Read Sumi Naga EZEKEL 44 Bible Online

EZEKEL 44 - Sumi Naga bible

EZEKEL 44

¹Timi huno isasu achineki kipela qha kudau khagho khalau akeulo sawuke. Khaghoye khape pua,

²ike AMPEU no ivilo pi, “Khagho hipauye khape puache nani eno khilemu khaqhimo nanike. Timi khumu tipau peitha pemlake kughengu ni, Israil Lhou AMPEU no tipau vechesu iloghive ake. Hiye khape puache masae.

³Tishiepimu akukapuu ayehpe akeuno eno igizu lono akimthe ghulhu chulu nike tilehi wulu nani. Paye tipaulo ilopuzu achebo akijeu ashekichi alou akeu kudauno khagho laghi qhiveno wulu nani.”

⁴Tileno timi huno ahuu khagho lono isasu Achineki gizulo sawu. Ino juke lauye AMPEU chinekiye pano sasu akeu kuvu saghu saghuikeuno chhitoivekeu ino ithulu. Ino igi pishiqhope ayeghilo ikiqive,

⁵ike AMPEU no ivilo pi, “Thinikuau timio, nono kiu ithuluni eno chiluni keno amlo tsuqhiyi julo. Ino ovilo Achineki ghenguno akhuayeh pesu pinike. Tsaqui jukutolo, timi khipaqo pelo Achinekilo ilo penani eno khipaqo pelo ilopemo keno ithilo.

⁶“Hu hekibidemi Israilmi vilo ni, Akughushu MPEU ye panonguno kuchhube kutsula jeli thwokha shiakeu hinguno alau kutuumlave ake pi pilo.

⁷Panonguno ichineki shipixive tsuke tiye ayiko ghamokemi inaghami, igholumokemi pelo kughono aghashi mllakeu atha ngo ahji pesu imlla ake lono Achinekilo iloghipeke. Ikehu iwu timiqoye kuchhube kutsula jeli kumtsu panonguno shiveno iwu puloshoqhi hephoveke.

⁸Panonguye ichinekilo akimtheshi chini chekeu peithaluvemoe, tishinike zuqhulo inaghami pelo ti peithauve peke.

⁹“Ni, Akughushu MPEU no pitsu anike ayiko ghamokemi inaghami igholumo kemiqoye khumu ichinekilo ilopemo nani, inaghami Israilmi gholo xuaghikemi shiaghi pinamu.”

¹⁰AMPEU no ivilo pi, “Niye Levi laghami khunoqono Israilmi kutamiqo gholo supuzu iqhiveno asu-atu julho mllauve keno tipaqo ghimeqhini cheni.

¹¹Panonguye khagho jukutokeu eno Achinekilo akumlapu akeu mula ithakeu lono Achinekilo iqeluvi. Panonguye timiqono piti mllakeu ngo aghashi mllakeu lhoxuqo heqhiluvi eno panonguye timiqo qenikeu kumlapu shiluvi.

¹²Ikemu panonguno Israilmi ghenguno asu-atu julho mllakeu peithatsuke ghenguno eno tishikeu lono timiqo axinelo musu sawu kehu ni, Akughushu MPEU no tsaquino tushoqhi anike panonguye ghimeqhi masani cheni.

¹³Panonguye achinemi shighi iqe pemoe momu Shishe Akimthe-alo ilopemlake. Panonguno kuchhube kutsula kumla shikeu ghenguno aghime hipau tsuanike.

¹⁴Niye panoqo pelo Achinekilo aghinikishi kumla mula penikeu shi kutotsu anike.”

¹⁵Akughushu MPEU no pike, “Levi laghalomi khunoqono Zadok polo kughukomi keno tipaqoye Israilmi kutamiqono ilauno tsughusu wuve pinamu panonguye amikucho shi Achinekilo iqecheke. Tighenguno itehiye panonguno iqe kepu shi nani eno igizulo ighi puzu aghashi mllakeu atha ngo ahji pesu imlla nani.

¹⁶Panongu likhino Achinekilo ilo puzu iwu akipti-alo mla eno achinekilo akumlla jeli peithalu nani.

¹⁷Kughou panonguno aghutu kikha vechesu Achinekilo akikhala aloulo iloni keno panonguye phephei keu phimini pepuni. Panonguno akikhala aloulo iloni kelo momu Achinekilo akelo panonguye amhino shikeu phimini kiumu pepumoni.

¹⁸Tishianguno panonguye tsunhi pemonike, panonguye phepheikeu akutsu kukuzu eno phepheikeu mini pepuni ikemu apokha pumoni.

¹⁹Panonguye akikhala khalau khilehi timiqo acheni keno tilau ipenike zulono atughushi panonguno Achinekilo akumla shiakelo pepukeu phimini xaqhiveni eno akimthe cheboqolo qhiveni. Panonguye aphimini kutau pepuluveni tishikeu lono panoqo phimini akimthe huno timiqo kitiqeve pemonike.

²⁰“Achinemiqoye pano kutsusa miyemoni momu panoqo sa kushuwa thuwuve pemoni. Panonguye tipau achipiu lono qhini.

²¹Achinemiqoye akikhala aloulo ilonike zulo kiu kiu ji namu shomoni.

²²Achinemi khumu kutami sasu ixavekeu totimi sasu kulakupu shimoni; paye Israilmi ilithathe likhi sasu kulakupu shini momu achinemi kutami nipu chimemi sasu kulakupu shini.

²³“Achinemiqono kiuno akimthe eno kiuno mithekumo keno eno kiuno chinikeulo mithe akeu eno kiuno mithemo keno kutuqu akeu pesu iwu timiqo vilo shikani.

²⁴Kughono ayeh lo mutomushu ipeghini keno achinemiqono iyezah kiqi lono xathani. Panonguye iwu akhuayeh kiqilo achineyeh tiqhetini akeu peni eno panonguye Sabat pinyeqo akimtheshi peni.

²⁵“Achinemi lakhiye chinikeulo mithemo keu shimo nike ghenguno akithi kumo bumoni, tiye pa puaza, pa tianuli momu pa thikuzumi eno pa chelimi kulau miphi kemi kithikumo kumo aye kutami kithikumoye bumoni.

²⁶Pano mithe kitheve kethiu paye atsala tsuni kheaghilo

²⁷tithiuno achineki khala aloulo ilolo eno pa shikimthe kepushi aghashi mllakeu pesu mllalo, tishianguno paye itaghi Achinekilo qelu kepushi. Ni, Akughushu MPEU no pivae.

²⁸“Achinemiqoye panongu saje achine kumlapu anike, tiye ino Israil tsukeu eno tiqheli lakhi lono tiqheli lakhi lau pekishe pesu ighipeniyeke. Panonguye Israil lo aki-alu pighimoni; panonguye ilikhi avehupushi anike.

²⁹Achinemiqo chuqupuye athi pesu mllakeu, axine ghenguno mllakeu eno lochilekeu mllakeqo shi nanike, eno panonguye Israil lo ighenguno kutopesu tsuvekeu jeli kumtsu lukepu shi nani.

³⁰Achinemiqoye ghile hukeu atughiu jeli akiviu kumtsu eno kutau imllakeu jeli kumtsu lukepu shi nani. Timiqono ghuthu khije asho shini keno panonguye mllakeugho shi ghi ashopa atughiu pesu achinemi tsuni eno iwu kukumghaye panoqo kibo shou ngoche nani.

³¹Achinemiye aghau pina lhoxu kutau namu pakutoshi thivekeu shi momu lhoxu kutauno tsuvekeu shi chukepu kumoe.”