Read Sumi Naga EZEKEL 43 Bible Online

EZEKEL 43 - Sumi Naga bible

EZEKEL 43

¹Timi huno kipela kudau sholu akeu khagholo isasu wu,

²ike Israil lhou akeu kuvu saghu saghuikeu kipela kudauno ighikeu ino ithuluke. Alhou sutsaye azughi ghugha toi ighake eno ayeghiye saghu saghuikeu kuvuno yepuvu ake.

³Kungunhetsu hipauye Alhou no Jerusalem kutsaniye ighikelo ino ithulukeu kimihike eno Kebar ghoki phivilo ino ithulukeu kimihike. Tileno niye ayeghilo igi pishiqhope iluqive.

⁴Saghu saghuikeu kuvuno kipelau khagho vechesu Achinekilo ilove.

⁵AMPEU ghunguno ipeqheluve eno isasu akikhala aloulo ilove, tilau AMPEU kimthe jukuvuno Achineki chhitoive keu ino ithulu.

⁶Timi huno tilehi iphivilo puthugho eno Achineki lono AMPEU no iputsakeu ino chilue:

⁷“Thinikuau timio, ikuka lakhu hile ani. Niye hile Israilmi gholo acheuve nani eno alhokupuju panoqo shou ayehpe nani. Israil lo akemiqo pina momu pano kukamiqo namu kutau lhouqo mlla puzu momu hipa-alo pano kukami sukumo qhokeu lono itaghi ije kimthe shipixi kithemove nani.

⁸Kukamino Achineki kisheqho ngo ahukikha tsukucho di-ghi pano kikuloghi kisheqho ngo akikha tsukucho shipe qhike, ikehu ningu dolo puwupuakeu likhi anie. Panonguno kuchhube kutsula kumla shikeu lono ije kimthe shipixike ikehu ino iloghu kighide launo panoqo kutsaveke.

⁹Itehiye panonguno kutau lhouqo mlla chekeu tave masae eno pano kukamiqo sukumo ikhisuwuve masae. Panonguno tishiaye niye alhokupujulo panoqo gholo auve nani.”

¹⁰AMPEU no itaghi pi, “Thinikuau timio, Israilmi vilo Achineki ghili pesu pilo eno panoqo pelo tipau kughupua keu phijukide kudai pelo. Panonguye panoqo xine kumlalo kujove pelo.

¹¹Tishikelo, panonguno panoqono kiu mulave akeno tipaulo kujove aye panoqo vilo Achineki kughu keu chixechilei pilo: tipau koghe, tipau ikulola eno ipekeu tipau koghekughu, thwokha kithikiyi shikeu eno tipaulo akhuayeh jeli kumtsu pilo. Tipaqo kumtsu panoqo ghenguno yehpe qhilo tishianguno panongu pelo thwokha jeli kishi kithipe puani keno ithulu pelo eno tishianguno ayeh jeli kumtsu pewolu nanike.

¹²Hiye Achineki yezahke: naghuto kutsuqalo tipau sumxape akeu qha kumtsu achinepu eno akimtheke.”

¹³Akipti-a mighilukeuye hike, tiye Achineki mighikeu kimghi peitha puzu mighikeu. Akipti-a abou kudau sumxa pesu azula lakhi ae tiye miter tuxa eno tipau muku khalau kudau botha puku puae tiye miter tuxalo tuxa pukupuae.

¹⁴Akiptia abou kudau qhakeu lono iku akiptibo aqhou kudau kutolo miter lakhi qhe ake. Tipashelo kothakeu ako lono alou kutolo homxa ghi miter tuxa ake, eno miter kini qhemghaike. Itaghi tipathiu kokutha akeu ghi ako lono sumxa ghi miter tuxa alou lono shipua.

¹⁵Hi kunguu kokutha khile akumllagho piti chekeno tighi akiqhelau miter kinike. Acheku bidilo chhophe puakeuye akutsuqa kutau nguno akiqheuke.

¹⁶Akipti-a kutsuqaye ako bidi aphiphi, ako lakhikhilo miter tsughoke.

¹⁷Amutau kokutha ghi ako bidi aphiphike ako lakhikhilo miter tsunike, eno tipau kichilo miter tuxalo tuxa qhe ake. Tile azula ye miter tuxa pahike. Akipti-alo ikunikeu nepaye kipela kudau ake.

¹⁸Akughushu MPEU no ivilo pi, “Thinikuau timio, ino ovilo kiu piani keno inilo. Kughono akipti-a shiqhiveni keno noye tipau shikimthekeu shi tipau shouno aghashi mllakeu pitilo eno lhoxu aghashi mllakeu jih pesu tipau kuzute pukulo.

¹⁹Levi laghalo achinemi khunoqono Zadok polo kughukomi keno tipaqo likhino iqenike igizulo ighi kepu shi nani. Ni, Akughushu MPEU no ahza hipau tsu ani. Panoqo pelo axine ghenguno aghashi mlla penike nono amshitsu alhothe lakhi panoqo tsulo.

²⁰Noye tipau jih hami lupuzu akipti-a cheku bidilo chhophe puku puakeulo qhilo eno tipau shekichi kumtsulo nudalo. Hipau ghola lono noye akipti-a shikimthe eno tipau pesu akimthepu shilo.

²¹Noye amshitsu lhothe axine ghenguno aghashi mllakeu lulo tipauye achineki nguno khalau aqha pakutashi kutopuakeu lono pitilo.

²²Tishiwo thoghiu noye anetsu tukutiye kiumu kuhakeu lakhi lulo eno axine ghenguno aghashi mllakeu shilo. Tipau ji pesu akipti-a shikimthelo tiye nono amshitsu pesu shikeu ghola lono.

²³Nono tipau shitave kethiu, amshitsu alhothe lakhi eno bheritsu alhothe lakhi tikuma lakhimu tukutiye kuhakeu lulo,

²⁴eno tikuma ilau saghilo. Achinemiqono tipaqo shou amiti kuzute pukulo eno imllakeu shi tipaqo pitilo.

²⁵Atsala tsuni ghenguno tsala lakhilo noye ane lakhi, amshitsu lakhi, bheri tsu lakhi ishi axine ghenguno aghashi mllakeu shilo. Tipaqo kumtsu lakhimu tukutiye kuhakeu shimasake.

²⁶Atsala tsuni ghenguno achinemiqoye akipti-a akimthepu shiamasake eno tipau peitha wonike kuto amasake.

²⁷Kughono tipau tughakhani toveni keno achinemiqoye akiptialo piti mllakeu gho ngo timiqo wu kuposhukulu shi mllakeu gho ishi pesu mllakeu huthulo. Tileno ino nongu kumtsu lau imlo kiqi shi nanike. Ni, Akughushu MPEU no pivae.”