Read Sumi Naga EZEKEL 21 Bible Online

EZEKEL 21 - Sumi Naga bible

EZEKEL 21

¹AMPEU no ivilo pi,

²“Thinikuau timio, ogi Jerusalem kudau kughopuwono kutughulo. Timino khipa-a lono mlla cheni keno tipau shou kutughulo. Israil yeghi vilo ni,

³AMPEU no piani kepi piputolo: Niye oghumike. Ino azutakihi sujono nongu kumtsu, kivimi na alhoksami namu aphiphi shi ghiqhi nanike.

⁴Ino ahuuno apeu kutolo timi kumtsu shou izutakihi peitha nani.

⁵Ni, AMPEU no izutakihi sujoluve keu kumtsuno ithi nanike eno niye tipau qhiveni chemoke.

⁶“Thinikuau timio, amlo ghime launo amlo ipoveni keshi sukutu ighalo. Timi kumtsuno ojukuto kepua lono amlo kusashi sukutu ighalo.

⁷Panonguno ovilo noye kushiye sukutu igha ani kelapi iniju keulo panongu vilo asutsa chekeu ghenguno kepi khochilelo. Kughou asutsa tipau ighini keno, panongu mloye akumsano chhitoive nani, panonguye tuthu ijunaive nani, pano mlo kuloghi hauve nani eno panongu khonheno thuthu shiuve nani. Aghulokiye ighivae; hi cheake.” Akughushu MPEU no pivae.

⁸AMPEU no ivilo pi,

⁹“Thinikuau timio, tungkuptsa pilo. Timiqo vilo ni, AMPEU no kiu piani keno tipau pesu pilo. Azutakihi, azutakihi lakhi tsughaminhei eno ilompuivae.

¹⁰Hiye ghiqhinike tsughaminheivae tsutsupha toi kulopenike ilompuivae. Alokivipu lakhimu kuha nani, Kughengu iwu timiqoye kutughu keu eno aghime lakhimu phitsumoke.

¹¹Azutakihi peithanike kutope qhicheni, ilompui qhichenike. Tipau tsughaminhe eno ilompui shikeuye ghikiqhimi ulono pepeniyeke.

¹²Amlo kusa shi ighamukulo, thinikuau timio; azutakihi hipauye iwu timiqo kuto tsuniyeke eno Israil lo sakiphemi kumtsu kutotsu niyeke. Panonguye iwu timi kutami akeqo gholo ghiqhi khaveni chenike. Amlokusa launo nongu mula kukhulo!

¹³Niye iwu timiqo peju anike, eno panonguno xakideghimo aye, hipaqo kumtsu panoqo lau shini chenike.

¹⁴“Tighenguno thinikuau timio, tungkuptsa pilo. Ou kukhulo eno azutakihi no anguno anguno ghipuku nanike. Hiye ghiqhiche keu azutakihike, kichi kumsa chekeu zutakihike eno ghiqhile chekeu ke.

¹⁵Hipauno iwu timi pelo amlo kuloghi puhavepe eno kupuxalu chenipeke. Ino tsutsupha ti kulokeu zutakihi pesu panoqo phughi shikichi anike eno ghiqhi nike kutope anike.

¹⁶No zutakihi akutsughauo, ajeu kudau eno piyiu kudau ghipukulo. Nono khikudau kughopuwoni keno ghipukulo.

¹⁷Nighi i-u kukhunike eno iloghu kighideye tave nani. Ni, AMPEU no pivae.”

¹⁸AMPEU no ivilo pi,

¹⁹“Thinikuau timio, Babilon kukauno pa zuta pesu ighilu kepu alaghi kini amichi shivetsulo. Tikuma kinikujo aghakhu lakhi lono huthu kepu shilo. Ala shokuba khile aghini keno kichekeu michipu shipe qhilo.

²⁰Ala lakhino Amunmi phughi Raba lo wukepushi akukau piyepeni eno ala lakhiuno Juda kudau aliwo putukha puakeu phughi Jerusalem lo wukepu la.

²¹Babilon kukauno ala shokubalo kichekeu michipulo puthugho. Khipala wuni keno ithinike pano asaqhiniye apiji tsu kighide ju, pano pa su-atu lau kighithi kileji; pano lhoxu heqhi mllakeu loshi jukutoju.

²²Ikelo! Pau ajeuno ‘Jerusalem’ ipi amchi shikeu piji tsuqulue. Tipauno pa vilo kichetsu keuno wuno shoxu ilokepu ghasubo kiti suwoqhi, aghukishi lo ighamuku shoxu ilokepu ghasubo aliwo-khadulo qhi, ayeghi pewo atoghi kughulho eno aqoh chhuwonikeu pitsuke.

²³Jerusalem lo akemiqoye hipatsa pulumo nanike, kughengu panonguye visho shipuanike. Ikemu ashe-azu tsa hipauye panoqo xine kumsulu penike piputo anike eno panoqo khasupe kughaluveni keu kutughu anike.

²⁴Tishiaye ni akughushu MPEU no piakeuye hike. Nongu xineye pephevae. Nonguye kiutoi kuquve akeno kumtsuno ithi anike. Nonguno nongu kumla kughutha kumtsulo nongu xine piye achenike. Nonguye levae eno ino noghumiqo ulo nongu suvetsu nanike.

²⁵“No kixikila, mithekumo Israil shou ayehkipeu, oghime ashekhau tsalaye ighivae.

²⁶Ni, Akughushu MPEU no pivae. Okutsu kuqho ngo okutsu nhapuakeu ikhivelo. Kiumu puzuu tho shimove nanike. Aqhokighemi akukalo sunheqhelo! Ayehpe akemiqo sunheqhilo!

²⁷Ixapinyi! Ixapinyi! Ino aphughi pesu ixapinyivekeu shi nani. Ikemu ino khuu pelo aphughi ghimeqhi penikeu shiani keno tipau ighi mphi loye hipau shimo nani. Pa ighi kethiuno ino tipau shipe nike pa tsu nani.

²⁸“Thinikuau timio, tungkuptsa pilo. Ni, Akughushu MPEU no Amunmi lau kiu piani keno asheshulo; panonguno Israil thaigha achenike. Panoqo vilo pilo: Azutakihi lakhiye ghiqhiniye kutoluvae; Hiye ghiqhinike ilompuivae, tsutsu pha toi kulophayinike.

²⁹Nonguno zuxouno ithulukeu huye kichileke eno ashe-azu tsa nonguno pichekeu huye akimkike. Nonguye kixikila eno alhoksake eno nongu tsala cheni, nongu ghime ashekhau tsala chenike. Azutakihiye nongu kuoghilo ikughini cheni.

³⁰“‘ Azutakihi peqhelo! Khipa-a lono olhophe keno, nongu punukeu ghakhu lono ino nongu shou kughathani cheni.

³¹Nonguye iloghu kighide pu nani, ami kuyiqu toi tipau nongu shou ino hipukuni chenike. Ino nongu kughape tughashi toikemi, heqhi buqhikelo shitsamiqo ulo suvetsu nani.

³²Nonguye ami lono kutsapinyive nani. Nolikhi noyeghilo nongu jih pele nani eno khunomu nongu kumsu chile mlave nanike.’ ” AMPEU no pivae.