Read Sumi Naga EZEKEL 22 Bible Online

EZEKEL 22 - Sumi Naga bible

EZEKEL 22

¹AMPEU no ivilo pike,

²“Thinikuau timio, noye timi ghiqhi chekemino chhitoi achekeu phughi shou kughabe nike kutoluve akema? Lino kuchhube kutsula jeli kumtsu shivekeu hu livilo mutsumishei shi pilo.

³Aphughi vilo ni, Akughushu MPEU no kiu piani keno tipau pesu pilo: Nono olikhi owu timi kumzapu ghiqhi pithive eno asu-atu julho mllakeu lono olikhi okitiqeve ake ghenguno oghulokiye ighivae.

⁴Noye hupaqo ghiqhive keulo kuquvea eno asu-atu julho nono shikeuno kitiqevae, ike otsalaye ighivae, odoye tovae! Ikehu ino ashiayeh kutami pelo othaigha peke eno ayeghi kutau akemiqono ophimo gihumoke.

⁵Nono ayezah phimokeu ghenguno ayeghi kutau akupunulo kuami ngo putosuu kuamino ophimo gihumoke.

⁶Israil lo sakiphemi kumtsuno pano likhi pano kuka kumto shou pukhubeke eno timi ghiqhi cheni.

⁷Aphughilo timi lakhimu pa puaza gihu chemoke. Nonguno inaghami pishiqhike eno topu chimemi ngo mighimgha jumithi chenike.

⁸Nonguye akimthe-alo ighukeu kuhae eno nonguye Sabat pinye pelu chemoke.

⁹Nowu timi khamiye kutami pithive nike ghenguno panoqo ghili akimkitsa picheni. Nowu timi khamiye asu-atu julho lau heqhi mllavekeu shi chu cheni; khamiye pulhapuju panoqono aghichipo chekeu ghapiqi acheni.

¹⁰Khamiye panoqo papu nipu sasu zu cheni. Khamiye totimino aji poake ghulokilo anguka lono ashi aji kuqha cheni.

¹¹Khamiye kutuqha salha cheni eno khamiye pano mukishiu momu pano chelimi zusawo shipsa cheni.

¹²Nowu timi khamiye atha ajume ithuluniye timi ghiqhi cheni; khamiye pano kusami Israilmi lau punakeulo akighishe khulu cheni eno tipaqo shou akumo akukuhau shikeu lono kinikulu shiluve cheni. Panonguye ikumsumaveke.” Akughushu MPEU no piveake.

¹³“Ino i-u sukumqo pesu nowu kupuka kupugha ngo ghiqhichekeqo shou be nani.

¹⁴Nonguye amlo kuloghipu ani kughashi kumsu ani kesha? Momu ino nongu puhake ghulokilo nongu u peqhe kulupu kumto ani kesha? Ni, AMPEU no pivae eno niye itsa qhilu chenike.

¹⁵Ino nowu timiqo aghakhu kutaulo eno ashiayeh kutaulo kutholeve nani nokumla lhoksa kishekhave tsu nani.

¹⁶Ikehu ashiayeh kutamino nongu phimo gihumo nani, ikemu niye AMPEU kepi nonguno ithi nani.”

¹⁷AMPEU no ivilo pike,

¹⁸“Thinikuau timio, Israilmiye kumtsu igizulo abaghu toi avehupu kuhavae. Panonguye pitikeu bolo tsandiyi ghukimthe keulo abaghu jeli alazayi, tinyi, ayi eno akusayi qhivekeu toivae.

¹⁹Ikehu itehiye ni, Akughushu MPEU no panoqo vilo pianike panoqoye hupaqo toi avehupu kuhamithevae. Ino Jerusalem lo panoqo kumtsu sawo kumqo nani,

²⁰timino kishi tsandiyi, alaza, ayi, akusayi eno tinyi pesu pitikeu bolo ghukimtheniye sukeu toi nani. Amino ayi hipaqo piti pe kumula ketoi iloghu kighideno panoqo pitiqhive nani.

²¹Ino Jerusalem lo panoqo hekutsu kumqo nani eno panoqo qhouno ami shipuku nani eno iloghu pesu panoqo pitiqhi nani.

²²Tsandiyi kipitibolo piti pekumulave ketoi panonguye Jerusalem lo pitiqhi nani eno tileno panonguye AMPEU loghu kighide dilu ani kepi ithi nani.”

²³AMPEU no itaghi ivilo pike,

²⁴“Thinikuau timio, Israilmi vilo pilo, ike panoqo yeghiye mithemoke ihehu ino iloghu kighide lono tipau ghimeqhi anike.

²⁵Tipaulo sakiphemiye abongushuno lhoxu heqhipe ngo puzu igha akeu toi ke. Panonguno timiqo heqhi, panonguno pisa kumtsu suwuve eno tinhemgha luvetsu cheni eno panonguno ghiqhikeu lono topuchimemi kutomo auvae.

²⁶Achinemiqono iyezah kuboleve eno akimthe jeli panonguye sumsakeu kuhae. Panonguye akimthe ngo mithe kumo dolo kutuqukeu kuhae. Panonguye muqhamiqhiyi keu ngo muqhamiqhiyi mokeu dolo kututa shi akeu shikapiye chemoke eno panonguye Sabat pinye kughuchove cheni. Tishi keu lono Israilmiye isumsa chemoe.

²⁷Yehpeka yehkipelo kijemiqoye atine lojino lhoxu heqhi puzu suthapinyi kishi akeu toike. Panonguno kinikulu shiluniaye ghiqhi heqhi cheni.

²⁸Tungkupmiqoye timino metsughoi nudakeu pesu atozu nuda akeshi axine tipaqo kusuvetsu cheni. Panonguno kichileu kungunhetsu ithulu cheni eno kichileu she-azu tsa picheni. Panonguno Akughushu MPEU tsa piani kepi picheni, ikemu ni, AMPEU ye panoqo putsa puamoe.

²⁹Kinikulu shi akemiqono pishiqhi eno pukaqhi cheni. Panonguno kumlhomi peithapusa cheni eno inaghami shou akumo akukuhau shicheni.

³⁰Timi khualano putukha keu shilu nani kemokela ino phujuke, eno khualano putukha keu khileno ileve keno tipaulo puthugholu puzu ino iloghu kighide lono tipau kutsaveniye shiakelo, ayeghi shokhalu nimalayeke, ikemu niye milakhimu phumlake.

³¹Tighenguno ino panoqo shou iloghu kighide lepuku nani, eno panonguno kiu mula puani keno tipaqo ghenguno niye ami toi panoqo kutsaleve nani.” Akughushu MPEU no pivae.