Read Sumi Naga EZEKEL 45 Bible Online

EZEKEL 45 - Sumi Naga bible

EZEKEL 45

¹Kughono alaghaqo pututa saje ayeghi kijetha tsuni keno saje lakhiye AMPEU lau ikhiphetsu masake. Tipau saje yeghiye akushulau kilomiter chighi kinino tuxa eno akijelau kilomiter chighi shilo. Hipau qhaye kumtsu akimthe shilo.

²Hipau qha alou ayeghi bokutha lakhi ako bidi aphiphikeu, ako lakhikhino miter 250 shighi Achineki ghenguno qhilo eno kiumu kuhakeu yeghi-a miter muku punguno akije lau tipau vehomxakeu shilo.

³Ayeghi saje hipau tuxa, ti akushulau kilomiter chighikinino tuxa eno akijelau kilomiter punguye mighi pesu tipau kutashivelo; tiye Achineki kumtsu nguno akimtheu-a akepu shi nani.

⁴Hiye aghakhulo akimtheu qha shi nani, achinemi khunoqomino Achinekilo AMPEU qe acheni keno tipaqo ghenguno tikutashi qhikeu. Tipaulo panoqo ki anani eno Achineki ghenguno ayeghi kothakeu anani.

⁵Aqha tuxau yeghiye Achinekilo qe achekemi Levi laghamiqo mheghipu shi tikutashi qhini. Tilehi panoqono ngokepushi taun akha nani.

⁶Akimthe qha shelo ayeghi kokutha lakhi akushu lau kilomiter chighi kinino tuxa eno akije lau kilomiter kinino tuxaye aphughi lakhi ghenguno qhini, tipaulo Israilmi khu khumu ngolu kepushi.

⁷Ayeghiye kukapuu ghenguno ghi kothape qhini, Akimthe qha kulola kudau alughi akeu lono kulolau Azughi Zu kutolo; eno kipelau alughi akeu lono tiye kipelau aghakhu lughi kutolo, tishianguno tipau akushulauye Israilmi lakhi khi lau aqha kotha tsukeu yeghi akushu lau tohi shipe nike.

⁸Hipau qhaye Israilmi ghakhulo kukapuu saje shilu nanike, tishianguno paye timiqo qhasu pemo niyeke ikemu aghakhuqha kutauqoye Israil lo alaghaqo sala shipenike.

⁹Akughushu MPEU no pike, “Nongu Israil shou ayehkipemiqo, nonguye shulo axine shivae! Nonguno heqhi buqhi eno qhasuchekeu tavelo. Achipiu eno kuchou shilo. Nonguye itaghi iwu timiqo pano yeghi lono khilemu hapheve kevilo. Ni, Akughushu MPEU no nongu vilo hipau pianike.

¹⁰“Kumtsu ghano akimishi mighikeu akimighi lono mighikeuye amikuchou peitha masae: qhaikeu kimighipu efa eno azu jeli kimighipu bat kuchou peithalo.

¹¹Jokuchho lo kimighiye xomer ke, ikelo hitoikeu kimighi shilo:” Xomer lakhilo efa chighi eno tiye bat chighi sasu aqhemike.

¹²Nongu wu akimishi mighikeuye hitoi shilo: Shekel lakhilo Gera muku Shekel mukuno Mina lakhi

¹³Nonguno akumllagho tsukeulo hipau kiqi lono shilo:

¹⁴Asho thi: ghile hulukeulo saje lhotsugholo lakhi. Barli thi: ghile hulukeulo saje lhotsugholo lakhi. Oliv teli: Asubo lo pithikeulo saje 100 lo lakhi (Bat pesu tipau mighilo: Bat chighino Xomer lakhi eno tiye Kor lakhi.)

¹⁵Bheri loji: Bheri 200 akeulo lakhi.” Nonguye athi jeli kumllagho, akuchopu piti mllakepu lhoxu pesu kuposhukulu kumllagho lhoxu pesu ighilo, tishianguno nongu xine peivetsu nanike. Ni, Akughushu MPEU no ahza hipau tsu ani.”

¹⁶Aghakhulo akemi kumtsuno akumllagho hipaqo pesu Israil lo kukapuu lau pewuni.

¹⁷Aqhi kithe pinyeni, Sabat pinyeni eno tiqhetini kutauqolo kukapuuno Israil shiayeh kumtsu ghenguno kuchopu piti mllakepu lhoxuqo, athi jeli akumllagho eno aji jeli akumllagho kutope tsunikeuno pa kumlapu sajeke. Israilmi xine ikhisuwuve penike ghenguno paye axine kumllagho, athijeli kumllagho, akuchopu piti mlla kepu gho eno kuposhukulu kumllagho kutotsu kepu shi nani.

¹⁸Akughushu MPEU no pike, “Aqhi atughiu atsala atughiulo nonguye tukutiye kiumu kuhakeu amshitsu lakhi aghashi mllalo eno Achineki shikimthelo.

¹⁹Achineuno hi axine ghenguno mllakeu jih hami pesu Achineki hukikha tsukucholo ngo akiptia chekulo ichushei akeulo eno akikhala aloulo ilokeu hukikha tsukucholo hedapukulo.

²⁰Aqhi tipau atsala akutsuniulo nonguye timi khuno muthave no momu kughuchove no axine shiveni keno tipau ghenguno puzuu tho thwokha shilo. Hitoi shikeu lono nonguno Achineki mithelu anani.

²¹“Aqhi atughiu atsala chighi abidiulo nonguye Ijip Hechelukeu Pinye huthu nani. Atsala tsuni dolo kumtsu no kholaqhi sumokeu sho chu nani.

²²Tipau pinye atughiu tsalalo akukapuuno pa xine eno timi kumtsu xine ghenguno amshitsu lakhi aghashi mllakeu tsulo.

²³Atsala tsuni dolo atsala lakhikhilo paye AMPEU lau kiumu tukutiye kuhakeu amshitsu tsuni eno bheritsu tsuni heqhi pesu akuchopu piti mlla masae. Paye axine ghenguno akumllagho tsukeu shi tsala lakhikhilo anetsu ghi lakhi aghashi mllalo.

²⁴Amshitsu lakhi eno bheritsu lakhi aghashi mllakeulo tilehi athi kilogram chighi tsunino tuxa eno oliv teli liter kuthu pesu akumllagho shilo.

²⁵“Aqhi akutsuniulo atsala chighi pungu shiakelo Apusho Pinye khikhi huthu cheni keno tipaulo, akukapuuno atsala tsuni, tsala lakhikhilo axine ghenguno aghashi mllakeu atho, kuchopu piti mllakeu atho eno athi jeli ngo oliv teli akumllagho tsukeu atho pesu mlla nani.”