Read Sumi Naga EZEKEL 30 Bible Online

EZEKEL 30 - Sumi Naga bible

EZEKEL 30

¹AMPEU no itaghi ivilo pi,

²“Thinikuau timio, tungkuptsa pilo eno ni, Akughushu MPEU no kiu piani keno pesu asheshulo. Noye atsa hipaqo pesu ighamuku asheshulo: Akumsapu tsala lakhi cheni!

³Atsalaye kupunuvae, AMPEU no chhosunikeu tsala cheni, Ashiayehqo ghenguno khungkusu ngo kupunakeu tsala cheni.

⁴Ijip lo aghukishi anani Sudan lo kutakihikeu kije anani. Ijip lo timi kutomo ghiqhi pithive nani; Aghakhu kumtsu hephokicheive nani eno ixapinyi qhive nani.

⁵“Sudan, Lidya, Libya, Arabia, Kub eno iwu timi gholono piqesaghi keqo ghushimi ghi aghukishi lono pithive nani.”

⁶Akughushu MPEU no piani, “Ahuu Migdol lono apeu Aswan kutolo Ijip susho akemiqo kumtsu aghukishi lono thikhave nani. Ijip wu aqhekuza ghushimiqoye kutsaleve nani. Ni, Akughushu MPEU no pivae.

⁷Tipa ghakhuye ayeghiqhalo kughukughalei keu akusau shive nani eno tile aphughiqoye qhoyi ixapinyive nani.

⁸Kughou ino Ijip lo ami suni keno eno tipau susho akemiqo kumtsu pithiveni keno tileno niye AMPEU kepi panonguno ithi nani.

⁹“Kughono tipa tsala ighini keno Ijip ye kutsaveni eno ino ashukaki lono aghinikishimi puwuno Sudan lo pulupusakeu kuhano akemiqo haputhu nani eno panonguye musa keno thughuive nani. Tipa tsala chenike!”

¹⁰Akughushu MPEU no piani, “Ino Babilon kukau Nebukadnezar peitha puzu Ijip wu kinikulu puhavetsu nani.

¹¹Pa eno pawu ayikusa ghushimi ighi puzu aghakhuqha tulepinyive tsu nani. Panonguno azutakihi pesu Ijip le nani eno aghakhu kumtsu akithi kumono chhitoive nani.

¹²Ino Nayil ghoki qhaivetsu nani eno Ijip ye timi lhoksami kuka qholo qhi nani. Inaghamino aghakhu qha kumtsu kutsaleve nani. Ni, AMPEU no pivae.”

¹³Akughushu MPEU no piani, “Memfi lo asu-atu julho ngo kichileu lhouqo ino kutsaleve nani. Ijip lo ayehpekemi lakhimu kuhave nani eno ino timi kumtsu shithughuyi nani.

¹⁴Ino Ijip apeu kughukughaleive tsu nani eno ahuu Zoan phughilo ami suvetsu nani. Aphughi tou Theb ino ghimeqhi nani.

¹⁵Ino Ijip lo aliwo koghe akijeu Pelusium phughi pelo iloghu kighide pupe nani. Ino Theb lo kinikulu kutsaleve nani.

¹⁶Ino Ijip lo ami sunani eno Pelusium ye amlo kusa kije shi nani. Theb putukeuye ipopinyive nani eno aphughiye yeliqoleive nani.

¹⁷Heliopoli ngo Bubasti lo lhothemi akeqoye aghushi lono thi nani eno timi kutamiqoye akughumi shisu wuve nani.

¹⁸Zumoikeuno Taxpanhes shou ikughi nani kughono ino Ijip kuka hephoni keno eno panongu akumtoshi qheza chekeu kishekhave tsu nani. Khungkusu lakhino Ijip nhaluve nani tipau aphughiqolo timi akeqoye akughumi shi sawuve nani.

¹⁹Ino hipa ghola lono Ijip ghimeqhi keulo, panonguno niye AMPEU kepi ithi nani.”

²⁰Ni haphe puwuvekeu mipe chighi aqhaqhiu aqhi atughiu atsala akutsunilo AMPEU no ivilo pi,

²¹“Thinikuau timio, ino Ijip kukau umlo hechheve tsuae. Khunomu tipau khave tsumoe momu tipau khapipemoe, tishikeaye tipau viluve puzu akumtoshi azutakihi itaghi tsuqupeluni cheke.

²²Tishiaye, ni, Akughushu MPEU no kiu piani keno tiye hike: Niye Ijip kukau ghumike. Ino pa umlo kinikujo hechhevetsuni cheni, ti akivishi akeu ghi eno lakhiu hechhe pusu akeu ghi ikehu azutakihiye pau lono ikiqive nani.

²³Ino ayeghiqha kumtsulo Ijipmi kuthole puwuni cheni.

²⁴Tithiuno ino Babilon kukau umlo mutotoi shitsuni. Ikemu Ijip kukau umlo hephovetsu nani eno pano sukutu igha nani eno pa ghumi gizu lono thi nani.

²⁵Ino Babilon kukau umlo shikumtotsu nani eno Ijip kukau kumtoye qeivepe nani. Kughono ino Babilon kukau ulo azutakihi sutsuni keno eno pano tipau Ijip kudau chhopuwuni keno tileno kumtsu ghano niye AMPEU kepi ithi nani.

²⁶Ino ayeghiqha kumtsu lo Ijipmi kuthole puwu nani. Tileno panonguno niye AMPEU kepi ithi nani.”