Read Sumi Naga EZEKEL 40 Bible Online

EZEKEL 40 - Sumi Naga bible

EZEKEL 40

¹Ningu haphe puwuvekeu mipe muku pungu shi akelo ampe akitheulo atsala achighini lo eno Jerusalem khasupe leluvekeu mipe chighi abidiu shiake, ike tipa tsalani AMPEU no akuka kumto shi igholo akeu ino ithi eno pano ixapusu wuve.

²Kungunhetsu lono Alhou no Israilmi yeghilo isawuve eno naghuto chuqumughai keu lakhi shou ikughape qhi. Aphughi lakhi ithulu akeu toi igizulo akikuloghi amqoshi akeu ino ithulu.

³Pano tipau punukhoi isawu ike alazayi phuphuyi akeu toi timi lakhi ino ithulu. Paye mighikepu kighi phepheyi keu phikimiyeno shikeu ngo mighikepu qhaqhi lakhi ishi tsuqupe-a eno paye ahukikha lakhi phivilo puthugho ake.

⁴Pano ivilo pi, “Thinikuau timio, jualo! Ino kiu opiyeni keno tipaqo kumtsu tsaqutsalei julo eno amlo tsuqhi shilo, kughengu hipau vehu ghenguno hilau osasu ighike. Noye Israilmi vilo nono ithulukeu thwokha kumtsu pesu pi masakepu shi nani.”

⁵Ino ithulukeuye Achineki eno tipau vehomxa atupino putupesu ae. Timi huno pawu mighikepu qhaqhi akushulau miter pungu hu ikhipesu putupuakeu atupikiye mighijuke. Tiye akiqhelau miter kuthu eno akishilau miter kuthuke.

⁶Tipathiu paye kipelau akeu ahukikha laghilo wuve. Pano anepalo iku eno tipa kutsuqa lono kulola pano mighiluve, tiye akutho lau miter kuthu.

⁷Tipau vechewuke kudauye ala lakhi ake eno tuxa kudau aghukhe chebo kuthu ae. Achebo lakhikhino kodibo ake, ako lakhi khino miter kuthuke eno tipaqo dolo putukeu tupikiye akishi launo miter kinino tuxaxake. Aghukhe cheboqo veche kethiu alaghi lakhi akushulau miter kuthu akeuno achebo kuloghi lakhilo ilo ake eno tiye Achineki kudau kughope ake.

⁸Pano achebo hipau mighiluve eno tiye miter bidi tho aghi. Khagho laghi tileno ashekha shive aghi,

⁹eno khagho laghi shekha tipauno Achineki kupunukeu shiaghi eno tipau ashekha kudau putupuakeu tupikiye huye akishi lau miter lakhike.

¹⁰Aghukhe-chebo ala phivilo tuxa tuxau akeqo huye akije akushulau aqhemike eno panoqo dolo putukeu atupikiyeqoye akishilau aqhemike.

¹¹Tipashelo, timi huno khagho laghilo alaghi akeu khipahi keno mighiju. Tiye kuqhakelo miter tsughono tuxake eno khagho khaqhipuakeu dolo a-a akeuye miter punguke.

¹²Aghukhe chebo lakhikhi gizulo putukeu tupikiye chunineyikeu lakhi ae tiye akiqhelau miter tuxa eno akishilau miter tuxake. Acheboqoye akijelau akushulau akiqhe lau miter kuthuke.

¹³Tipathiu pano achebo lakhi zupou putukeu atupikiye lono alaghi tuxau achebo lakhi zupou putukeu atupikiye kutolo khitohi keno mighiju, ike tiye miter chighi kinino tuxa shiaghi.

¹⁴Achebo ashekhaushi akeu lono akikhala lakhilo ipelukeu shiaghi. Pano tipau chebo mighijukeulo tiye miter chighi shiaghi.

¹⁵Khagho laghi ahukikha tupikiye khalau kudauno achebo ashekhau jibo kutolo pekuqhaju kelo tiye miter mukupungu shiaghi.

¹⁶Acheboqo jibo khalau kudau eno acheboqo dolo ajibo alou kudauqolo akighipe kititi ae. Alaghi sholukeu kudau akuptulo amsabo toikeu shisu puku pe puae.

¹⁷Timi huno khagho laghi vechesu akikhalalo isasu wue. Putukeu tupikiye ki-ghi achebo shighi shipua, eno tipaqo zulo aqha lakhi atu pesu qhapepua,

¹⁸Tipauno akikhala vehomxa pesu pekhopua. Akikhala khalau hipauye akikhala alou akeu nguno aqhou jolono ae.

¹⁹Qhemghaikeu jolono khagho la lakhi ake tipauno akikhala aloulo ilo ake. Timi huno khagho laghi kuma dolo khitohi ani keno mighiju kelo tiye miter lhopungu shiaghi.

²⁰Tipathiu timi huno ahuu kudau akeu khagho laghi mighiju, tiye akikhala khalaulo ilo ake.

²¹Tipa laghi phivilo aghukhe chebo kuthu akeu eno achebo lakhi kije akeu tipaqo kumtsu kipela kudau khagho laghi akeulo mighilukeu sasu akimighi aphiphi shiaghi. Khagho laghi kuqhajukelo miter mukupungu eno akije lau miter chighi kinino tuxa shiaghike.

²²Achebo akuloghiu, akighipeqo eno amsabo toikeu shisu pukukeu kumtsu kipelau khagholo akeu toike. Hilehi khagho kutolo anepa tsuni loikupepuae eno achebo kuloghino ashekhaushi akikhala sholukeu shiae.

²³Ahuu khagho hipau lono akikhala kathaiku kelo khagho laghi lakhi akeu huno akikhala aloulo ilo ae, tiye kipela kudau akeu tho lono tishi ae. Timi huno khagho laghi hikuma dolo khitohi keno mighiju kelo tiye miter lhopungu shiake.

²⁴Tipashelo, timi huno apeu kudau isasu wu ike tilau khagho laghi ikujono ithulu. Pano tipau mighijuke tiye kutauqo sasu aphiphike.

²⁵Hipau khagho laghilo achebo akeqolo akighipe ake, tiye kutauqolo akeu paphike. Khagho laghi pekuqhajukelo akushulau miter muku pungu eno akijelau miter chighikinino tuxake.

²⁶Anepa tsuni losu tipaulo iku puani eno tipau chebo akijeu ghi ashekha kudau akikhala sholukeulo ani. Amsabo toikeu putupuakeu tupikiye alou alaghi sholu akeu kudau shisupuku puake.

²⁷Hipaulo ghi akikhala alou ilo keu khagho laghi lakhi ake. Timi huno khagho laghi hi akiniu mighiju kelo tiye miter lhopungu shi aghi.

²⁸Timi huno isasu apeu khagho laghi lono akikhala aloulo ilo. Pano khagho laghi mighiju keulo tiye putupuakeu tupikiye khalaulo khagho laghiqo sasu akije akushu lau aqhemi shiake.

²⁹Tipaulo aghukhe cheboqo, achebo akijeu eno tipaulo putupuakeu tupikiye alou akeqoye kutau khagho laghiqolo akeu sasu aphiphike. Hipau khagho laghilo acheboqolo akighipe ghi ae.

³⁰Akushulau kuqhakelo miter mukupungu shia eno akije lau miter chighi kinino tuxake.

³¹Tipau achebo akijeuye akikhala lakhiu sholukeu shiae eno alaghi kudau putukeu tupikiyelo amsabo toikeu shisu puku puae. Hipau khagho kutolo anepa tache loiku puake.

³²Timi huno isasu kipelau khagho laghi lono akikhala aloulo ilo. Pano khagho laghi mighiju keulo tiye kutauqo sasu aphiphi shi aghi.

³³Tipaulo aghukhe cheboqo, achebo akijeu eno tipau tupikiye alou huye kutau khagho laghi mighijukeu sasu aphiphike. Tipaqo kumtsulo akighipe ake eno achebo akijeu loghi ake. Akushulau kuqhajukelo miter mukupungu eno akije lau miter chighi kinino tuxake.

³⁴Achebo akijeuye akikhala khalau sholukeu shiae. Alaghi kudau putukeu tupikiyelo amsabo toikeu shisu puku puae. Hipau khagho kutolo anepa tache loiku puake.

³⁵Tipathiu timi huno ahuu khagho laghi kudau isasu wu. Pano tipau mighiju kelo tiye kutauqo sasu aqhemi shiae.

³⁶Kutauqo toi hipau ghi aghukhe chebo ngo putukeu tupikiye alou koghekughu shi, achebo kije lakhi ae eno aqha kumtsu akighipe ake. Tipau akushulau kuqhaju kelo miter muku pungu shia eno akije lau miter chighi kinino tuxake.

³⁷Achebo akijeuno akikhala khalau sholukeu shiake. Alaghi kudau putukeu tupikiyelo amsabo toikeu shisu puku puae. Hipau khagho kutolo anepa tache loiku puake.

³⁸Akikhala khalaulo khagho laghi alou sasu kime ghi abo lakhi ahuu kudau ae. Tipauye akikhala kudau sholukeu chebolo ipeghi ake eno tilehino panonguno lhoxu akuchopu pitinikeu kumo qhucheke.

³⁹Achebo kije hipaulo bekepu alpa bidi ae, achebo hula kini hilau kini ae. Alpa hipaqo shouno panonguno aghashipe mllanikeu lhoxuqo heqhiche, tiye akuchopu piti mlla kepu shina momu axine ghengu momu lochilekeu kumllagho shikeu namu shiniyeke.

⁴⁰Achebo khalau puzuu toikeu alpa bidi ae, ahuu khagho ilokeu phivilo hula kini hilau kini ake.

⁴¹Kuqhakelo alpa tache ae, khipaqo shou akumllagho shi nikeu lhoxuqo heqhicheke no: Bidino achebo alou eno bidino akikhalalo.

⁴²Achebolo alpa bidi akeu, lhoxu kuchopu piti mllanikeulo peitha chekeu huye atu yetha pesu shikeu lipake. Tipaqoye akiqhe lau miter tuxake eno tipaqo kutsuqaye ako bidi kujolo sentimiter lhotsuni punguke. Akumllagho shikeu lhoxu heqhichekeu nhemgha kumtsu alpa hipaqo shou puake.

⁴³Alpa kichilo shenguleikeu shi au-pa kishi qhemi pesu mukha puae. Ashi khijehi akumlla gho shiniye akeno pesu alipaqo shou qhi cheke.

⁴⁴Tipathiu pano isasu akikhala aloulo ilo. Akikhala aloulo achebo kini khaqhi pua, lakhino apeu jughi shipua tiye ahuu khagho laghi akeu phivilo.

⁴⁵Timi huno ivilo pikeuno achebo khipauno apeu ju ani keno tiye achinemi Achinekilo mula akeqo ghenguno,

⁴⁶eno ahuu juakeu cheboye akipti-a lo mula akemi achinemi ghenguno kepi. Achinemi kumtsu Zadok launo ikoighikemi; Levi laghamiqo gholo panoqo likhino AMPEU zulo pa mlla keu shipe nikeu shike.

⁴⁷Timi huno akikhala alou mighijukelo tiye ako bidi kujolo miter lhopunguke. Achinekiye kulolau kudau ake eno tipau zulo akiptia-a lakhi ae.

⁴⁸Tileno pano isasu Achinekilo ilochekeu chebolo isawu: tiye akutho lau miter kinino tuxake eno akije lau miter tsuni, eno akuptu hula hilaulo miter lakhino tuxa shishoi ake.

⁴⁹Ilochekeu chebo kutolo anepa loiku puani eno tipau nepaye akije lau miter chighi eno akutho lau miter tsughoke. Ikulolalo tuxatuxa kudaulo atsukucho lakhikhi ake.