Read Sumi Naga EZEKEL 23 Bible Online

EZEKEL 23 - Sumi Naga bible

EZEKEL 23

²“Thinikuau timio, ghuthu lakhi atsunipu mikini ache.

³Pamano ilimi shi Ijip lo akelo pama lhotheye salha shupu keulo ilove; eno pamano atathe shi xuachekeu puhave.

⁴Akichiu jeno Ohola (lino Samaria ke) eno ayitiu jeno Oholiba (lino Jerusalem ke). Ino pama kinikujo sasu kulave eno pamano atianuli punu itsuke.

⁵Ohola ye iwu shianamu, liye kusalhami shi acheuve eno Asiriya lo li lojipumi ju ighe keuno chhitoi ache.

⁶Li lojipumi tipaqoye ghushimi, hughaikeu phimini pepukumtsa kemi, kijemi eno ayeh kutomo vepukemi kijemiqoke; panongu kumtsu ajukivi eno alhotheshi khurshi sakiphemi ghushimiqoke.

⁷Liye Asiriyami kijemiqo kumtsu ghenguno asalhauke, eno li kiyigheno li musu sawo Asiriyami su-atu julho mlla keu lono li shipixive peke.

⁸Ijip lono lino kusalhami lakhi shiuve puzu liye ilimi tatheshi xu achekeu puhavekeu hu tishi acheuve. Lino ilimi shiaphi lono timino li sasu zuke eno kusalhalimi lakhi shi li peithacheke.

⁹Tighenguno ino li kugha pesu li lojipumi Asiriyami lino lunishi kutu achekemiqo ulo suvetsuke.

¹⁰Panonguno li phimini xaleve tsupuzu aphi kumsa qhive, li nuli ngo angaqo kughaluve eno azutakihi pesu li ghiqhive. Aqha kumtsulo li kuxu kishive keno totimiqono kugha akhanike.

¹¹“Li tsunipu Oholiba ye hipau ithuluve kethiu ghi liye alaushi akupusho kuxu xuke eno liye Ohola no shichekeu nguno alaushi shupu salhake.

¹²Li ghi Asiriyami kijemi qhivutsuniyi keu phimini pepukemi ghushimi eno khurshi ghushimi kijemiqo, ajukivi lhothemiqo kumtsu jupe iyighe keuno chhitoi acheke.

¹³Ino jukelo liye mithemo kuchouke, atsunipu akiniu ghi atughiu toi alhoksake.

¹⁴“Ike liye akuthoulo salha shupu ilove. Liye Babilonmi kijemi kushumi julho putukeu tupi kiyelo yethapuku keu eno huchuyi nudapua keu,

¹⁵aphi kipili pesu apo khapu eno akutsu chijepu keu phi tuthuiju akeu ithulu keuno li musuluuve ke.

¹⁶Lino tipaqo ithulu kemtsa iyighe keuno li chhitoive eno Babilon lo tipaqo lau aghini kishimi puwuke.

¹⁷Babilonmino li sasu ashi aji kuqhake, eno panonguno li shipsa pinyive kethiu liye panoqo jupesu azuzuve.

¹⁸Lino aqha zulo pekipheshi piyeke eno kumtsu pelo liye kusalhami kepi ithipeke. Niye afo lau angaghaive ketoi li lau ghi ingaghaive ke.

¹⁹Lino ilimi shiache kelo, Ijip lo kusalhalimi lakhi shiche ketoi liye puzuu nguno alaushi kusalhami shiuve.

²⁰Liye aphighu kije pukemi eno khurshi atsu kiyighe toi kemi jupe iyighe mine keuno li lolo chhitoi acheke.

²¹(Oholiba, noye nono Ijip lo ilimi shichekelo mithemokeu kukuqu shikithe nishike tilau timino okichhi pemgha eno noye ilitathe shi xu achekeu puhaveke.)

²²“Oholiba, ike itehi ni Akughushu MPEU no ovilo piakeuye hike. Noye olojipumi hupaqo jupe angaghaivae ikemu ino panoqo pelo olau axuidepe nani eno osuholuve peni ino panoqo saghi nani.

²³Ino Babilonmi ngo Khaldiami Pekod, Shoa eno Koa lo achekemi timiqo saghi nani eno Asiriyami kumtsu saghi nani. Lhothemi ajukivi kijemi kushumi hupaqo kumtsu eno khurshi ghushimi kijemi akhotomi eno ayeh kutomo vepukemi kumtsu ino hekutsu kumqo nani.

²⁴Panonguno aghushimi kutsasa aghushi khurkulu ngo pukishekeu yeghikilu sasu ighi puzu ahuu kudauno ole ighi nani. Azuto ngo akutsu kuqho pesu sushopuluve puzu panonguno osuhuluve nani. Ino panoqo ulo no ikhisuvetsu nani eno panonguno pano yezah kiqi lono oshou kughatha nani.

²⁵Niye olau iloghu ide anike ghenguno ino panoqo pelo pano loghu kighide pesu opeithave penani. Panonguno onigi eno okini ghileve tsu nani eno otianuli pithive nani. Panonguno onuli ngo angaqo eno atianuliqo olauno luve nani eno akuxuno tipaqo pitiqhive nani.

²⁶Panonguno ophimini suxuveno ochiku achipu luve nani.

²⁷Nono Ijip lo akelono itehi kutolo opitipuza eno salhashupu achekeu ino tavepe nanike. Noye asu-atu julho shou jupuku kithemove nani momu Ijip kumsu kithemove nani.”

²⁸Akughushu MPEU no kiu piakeno tipauye hike: “Nono mithi chekemi eno jupesu azuzu chekemi ulo ino noikhisuve nani.

²⁹Panonguno omithi chenike ghenguno nono mlaqhipe puaghikeqo jeli kumtsu pewuve nani eno thwokha xaluveno kusalhami lakhi toi noye aphi kumsa tishi qhipe puave nani. Nono iyighe eno salha shupu chekeuno oshou hipau sughivae.

³⁰Noye ashiayehqo ghenguno kusalhami lakhike eno panoqo su-atu julho pesu olikhi oshipixiveke.

³¹Noye ofo nepa papeke ikehu ino aghime jukhu atho opiyeni cheni.”

³²Akughushu MPEU no piani, “Noye ofo jukhu lono pesu sho nani, tiye kije eno thonhei. Kumtsu ghano ojumithi eno othaigha nani; ajukhuye chhitoike.

³³Tipauno opelo amloksa eno shomzuvepe nani, ti akumsa eno shipusakeu jukhu, ofo Samaria jukhuke.

³⁴Nono tipau sho nani eno tipau qhai tayeve nani, tipau hephokeu tachu pesu okichhi ghaleve nani. Ni, Akughushu MPEU no pivae.”

³⁵Akughushu MPEU no kiu pi ani keno tiye hike: “Nono ikumsu mlave eno ozupo ilau kughopuwove ke ghenguno osalha shupu eno okiyighe ghenguno ime nanike.”

³⁶AMPEU no ivilo pike, “Thinikuau timio, noye Ohola ngo Oholiba pama shou kughatha nike kutoluvea ma? Pamano kuchhubekeu thime shivekeu pesu ngukulo.

³⁷Pamaye salhakeu ngo ghiqhikeu shivae, asu-atu julho sasu salhakeu eno anuli punu itsukeu ghiqhike. Pamano inuli heqhi pesu pano su-atu julho lau mllave ke.

³⁸Panonguye tilikhi shike kumoe. Panonguno ichineki shipixive eno ino shipe qhitsukeu Sabat pinye kuboveke.

³⁹Pamano asu-atu julho lau inuli heqhi mllake tsala lono pamano ichinekilo ighi no tipau kitiqevetsuke!

⁴⁰“Anguno anguno pamano ala kushuwa putou lono ighipe nike aghini kishimi puwuno kuwupeke eno timi tipaqono ighike. Atsunipu pamano azu kuchhuve eno anhethi kusho ngo achiku-achipu pepuluve.

⁴¹Pamano yeghu-lakhu jukivilo iqa eno pama gizulo thime jeli kivi pesu akibepu lakhi nhakha pesu qhi, tipaqo gholo ino tsungquikeu ta ngo oliv teli pama tsukeu ghi ake.

⁴²Ghutho ghuzaikemi muqo sutsa chilu ake, asayeqha lono timi amqo lakhi sasu iloghi. Panonguno totimi pama umlolo asapu sutsu eno pama kutsulo jukivi kutsuqho pipeke.

⁴³Ike ino ilikhi ishi ivilo pikeuno timi hipaqoye totimi lakhi asalha lono angaghaive kemi kusalhami lakhi toi peitha ani.

⁴⁴Panonguno ide-ide hi kusalhalimi lau idesu wuake. Panonguno mithekumo totimi, Ohola ngo Oholiba pama lau idesu wuake.

⁴⁵Amikuchomiye asalha shupu ngo ghikiqhi pesu timi tipaqo shou nguku puzu peive nani kughengu panonguno shupu salha acheni eno panoqo uye ajino hedapu anike.”

⁴⁶Akughushu MPEU no kiu piani keno tiye hike: “Pama lau aqokitikhi saighilo eno pama shipughuqhilo eno pama shipusa pelo.

⁴⁷Aqokitikhi pelo atu pesu pama veqhipe eno azutakihi pesu pama lepelo pama tianuli pithivepe eno pama ki pitilevetsu pelo.

⁴⁸Aghakhuqhalo muthomuzai ighekeu ino hakhavetsu nani, tiye totimi kumtsu vilo pamano muthomzai ighechekeu toi shipemonike kutughuakeu lakhike.

⁴⁹Nokujo atsunipu nokujono iyighe chekeu eno asu-atu julho mllakeu xine ghenguno ino nokujo ghimeqhi nani. Tishieno nokujono niye Akughushu MPEU kepi ithi nani.”