Read Sumi Naga EZEKEL 46 Bible Online

EZEKEL 46 - Sumi Naga bible

EZEKEL 46

¹Akughushu MPEU no piani, “Atsala tsugho akumla shikeu tsala doloye kipela khagho laghiye khape qhi masae ikemu tipauye Sabat tsala ngo Aqhi Kithe Pinikeu loye khaqhiveni.

²Kughono achinemiqo akukapuu wu akuchopu piti mllakeu ngo kuposhukulu kumllagho pesu mlla akelo, paye akikhala khalau lono achebo akijeulo iloveni ahukikha laghilo akeulo eno ahukikha tsukucho phivilo puthugho alo. Ahukikha tilehino paye Alhou mlla-ano itaghi ipeveni. Kijiliu shike kutolo ahukikhaye khamoni.

³Sabat tsala eno Aqhi kithe Pinye kumtsulo timi kumtsuno ahukikha gizu lono itsaiqino AMPEU mlla masake.”

⁴Sabat tsalalo akukapuuye akuchopu piti tsu kepushi AMPEU lau bheriti tsugho bheritsu lakhi, hipaqo kumtsu tukutiye kuhakeu sughini.

⁵Amshitsu lakhi gholo paye athi jeli kilogram chighitsunino tuxa sughini eno bheriti lakhi gholo pano kiu tsunishi keno tipau sughini. Athi jeli tikithipu sughi keu gholo oliv teli liter kuthu sughini.

⁶Aqhi kithe Pinikeu lo pano amshitsu alhothe lakhi, bheriti tsugho, bheritsu lakhi, kumtsu tukutiye kuhakeu pesu akumllagho tsuni.

⁷Amshitsu lakhikhi eno bheritsu lakhikhi gholo athi jeli kilogram chighi tsunino tuxa pesu mllani, eno bheriti lakhikhi gholoye kukapuuno kiu kiumu tsunishikeu pesu mllaluvi. Athi jeli pesu akumllagho shikeu tikithipu lakhikhi gholo oliv teli liter kuthu pesu mllani.

⁸Kukapuuye khagho laghilo achebo kije lono cheve no pano ighikeu laghi lono ipeveni.

⁹Kiu kiu tiqhetini pinyi keulo pinamu timino AMPEU mlla nike ighikeulo, khunono ahuu khagho lono iloni keno panonguno mllakeu tave kethiu apeu khagho lono ipeve pelo, eno khunono apeu khagho lono iloni keno ahuu khagho lono ipeve pelo. Khumu pano iloghikeu la lono ipe pemoni ikemu tipau mishilo khagho akeu lono ipeve masake.

¹⁰Akukapuuye timiqono iloghi kelono pa ghi iloghini eno panonguno ipeve kelo pa ghi ipeveni.

¹¹Aghulhu tsalaloye eno pinyi akeloye athi jeli mllakeuye amshitsu lakhi momu bheritsu lakhi gholo kilogram chighi tsunino tuxa shini eno bheriti gholoye mlla akeuno kiu kiumu tsunishikeu tsulu nani. Athi jeli mllakeu gholoye oliv teli liter kuthu pesu mllani.

¹²“Kughou akukapuuno pa likhi pa pulou lono AMPEU lau akumllagho tsukeu shinishi aye, kuchopu piti mllakeu momu kuposhukulu kumllagho shiaye, pa ghenguno akikhala aloulo ilokepushi kipela kudau akeu khagho khaqhitsulo. Paye Sabat tsalalo pano akumllagho shikeu ghola lono shini eno pano ipeve kethiu ahukikhaye khaluveni.”

¹³AMPEU no pi, “Inaqhe atsu-tsu bheriti ampe lakhi shiakeu eno tukutiye kiumu kuhakeu pesu akuchopu piti pesu AMPEU lau mllalo. Hipau kumllaghoye ghulo atsu-tsu shini.

¹⁴Itaghi inaqhe atsu-tsu asho mukhu kilogram kini eno asho gholo kununi ke ghenguno oliv teli liter lakhi ishi kuqhano akumllagho shilo. AMPEU lau akumllagho hipau shikeu yezahye alhokupuju tsuyikhomo pekishepelo.

¹⁵Bheriti, asho mukhu eno oliv teliye alhokupujulo inaqhe atsu-tsu AMPEU lau mlla masake.”

¹⁶Akughushu MPEU no ahza tsuani: “Ayehpe akeu kukapuuno pano pighikeu ayeghi kiukiumu pesu panuqo gholo lakhi lau agho tsuni keno tiye anu tipau yeghi shive nani eno pa kibo mheghi shive nani.

¹⁷Ikemu akukapuuno pa yeghi khipau pinamu pesu pa qholo mula akemi tsuni keno Tsuchilevekeu Mpe veho ighi kelo tipauye itaghi kukapuu yeghi shive nani. Tiye pawuke, pa eno pa nuliqo likhino alholo pighiwolu nanike.

¹⁸Ayehpe akeu kukapuuye timiqo wu aki alu ikhiluve tsumoni. Ayeghi khipau pano pa nuliqo tsuni keno tiye ayeghi pa saje shitsukeu lono tsumasake, tishianguno paye iwu timiqo yeghi luvetsu puzu panoqo nedaqoda pemoniyeke.”

¹⁹Tileno timi huno isasu ahuu kudau juakeu chebolo ilochekeulo sawu, tiye akikhala alou jibo apeu khagho akeu phiviloke. Tipaqoye achinemi ghenguno akimthe cheboke. Achebo kulola kudau a-a lakhi pano kichetsu

²⁰eno pike, “Hipa-a lono achinemiqoye axine ghengu aghashi mllakeu ashi momu lochilekeu kumllagho lhokeu-a eno asho mukhu mllakeu pesu asho shikeu-ake, tishi anguno akikhala khalau kiumu akimthe jeli peipe pemoni yeke, tilau timi kitiqelu nosayeke.”

²¹Tipathiu pano isasu akikhala khalaulo ipe eno ipiyekeuno tipaulo acheku bidi akeu lakhikhilo akikhala aghulolo lakhi ae,

²²akushu lau miter muku eno akije lau miter chighi punguke.

²³Tipau lakhikhino atuno puwu muxa pesu ae eno tilehi puwupuakeu di-ghi ami kishi-a shipua.

²⁴Timi huno ivilo pi, “Hipaqoye alikhuli kishiake, hipa-a lono timino aghashi mllakeu gho achinekilo aqemiqono be lhonikeu-ake.”