Read Sumi Naga EZEKEL 9 Bible Online

EZEKEL 9 - Sumi Naga bible

EZEKEL 9

¹Tipathiu Alhou no ighamuku keu ino chilu, “Nongu khunoqono aphughi kutsaniye anikeno hilau ighilo. Nonguye aghushi nanu pesu ighilo.”

²Paikhavino Achineki khagho ahuu kudau akeu khalau kudauno timi tsugho ighi, milakhi khino aghunanu lakhi pesu ighi. Panoqo gholo timi lakhi aphi kumtsha upuzu yepuku kepu kiukela pesu che. Panongu kumtsu ighi puzu agho kiptia phivilo puthugho.

³Tileno Israil Lhou kuvu saghu saghuikeu huye achishibo kupu kerubim kudauno ikughi, tipa alo akeu lono, eno Achinekilo ilochekeu kichilo iqesusu wuve. Aphi kumtsha pepuakeu timi vilo AMPEU no kuno pi,

⁴“Jerusalem phughi kumtsulo wuno aphughi tipaulo kuchhube kutsula jeli shiakeulo timi khunoqono amlo kughuta shi ani eno amlo kupuna ani keno timi tipaqo kishelo amichipu shipukuvelo.”

⁵Timi kutamiqo vilo Alhou no ishi pikeu ino chilu, “Timi hupau papesu aphughilo wulo eno milakhimu ghuve kevilo; milakhi shoumu kimiyeqhiyi keu bekevilo ikemu ghiqhivelo.

⁶Kitemi na lhothemi na apumi ilimi na azaqo eno itimiqo namu ghiqhivelo’ ikemu timi khunoqo kishelo amichipu pu aghini keno tipaqoye lakhimu bukevilo. Ichineki hileno huthulo.” Ikehu panonguno Achinekilo tilehi sakiphemi puthugho akeqo shouno huthuve.

⁷Alhou no panoqo vilo pi, “Achineki shipixive tsulo. Tipau kikhalalo akithi kumono chhivepelo. Mula thuvelo!” Ikehu panonguno aphughilo timiqo ghiqhi thuve.

⁸Timi ghiqhile akelo niye ilikhi tilehi ae. Ino igi pishiqhope ayeghilo dape puzu ighamuku pi, “Akughushu MPEU, noye Jerusalem shou ighono aloghu ide kelauno Israil lo timi ghupuaghi keqo kumtsu pithi khaveni kesha?”

⁹Alhou no ishi khochile, “Israil ngo Juda lo akemiqoye axine kuthoshi kuquvae. Panonguno aghakhu kumtsulo timi ghiqhi puakhani eno ghiqhi heqhi keuno Jerusalem chhitoivae. Panonguno pikeuno ni, AMPEU no pano ghakhu qhive eno niye panoqo jumovae pike.

¹⁰Ikemu niye panoqo kimiyeni chemoe. Panonguno kutami shou kiu shipuani keno tipau ino panoqo shou shini cheni.”

¹¹Tileno aphi kumtsha u akeu timi huno xaideghi puzu AMPEU vilo pi, “Niye nono azah tsukeu shivetsuae.”