Read Sumi Naga EZEKEL 47 Bible Online

EZEKEL 47 - Sumi Naga bible

EZEKEL 47

¹Timi huno isachile sasu Achineki ikulolalo wu. Ikulola qholono azu qoipeghi ae eno kipela kudau qowu ake, Achinekino juakeu kudau qowu ake. Tiye achineki apeu aqhou kudauno akipti-a jibo apeu hechesu qoiqi ake.

²Timi huno ahuu kudau khagho akeu lono achineki bocho qhiveno isaipeve eno khagho kipela akeulo vehomxasu wuke. Apeu khagho akeu lono aghokiti aghulo qoipe ake.

³Pawu akimighipu qhaqhi pepuzu timi huno kipela kudau miter 500 kutolo aghokiti mighi iqi eno ivilo tileno aghokiti puthalo pike. Aghokitilo azuye ilaunhe kutolo likhike.

⁴Tipathiu pano itaghi miter 500 mighi iqi kelauye azuye ikhonhe kuto ikughive. Itaghi miter 500 mighi iqi kelauye azuye ichita kuvu shive.

⁵Pano itaghi miter 500 alaushi mighi ike aghokitiye shishe thonheive kehu niye putha wumlave. Tipauye azu mihi thasu wunikeu kumoaye katha wunikeu ighono thonheive.

⁶Pano ivilo pi, “Thinikuau timio tsaqui hipau ithi pualo.” Tipathiu timi huno aghoki mukulo isaide ipeve,

⁷ino tilau ipeghikeulo amuku hulau hilau asubo kutomo aghikeu ithulu.

⁸Pano ivilo pi, “Azu hipauye ayeghi vechesu kipelau qowu ani eno Jordan khilalo eno Amiti Zughilo qoilo anike. Kughou hipauno Amiti Zughilo qoiloni keno tipauno azughilo amiti zu akeu pesu azu kuxu shivetsu nani.

⁹Aghokitino khilekhile qowunikeno, tilehi ashi aghau jeli kumtsu anani. Aghokiti huno Amiti Zughi zu akuxu shivetsu nani eno tipauno khile khile qowuni keno akuxupu sughi nani.

¹⁰Engedi Zupuki lono ala kushuwalo Eneglaim Zupuki kutolo azughi mukulo akha kukhami anani, eno panonguno panoqo khame sukho pesu phuputho nani. Akuloghi Zughilo akha ajeli akeu jehi akha jeli kututakeu tilehi anani.

¹¹Ikemu amuku phivilo azukucho eno anixoxolo azu akeqoye tsughukhui akuxu shitsumo nani. Tipapoye amiti khuki shipe nike tishi anani.

¹²Aghokiti muku hula hilaulo asubo jeli kumtsu achuqupu shitsu nike thuipeghi nani. Tipaqo nipaye khilemu ighuivemo nani eno tipaqoye khilemu axathi pithi tamo nani. Tipaqoye aqhi atsu-tsu axathi kuxu pithi anani, kughengu tipaqoye Achineki lono qoipeghikeu zuno putsu ananike. Asuboqono achuqupu shilupe nani eno tipaqo nipaye timiqo shipivi nikeulo peithalu anani.”

¹³Akughushu MPEU no pike, “Alagha chighi kini dolo ayeghi kijetha nikeu lughiye hipaqo ke, Josef laghano aleqhi kini ithulu keu suno.

¹⁴Ino nopuasu lau tsaquino tushoqhive keuno niye ayeghi hipau panongu mheghipushi tsu nikeu shike; itehiye nongu dolo aqhemishi kijethalulo.

¹⁵Ahuu alughiye Akuloghi Zughi lono kipela kudau Hethlon phughi kuto wu ani. Hamat Kakuthala kuto Zeded phughi kuto;

¹⁶Berotha ngo Sibraim phughiqo kutoloke (hipaqoye Damaska kuka bocho lono Hamat kuka bocho kutoloke.) eno Tikon phughi kutoloke (tiye Hauran kukaqha lughilo anike.)

¹⁷Ikehu ahuu kudau alughiye Akuloghi Zughi lono chesu kipelau Enon phughi kuto Damaska ngo Hamat tokujo tipau ahuu kudau shianike.

¹⁸“Kipelau alughiye Damaska ghakhu ngo Hauran kuma dolo acheku lakhi lono chesusu iqi Amiti Zughilo Tamar kutolo eno Jordan kulola kudauno Israilmi yeghi shi eno Gilead no tipau kipelau shighi iqi anike.

¹⁹“Apeu alughiye Tamar lono chesusu apeu kulola Kadesh yeghikiti zu kutoke eno tileno ahuu kulolalo Ijipmi sasu kulughi ghi Akuloghi Zughi kutoke.

²⁰“Kulolau alughiye Akuloghi Zughino bothape ani eno tileno huthu susu ahuu kudau Hamat Kakuthala kulolau kutoloke.

²¹“Ayeghi hipau nolaghamiqo dolo kijelulo;

²²tiye nongu ghenguno alholo mheghipuke. Inaghami khunoqono nongu gholo acheni keno eno khunoqono hilau atianuli punupua khani keno panongu ghi nonguno ayeghi kijelu kelo panoqo saje ithulupe masake. Panonguye Israilmi shiayeh lakhi qhemishi peitha masake eno Israil laghamiqo gholono ayeghi saje asaqhikeulo sumasake.

²³Inaghami hilau acheuve kemi lakhiye pano khuno laghami timiqo gholo xuani keno tipaqo gholono pa saje ithulu nanike. Ni, Akughushu MPEU no pivae.”