Read Sumi Naga EZEKEL 37 Bible Online

EZEKEL 37 - Sumi Naga bible

EZEKEL 37

¹AMPEU kuka kumto ishou akeu ino ithie, pa ghunguno isasu wuve eno akhila lakhi khilehi asaghino nhachhi akeno tipau yeghilo qhive.

²Pano isasu akhila kumtsu veho sawu eno tilehi asaghi kumzapu qheakeu ino ithuluake eno tipaqoye ququyi qhai ake.

³Pano ivilo pi. “Thinikuau timio, asaghi hipaqoye akuxu shilu nani ma?” Ino ishi khochile, “Akughushu MPEU, olikhino tipau pilu nani ke!”

⁴Pano pi, “Asaghiqo vilo tungkuptsa pilo. Qhaikeu saghi hipaqo vilo AMPEU tsa inilo pilo.

⁵Panoqo vilo ni, Akughushu MPEU no piani pilo: Ino nongu lolo atuthu sutsuni eno nongu puxu kithetsuni cheni.

⁶Ino anhu ngo apiti nongu shou pukutsuni eno ayikono nongu kuzuluve peni. Ino nongu lolo atuthu sutsuni eno nongu puxu kithetsuni cheni. Tithiuno niye AMPEU kepi nonguno ithi nani.”

⁷Ikehu ivilo pivekeu toi ino tungkuptsa pike. Ino pi akelauye asutsa ququ shikeu lakhi ino chilu eno asaghiqo kumtsa kimelu khave.

⁸Ino jukuto akelauye, asaghiqoye anhu ngo apitino nhaluve eno tipashelo ayikono nhaluve. Ikemu tipaqolo atuthu kuhae.

⁹Alhou no ivilo pi, “Thinikuau timio, amlhu[1] vilo tungkuptsa pilo. Amlhu vilo Akughushu MPEU no ahza tsuanike aqha kumtsu lono ighi puzu akithi kumo hipaqo lolo atuthu shesu eno tipaqo puxuvelo pilo.”

¹⁰Ike ivilo pikeu toi ino tungkuptsa pitsuke. Atuthuno akumoqolo ilove eno tipaqoye akuxu shiluve eno puthugholuve. Panonguye aghushimi muqo lakhi shimkhake.

¹¹Alhou no ivilo pi, “Thinikuau timio, Israil lo timiqoye asaghi hipaqo toike. Panonguno pikeuno panoqoye qhaivea eno laju akepu kuhavea eno ighinikeulo kiumu shilumoa kepi pianike.

¹²Tighenguno iwu timiqo Israilmi lau tungkuptsa pilo eno ni, Akughushu MPEU no panoqo kumoki lhapheni cheni kepi pitsulo. Ino panoqo saipeghini cheni eno Israil yeghilo sachile saghini cheni.

¹³Kughou ino iwu timiqo khile qhopuani keno tipau lhaphekelo panonguno niye AMPEU kepi ithi nani.

¹⁴Ino ituthu[2] panoqo lolo sutsu nani, panoqo puxu kithetsu nani eno panoqo pelo pano yeghilo kughunape nani. Tileno niye AMPEU kepi panonguno ithi nani. Ino hipau shi nani kepi tushoqhivae eno tipau shi nani putsake. Ni, AMPEU no pivae.”

¹⁵AMPEU no itaghi ivilo pike,

¹⁶“Thinikuau timio, asuta lakhi ikhilu puzu tipau shou, ‘Juda kukaqha,’ ipikeu tsa yepukulo. Tithiuno asuta kutau lakhi lupuzu atsa hipau tipa shou yepukulo, ‘Israil kukaqha.’

¹⁷Tithiu asuta huu she ngo hiu she oulo tsuqukimepe ngolo tishianguno tikumaye asuta lakhi toi ithulu penike.

¹⁸Nowu timiqono hipau kiqiye kiu kela panoqo vilo pitsulo pi iniju aye,

¹⁹panoqo vilo ni, Akughushu MPEU no Israil kimihi shi akeu suta ikhi pesu Juda kimihi shi akeu suta gholo sutsuni cheni kepi pilo. Asuta kini lono asuta lakhi shivetsuni eno iulo no tsuqupe nani.

²⁰“Oulo asuta kuma tsuqupeno timiqo pelo tipau jupelo.

²¹Tishi puzu panoqo vilo pilo, ike ashiayeh kutami gholo khilehi panoqo wuve keno tilauno ni, Akughushu MPEU no iwu timiqo kumtsu salu nani, panoqo hekutsu kumqo nani eno pano yeghilo sachile saghi nani.

²²Ino Israil naghuto shouno, pano yeghi lono ashiayeh tikuma pesu lakhi shivetsu nani. Pamaye akukau lakhi likhi auve nani eno tipauno panoqo shou ayehpe nani eno panonguye kijetha pesu ashiayeh kini shimove nani momu akukaqha kinishi kophape ngomove nani.

²³Panonguye aphikumqhupu su-atu julho pesu pano likhi panoqo kitiqe kithemove nani momu axineno panoqo shipsave pemo nani. Panonguno axine shichekeu eno ijechu chekeu laghi jeli kumtsu launo ino panoqo kuqhopheve nani. Ino panongu pesu tsughukhui shivetsu nani; panonguye iwu timi shive nani eno ino panoqo Lhou shive nani.

²⁴Akukau lakhi iqeu David toikeuno panoqo kukau shive nani. Panongu kumtsu ayehkipeu lakhi qholono kuqhaluve nani eno amikucho shi iyezahqo papelu nani.

²⁵Ino iqeu Jakob tsukeu yeghi shou panonguno kughuna nani, tiye panoqo puasuno achekeu yeghike. Panonguno alhokupujulo tilehi kughuna nani, pano tianuli eno atikughukomi kumtsu titoi shi nani. Akukau lakhi iqeu David toikeuno alhokupujulo panoqo shou ayehpe nani.

²⁶Panongu pelo alhokupujulo ithapemo nike ino panoqo sasu puloshoqhi lakhi shi nani. Ino panoqo shikumto nani eno pano yeghilo ichineki alhokupujulo tilehi achepenike qhitsu nani.

²⁷Ino panoqo sasu tile kughuna nani; ino panoqo Lhou shive eno panonguye iwu timi shive nani.

²⁸Kughou ino ichineki alhokupuju panoqo gholo achepeniye qhitsuni keno tileno, ni, AMPEU no Israil kishelu puzu iwu timi shipekeu ashiayeh kutamino ithi nanike.”