eno timi tsukuchumi lakhi shive.

⁷Pano aliwo qogheqo shipsavetsu, aphughi xavetsue. Pano ighake kumtsulo aghakhulo kuamiqoye thughuive che.

⁸Ashiayehqoye pa sasu kumjo nike kumqoluve; aqha kumtsu lono timiqo ighive. Panonguno ashiha khame sukhope qhi eno panoqo lichhe lono pa meluve.

⁹Panonguno ayikhughulo pa supeqhi eno Babilon kukau lau pa sawuve. Panonguno aghukhu shi pakhe tishi anguno Israil naghutoqo ghugha chilu kithe pemo niyeke.

¹⁰Ozaye aghokiti lakhi phivilo atsayibo shosupe akeu toike. Azu kupukunoshi akeu ghenguno atsayiboye anipa ngo alothino tuboleipe ake.

¹¹Tipau lokaqoye mutotoike, eno kukami kusu shikepu shi thuipeghike. Atsayiboye khungkusu tokulupu shi chuqumghayi thuwuveke; kumtsu no tiye kishi tubolei eno chuqu mghai akeno ithulu ake.

¹²Ikemu aloghu kighide uno tipau akuhu lono nhuve tsuke eno ayeghilo vedape qhiveke. Kipelau mulhuno tipau xathi fuki-ghichive tsuke. Tipau lokaqoye icheuve, tipaqoye qhaive eno pitive.

¹³Itehi hiye asayeqhalo shosu puani, qhaikeu eno azu kuhakeu yeghilo.

¹⁴Atsayibolo ami ipeghive; amino tipau loka ngo alothi pitileveke. Alokaqoye khilemu mutotoi kithe luni chemoe, khilemu kukami kusu shiluni chemo. Hiye amloksa le lakhike; hiye phekide acheni.