Read Sumi Naga EZEKEL 26 Bible Online

EZEKEL 26 - Sumi Naga bible

EZEKEL 26

¹Ningu haphe puwuvekeu mpe chighi aqhaqhiulo aqhi atsala atughiulo AMPEU no ivilo pi,

²“Thinikuau timio, Tur phughilo akemiqono ishi vekipighi igha akhanike. ‘Jerusalem ye kubopinyivae! Lino lhidi lhighi shiluchekeuye chevae! Liye nisasu kusuxa chekeu shimo ake!’ ”

³“Tighenguno ni Akughushu MPEU no kiu piani keno tiye hipauke: Tur phughi, niye oghumike. Ino ashiayeh kutami kutomo oleve penike saighi nani eno panonguye azu kukucho kibe toi ighi nani.

⁴Panonguno ophughi putupuakeu atupikiye tulevetsu nani eno aghukhu-a qoghe xalevetsu nani. Tithiu ino ayeghi mukhu kumtsu josusu wuve nani eno atuqu likhi kumsa qhive nani.

⁵Akha kukhamino tipau shouno panoqo khame phuputho nani, tiye azughi mtalo chushulei auvekeu-alo. Ni, Akughushu MPEU no pivae. Ashiayehqono Tur xulepuwuve nani

⁶eno panoqo azutakihi pesu azughi kuxa yeghilo khunoqono liwu taun qolo xuakemi keno tipaqo ghiqhi pithi nani. Tileno niye AMPEU kepi Tur no ithi nani.”

⁷Akughushu MPEU no pi, “Ino kukami kumtsu nguno akijeu saighini cheni, tiye Babilon lo Akukau Nebukadnezar pelo Tur lepenike saighi nani. Pano ahuuno aghushimi kutsasa khurshi ngo aghushipu khurkulu eno khurshi lo ikukeu ghushimi sasu ighi nani.

⁸Khunoqono azumuku yeghilo taunqolo akhani keno aghushi akelono pithive nani. Aghumino aqoh chhuwo nani, ayeghi pewo atope ghowo nani eno nongu zulo azuto toi shosuyi mlape qhi nani.

⁹Panonguno nowu putupuakeu atupi kiyelo shoxu ilokepu tsukucho kuloghi pesu shopuku nani eno ayikhumu pesu nowu aghukhu-qoghe talavetsu nani.

¹⁰Panowu khurshi qono ithakeu lono khughu ikughikeuno nongu nhapholuve nani. Panowu khurshi qono akho sunhekeu eno khurkulu sunhekiche sasu aphughi ixapinyive keu kikha vechewu chekeu sutsano nowu akuptu atupikiye sukughutha nanike.

¹¹Panowu khurshi kusamino nowu alaghila tulepho ighi puzu azutakihi pesu nowu timiqo ghiqhivetsu nani. Nowu aki tsukucho kuloghiqoye ayeghilo tuleqhive nani.

¹²Noghumino nokinikulu eno alhikishi nhemgha pano ghoshi luve nani. Panonguno now putupuakeu atupikiye tuleqhive tsu nani eno nolopivi tsuchekeu kighikiqo kubolevetsu nani. Panonguno asu-atu eno xalevekeu jeli kumtsu pesu azughilo tulesuve nani.

¹³Ino nonguno ale phechekeu kumtsu tavepe nani eno ino nongu kighilebo ghugha inaqhoive penani.

¹⁴Ino atuqu likhi thoqhalei qhive nani eno akhakukhamino pano khame phuputhokeu shi nani. Aphughi huye khilemu itaghi shikithemo nani. Ni, Akughushu MPEU no pivae.”

¹⁵Akughushu MPEU no Tur phughi vilo hipau pikepu shiani. “Kughou ole luveni keno, azughi kumxalo achekemi qoye timi ghiqhilekelo ighakeu huno shithughuive nani.

¹⁶Tileno azughilo kukapumi shiachekeqo kumtsuno pano kuka lakhu lono aqhou iqi nani. Panonguno akuuphi ngo ayeh shipukukeu phimini xave puzu musa khokhoshi ayeghilo iqa nani. No kughape kishive keno tipauno panoqo shithughuive puzu panonguye musa khokhoshi keu tamlave nani.

¹⁷Panonguno no ghenguno akithilo le hipau phetsu nani: Ajekipi phughiye kutsalevae! Li zukiluqoye azughi lono jole sawuve. Aphughi hipaulo kuamino azughi shou ayehpecheke; Eno azughi kumxalo xuachekeqo shithughui cheke.

¹⁸Ikemu, tipau ikiqiveke tsalalo zudo yeghiqoye musa khokhoshi. Tipaqolo timiqoye kutsalekeu tikithipulo apuchopungovae.”

¹⁹Akughushu MPEU no piani: “Ino opelo aphughi ixapinyiveno khunomu ngochemo keu toi kughukughalei vetsu nani. Ino azughi kutholo zu pesu ovesuluvepe nani.

²⁰Ino kithimi yeghilo opiqive nani, khaghi ghulokilo xuachekemi gholo acheuve peni. Ino opelo oqhou achekeu yeghiqhalo ixapiniyive keqo gholo ngope nani, kithimi sasu kumtsa amuqo shipe nani. Tishive keulo noye khilemu kughuna kithemo nani eno kuxumi yeghilo o-a kuha nani.

²¹Ino opesu shithughui keu kichekipiye shitsu nani eno noye tipauno oshekhau shi nani. Timino ophuju nani ikemu khilemu ophumla nani.” Akughushu MPEU no pivae.