Read Sumi Naga EZEKEL 3 Bible Online

EZEKEL 3 - Sumi Naga bible

EZEKEL 3

¹Alhou no pi, “Thinikuau timio, likuzu kaku hipau chuvelo; tishi puzu Israilmi lau wulo eno pilo.”

²Ikehu ino ikichi muku tsukelo pano likuzu kaku chupe nike itsu.

³Pano pi, “Thinikuau timio, ino likuzu kaku hipau otsukeu chuvelo; eno tipau pesu opo sunhei shilulo.” Ino tipau chuve eno tiye akhi ngozu toi micheluke.

⁴Tipathiu Alhou no pi, “Thinikuau timio, Israilmi lau wulo eno ino ovilo pilo pikeu pesu panoqo vilo piwulo.

⁵Niye inaghami tsa kutho pichekemi shiayeh lau opuwu anike kumoe ikemu Israilmi lau puwu anike.

⁶Ino ashiayeh kuloghimi nono pimlakeu atsa kutho pichekemiqo lau opuwu kenapi aye, tipaqoye otsa initsuni cheke.

⁷Ikemu Israilmi milakhimu otsa ininishimo nanike; kughengu panoqoye itsa pinamu initsu chemoke. Panoqo kumtsu kuthovi acheni eno mukamghai kemiqoke.

⁸Julo ino panoqo toi opelo kuthovilupe nani eno panoqo toi mukamghailupe nanike.

⁹Ino opelo atuqu toi mutotoi shilupe nani, hiratu toi mukamghai lupe nani; hekibidemi hupaqo musa kevilo.”

¹⁰Tinguno alau ghi Alhou no ishi pi, “Thinikuau timio, amlo tsuqhiyi shino ino ovilo pikeu tsa kumtsu ikhilu eno inilulo.

¹¹Tishi puzu wulo, nowu timi hakughutsuve kemiqo lau wupuzu ni, Akughushu MPEU no panoqo vilo kiu piani keno tipau pesu pilo, panoqono amlo tsuqhiyi otsa initsu na monamu pilo.”

¹²Tileno Alhou ghunguno ni ikhiqheluve eno izupouno asutsa lakhi akuloghi shi igha ghi pikeu ino chilue, “Kungugha kunguu akimthe jukuvushi AMPEU sheqhelo!”

¹³Amlhulo lhoxuqono achishibo kukhu akeu eno kuluho iluchekeu sutsano ayeghi kughutha ghugha pahi ino chilu.

¹⁴AMPEU kuka kumto kuloghi ishou ikughi, eno pa ghunguno ixapuwuve kelo niye khumtsayi imlo ide ae.

¹⁵Ino hakughutsuve keqono akeua Kebar ghoki phivilo Tel Abib lo ighi, eno ino chilu ithulu puakeu huno inhapho mhoi pe atsala tsuni kutolo tilehi ngove.

¹⁶Atsala tsuni thiu, AMPEU no iputsa.

¹⁷Pano pi, “Thinikuau timio, Israil shiayeh ghenguno ino opelo aghukhemi lakhi shianipeke. Ino kutughukeu tsa otsukeu pesu noye panoqo lau pivetsulo.

¹⁸Tsala alhoksami lakhi thive niye shi akeulo nono pa kutughuve tsuno akuxu kililuve pemo aye, paye axinemi shighi thive nani.Ikemu pa kithi makhoye oshou betsu nani.

¹⁹Ikemu alhoksami lakhi vilo nono kutughuvemu pano axine shikithe auve aye paye axinemi lakhi shi-ghi thive nani, ikemu okuxuye ghupe qhivetsu nani.

²⁰“Tsala timi kivimi lakhino axine kumla shiuve puzu shiluksa sholuamu nono pa vilo pitsumo aye paye pa xine ghenguno thive nani eno pa kumla kivi kihitsumo nani, ikemu pa kithi makho ino oshou betsu nani.

²¹Tsala timi kivimi vilo axine shi pemo nike nono kutughuvetsu kelo pano otsa chilu puzu axine shimove aye paye xuluve nani eno okuxu ghi ghupe qhitsu nani.”

²²Ino AMPEU kuka kumto eno pano ivilo ishi pikeu chilu, “Ithulo eno akhilalo wulo tilauno ino oputsani ke.”

²³Ikehu ino akhilalo wu eno tilau puzuu Kebar ghoki phivi lono ino ithulu puakeu toi AMPEU wu akimthe jukuvu ino ithulu. Niye agi pishiqope ayeghilo ikiqive,

²⁴ikemu Alhou ghungu ilolo iloghi eno isunheputhuve. AMPEU no ivilo pi, “Akilo wolo eno aki alou okhathasu ilovelo.

²⁵Thinikuau timio, noye akighi pesu tsuluve nani eno noye aqha zulo ipemlave nani.

²⁶Ino omili khakutsuluve tsu nani ikehu noye hekibidemi timi hipaqo kutughumlave nani.

²⁷Tishi puzu ino oputsa kithe eno atsa pikulupu kuka otsu kide kethiuno, ni, Akughushu MPEU no timi hupaqo vilo kiu piani keno nono pi nanike. Panoqo khamiye otsa initsu nani ikemu khamiye ophimo nani, kughengu panonguye hekibide shiayehke.”