Read Sumi Naga EZEKEL 29 Bible Online

EZEKEL 29 - Sumi Naga bible

EZEKEL 29

¹Ni haphepuwuvekeu mipe achighiu aqhi achighiu atsala chighi kini shi akelo AMPEU no ivilo pike,

²“Thinikuau timio, Ijip yeghilo akukau kudau ogi kughopuwono tungkuptsa pilo. Pa vilo pa eno Ijip ghakhu kumtsu ghimeqhi nikeu pesu pilo.

³Ishi pilo ike Akughushu MPEU no Ijip lo akukau vilo kiu piani keno tiye hike: No akha ngushu aghokilo zuakeu, niye oghumike. Nono pikeuno Nayil ghokiye owu eno nono tipau shipuani pike.

⁴Ino ayi kughuho pesu omukhu lono fuluve nani eno oghokilo akha akeqo pelo omedakhoi luvepe nani. Tithiuno ino Nayil lono akha kumtsu omeda pesu osunhe saipeghive nani.

⁵Ino noghi eno akha kumtsu asayeqhalo vepuwuve nani. Ophi mpiye ayeghi shou iluqive nani eno qhomono qhive nani. Ino aghauqo ngo tughashi pelo chupe nike tipau tsuve nani.

⁶Tileno Ijip lo akemi kumtsuno niye AMPEU kepi ithi nanike.” AMPEU no piani, “Israilmino nongu Ijipmi pelo kuphupenike pukhukeu shike, ikemu noye asuta miqemileyi keu nguno akiviu ke kumoe.

⁷Kughou panonguno omumu keno noye icheuve, pano chishiqho qhutsuke eno panoqo muqa qhaphatsuke.

⁸Tighenguno ni Akughushu MPEU no ovilo piani, ike ino timiqo pelo azutakihi pesu oleighipe nani, eno panonguno nowu timi ngo lhoxuqo pithivetsu nani.

⁹Ijip ye shipsaveno abokumsave nani. Tileno niye AMPEU kepi nono ithi nani. “Kughengu nono pikeuno Nayil ye owu eno nono mlakepi pike.

¹⁰Niye oghumi eno owu Nayil ghumi ke. Ino Ijip kumtsu shipusaveno abokumsa shivetsu nani, tiye ahuu Migdol phughi lono apeu Aswan phughi lono Sudanmi lughi kutoloke.

¹¹Timi lhoxu na kutau lhoxu namu tipau kathasu wumla nani. Ampe lhobidi kutolo kiunomu tile xumla nani.

¹²Ino Ijip pesu ayeghiqhalo kumtsu nguno kughukughalei keu ghakhu shitsu nani. Ampe lhobidi ghenguno Ijip phughiqoye ixapiniyi anani, aphughi kutau ixapinyi akeu nguno alhoksau shi nani. Ino Ijipmi kughapesu kupokichemi shitsu nani. Panonguno aghakhu kumtsu pove nani eno timi kutami gholo xucheuve nani.”

¹³Akughushu MPEU no piani, “Ampe lhobidi thiuno ino khunoqo shiayeh gholo Ijipmi halesuve keno tilauno panoqo sachilesaghi nani.

¹⁴Ino panoqo pelo Ijip apeu inahuu panoqo achekeu-alo kughunape nani. Tilau panonguye miqemilei keu kukaqha lakhi shianani,

¹⁵tiye kumtsu nguno miqemilei keu kukaqha shinani eno panonguye kutami shiayeh shou khilemu itaghi ayehpemo nani. Ino panoqo pelo akhoto timi shipemo nani ikehu panonguye ashiayeh kutami qhasupe pano gho pulou shikeu shilupemo nani.

¹⁶Israil ye khilemu itaghi panoqo pelo kuphupe nike pano pukhukeu shimove nani. Ijip shou kishive keno tipauno Israilmi pelo panoqo shou pukhukeuye kiu toi akumou keno Israil loputsu tsu nani. Tileno niye Akughushu MPEU kepi Israil no ithi nani.”

¹⁷Ni haphe puwuvekeu ampe muku akutsuniulo aqhi atughiu atsala atughiu lo AMPEU no ivilo pike,

¹⁸“Thinikuau timio, Babilon kukau Nebukadnezar no Tur lepuwuke. Pano pawu ghushimiqo pelo akhokimishi pupe kehu panongu kutsusa ghi qapiyeve eno panoqo bighiye kiyisho khaveke, ikemu akukau na pawu ghushimi namu panoqo ghime lame kiumu ithuluke kumoe.

¹⁹Tighenguno ni Akughushu MPEU no kiu piani keno tiye hike: Niye Ijip ghakhu pesu akukau Nebukadnezar tsu ani. Pano tipau tuleqhino xupuwuve nani eno pawu ghushimi tha tsunikeu shi Ijip wu kinikulu kumtsu xapuwuve nani.

²⁰Pa kumla ghenguno ino Ijip pesu pa love nanike, kughengu pawu ghushimiqoye ighenguno mulatsu ake. Ni, Akughushu MPEU no pivae.

²¹“Kughono tipau shini keno, ino Israilmi pelo mutotoilu pe nani eno no Ezekel pelo, khileno kumtsu no otsa chiluni keno tipa-alo ngono pipe nani, tishianguno niye AMPEU kepi panonguno ithi nani.”