Read Sumi Naga EZEKEL 39 Bible Online

EZEKEL 39 - Sumi Naga bible

EZEKEL 39

¹Akughushu MPEU no pike, “Thinikuau timio, Meshek ngo Tubal shiayeh shou ayehpetou Gog shou ngukubelo eno pa vilo niye pa ghumi kepi pilo.

²Ino aqha akithe kudau pa satsughu nani eno ahuu alakushuwa lono pa saipeghi nani tiye pano Israil naghutoqolo ighimoke kutolo.

³Tithiu ino pau piyiu lono pa suzu chishijove tsuni eno pau ajeu apiji sujoluve tsu nani.

⁴Gog ngo pawu ghushimi eno pa gholo kuqha akemiqoye Israil naghutoqolo iluqi thive nani, ino panoqo kithikumo pesu ashi aghauqo chuqupu shivetsu nani.

⁵Panonguye aluzalo tishi ashou thive nani. Ni, Akughushu MPEU no piveake.

⁶Ino Magog ghakhulo eno azughi sukumxalo timino bukughuthamono kughuna achekeqo ghakhulo ami suvetsu nani eno timi kumtsuno niye AMPEU kepi ithi nani.

⁷Ino iwu timi Israilmi pelo ije kimthe ino mutsuqhei ithiwope nani, eno hinguno hilauye ije pipsa pemo nani. Tileno ni AMPEU, Israil Lhou ye Akimthe kepi ashiayehqono ithi nani.”

⁸Akughushu MPEU no pike, “Ino pipuakeu tsalaye mutsuqheino ighi nani.

⁹Israilmi aphughiqolo kughuna akemiqono ipe puzu sukughupu su shinike aghunanu qhipuaghi keqo kichelu nani. Panonguno azuto, asuzu, apiji, angu, asuthalu pesu ami shi nani eno ampe tsuni kutolo pemkha kepushi kiche kutsulu nani.

¹⁰Panonguye aluzalo sukughupusu ghewumo nani momu aghasalo asubo yeqhimo nani kughengu panonguye aghunanu qhipuaghive keu sughu nani, Khunoqono pano haleqhi eno xulepuwu puanikeno panonguno tipaqo haleqhi eno tipaqou xulepuwu nani.” Akughushu MPEU no pivae.

¹¹AMPEU no pike, “Kughono hipaqo kumtsu shikupuveni keno, ino Israil lo, Amiti Zughi kipelau Kicheghuzumi Khila ipikeulo akumo qhokepu-a lakhi Gog tsu nani. ‘Gog Ghushimi Khila’ ipi kuvetsu nani.

¹²Israilmiye akithi kumo qhokeulo aqhi tsuni luve nani eno aghakhuye shikimthe kitheluve nani.

¹³Aghakhulo akemi kumtsuno tipaqo kumo qhokeulo kuphutsu nani eno panonguye hipau ghenguno ino tolukeu tsalalo gihukeu shi nani.

¹⁴Aqhi tsuni tove kethiu, timi kishephelu puzu aghakhu kachesu kicheghuzu shiwupe nani tiye ayeghilo akithi kumo aghikeu phupesu qhopeniyeke, tishianguno panonguno aghakhuqha shikimthelu nani.

¹⁵Timi tipaqono aghakhuqhalo iqhoiqi akelo, timi saghi ithulukeu kumtsulo panonguno tipau phivilo amchi shipe qhitsuni tishianguno akumo shiqhokemino ighi puzu tipaqo pesu Gog Ghushimi Khilalo qhovetsu nani.

¹⁶(Tilehi akupunulo taun lakhi aghushimi je lono kukeu lakhi anani.) Ikehu aghakhuye mithe kitheluve nani.”

¹⁷Akughushu MPEU no ivilo pi, “Thinikuau timio, aqha kumtsulo ashi aghauqo ighilopi kulo ino panoqo ghenguno heqhipe mllakeu chupeniyeke. Tiye Israil naghutolo aghulhu kije lakhi shi nani, tipa-alo panonguno ashi chu eno ahji tsuyelu nanike.

¹⁸Panonguye ghushimiqo kithikumo chuni cheni eno ayeghilo ayehkipemiqo jih tsuyeni, tipaqo kumtsu bheritsu momu bheritiqo momu anetsu eno amshitsu athakupu toi heqhive nani.

¹⁹Kughou ino timi hipaqo lhoxu heqhi mllakeu toi heqhi pithini keno aghau ngo tughashiqoye panonguno chulu ke thaqhu atha chupeni eno panonguno shomzuveke kutolo ahji tsuye penike.

²⁰Ighulhu lipalo panonguno chuluke thaqhu khurshiqo ngo tipaqo shou ikuchekeqo eno ghushimi aghushi chekemiqo panonguno chulu nani. Ni, Akughushu MPEU no pivae.”

²¹AMPEU no pike, “Ino ashiayehqo pelo ikimthe jekipi jupe nani eno niye kishi ikuka kumto peithano iwu amikucho xakutha shilupe acheni keno panoqo piye nani.

²²Tinguno tilauye Israilmino niye panoqo Lhou AMPEU kepi ithi nani.

²³Ashiayeh kutamiqono ithi nanike, Israilmi halephe puwuvekeuye panonguno ishou axine shikeu ghengunoke. Ino panoqo launo tsughusu wuve eno panoqo ghumi pelo panoqo leluve eno aghushi lono panoqo pithivepeke.

²⁴Panonguno mithemokeu eno kixikila shikeu ghenguno ithulu kuzupu shiakeu ino panoqo tsuke eno niye panoqo launo tsughusu wuveke.”

²⁵Akughushu MPEU no pike, “Ikemu itehiye ino Jakob laghami Israil lo akemiqo shou kupuqhiyi nani, eno panoqo itaghi kinikulu shitsu nani. Ino ije kimthe susho nani.

²⁶Kughou panonguno itaghi sushokulushi pano yeghilo kughunaluveni keno khunomu panoqo shikumsa moveni keno, tithiuno panonguno ijechuvekeu ghenguno kishi panoqo shikukujoqhi keno tipau panonguno kumsumavelu nani.

²⁷Ashiayeh kutomo lau niye akimthe kepi piye kepushi khile iwu timiqo ghumi kughuna ani keno tipau yeghiqha kumtsu kudauno ino iwu timiqo saideghi nani.

²⁸Tileno iwu timiqono niye AMPEU panoqo Lhou kepi ithi nani. Panonguno hipau ithini putsake kughengu ino halephevekeulo panoqo puwuve eno itehiye panoqo lakhimu qhivemo puzu panoqo hekutsu pesu panoqo ghakhulo saideghi nani.

²⁹Ino Israil lo akemiqo shou ighungu lepuku nani eno niye khilemu panoqo launo itaghi tsughusu wuvemo nanike. Ni, Akughushu MPEU no pivae.”