Read Sumi Naga DANEL 1 Bible Online

DANEL 1 - Sumi Naga bible

DANEL 1

¹Juda yeghilo Jehoiakim no kalu keu mpe akuthuu shi ake lono Babilon lo Akukau Nebukadnezar no Jerusalem leve eno aphughi vehomuxa luve.

²AMPEU no pa pelo Akukau Jehoiakim kughaluvepe eno achinekilo akeu kuakini hami suxaluvepe. Pano idewo ke ghulokilo pa gholo akughumi ghi sasu Babilon lo pano lhou chinekilo wu eno suxakulu nhemugha kumqope pano chineki kokutha bolo ghakutsu pe qhive.

³Israilmi hapheve kemi dolo, kukami kivimi laghalo lhothemi khami kishepe nike Akukauno pa qholo Atou Ashpenaz lau ahza tsuve.

⁴Panonguye ajukivimi, alokutsumi, thaikemi, pikhavi lono ithivekemi eno aphiau kupukulai jukivimi shi aghimasa, akukau hiyam lo mlakuzupu shilupeni kehu. Ashpenaz no Babilonmi tsa panongu phipiye eno yepiye penikeu shia.

⁵Akukau hiyam lo kumlamino kiu chusho cheni keno tipau pesu tsalakipetsu panongu lojipe nikeu shi akukauno ahza tsuve. Ampe kuthu tove kemtsa panongu sasu Akukau zulo wuno pa pelo jupe nikeu shi.

⁶Panongu dolo hipaqo kishelu, Danel, Hanania, Mishal eno Azaria, panonguye Juda laghamike.

⁷Akukau qholo atouno panoqoye hitoi kukidevetsu, Belthashazar, Shadrak, Meshak eno Abednego.

⁸Danel ye akukau hiyam mino chusho chekeu mithekumo chuqu chushono pa shipixive pemo nikeu kukumsu xathaluve, tighenguno Ashpenaz vilo kimiyeno pa kuphu tsulo pive.

⁹Alhou no Ashpenaz pelo Danel kimiye luvepe.

¹⁰Ashpenaz ye Danel kimiye pulaghi akukau musano pa vilo hitoi pi, “Akukauno nongu ghenguno kiu chu-sho penike kutope qhivetsu akeno tipaqo chu-shomo puzu apumi kutami toi chhikhoi juvighi ithulumove aye pano ipithive nani.”

¹¹Tighenguno Danel no pa eno pa kusami pano kuthu khe akemi lau wuno ishipi,

¹²“Ninguye kiu toive nani keno atsala chighi dolono ithive kepushi ayetsuni likhi pe niloji eno azu likhi pe nipiyelo.

¹³Tishino ni kughape akukau chuqupu pe loji akeqo apumi sasu kimhejupelo, kimhejukelo ninguye kiutoi ithulu nani keno tipau kiqi lono owu xakutha betsulo.”

¹⁴Atsala chighi dolono panongu pelo kuxuju penikeu pano pulove tsu.

¹⁵Kughono ado kihi kutha tove keno panongu jukelo akukau chuqu pe loji chekeqo nguno alau chhikhoi eno alau akumtoshi ithulu.

¹⁶Tighenguno akheuno akukau zahkutsuye qhiveno panonguno azuu ayetsuni likhi chuche keu toi chupe nikeu pulovetsu.

¹⁷Alhou no akighithi kutho eno akukumsu kutho kighithi pesu apumi pano bidi tsu, tipa shou ghi kungunhetsu eno asamo pekide lupekepu agho Danel tsuke.

¹⁸Akukauno ampe kuthu kihitha tsukeu kupuve kemtsa, Ashpenaz no lhothemi lojichekeqo kumtsu Nebukadnezar lau saghi.

¹⁹Akukauno panongu kumtsu sasu kuputsaju kelo, Danel, Hanania, Mishal eno Azaria pano bidino kutami nguno akiviu shi ithuluveno akukau mlo kiqi shive. Tighenguno panongu kishepe Akukau kughaki lo mla penikeu kihikusumi shive.

²⁰Akukauno kishi kutho kuzu tsa panongu vilo iniju pina eno akupuna jeli kiu panongu zulo sughi pimu pano bidiye ghuthu chighino kutami pano ghakhulo kuduumi eno auye kujumi nguno akiviu shi khochilelu eno xathalu.

²¹Persia lo akukau Cyrus no Babilon leve moke kutolo Danel ye akukau kughaki lo acheke.