Read Sumi Naga DANEL 11 Bible Online

DANEL 11 - Sumi Naga bible

DANEL 11

¹“Ikuphu nikeu eno isushonikeu ye panoke.

²Itehi kiu ovilo pinikeno tiye kuchouke.” Kungumino pi, “Hinguno alau kukami kuthuno Persia lo ka nani, pashelo abidiuno ka nani eno paye azuu kukami kuthu nguno kinikulu shi nani. Pa kuka akumgha awole shi ake dolono Grikmi kukaqha khu nani.

³“Tileno aghulo tokulumi kukami lakhi ipeghi nani. Pano akukaqha ighono kije shou ka nani eno pano shinishi keu kumtsu shi nani.

⁴Ikemu pa kuka awole shi ake lono pa kukaqha amqo bidi shi kijeve nani. Kukamiqo pa lagha lono ighi kemi kumqono pa zuqhulo ka nani ikemu panonguye pa kuka toi akumto shimo nani.

⁵“Ijip lo akukauye akumto anani. Pa gholo Zahtsuu dolo lakhiye panonguno akumtou shino pa kukaphu nguno akijeulo ka nani.

⁶Ampe kutomo dolo Ijip lo akukauye Siriya lo akukau sasu kuqhape xunike ghenguno pukaputsa nani eno pa nga ghi kughape pa kilo xupuu nani. Ikemu panongu dolo kuqhakulu kushowo womo nani, eno pa nga, li kimi, li nuliqo eno aqemi li gholo sawokemi kumtsu heqhi khave nani.

⁷Tipashelo ado kusho kumolo li bolomi lakhino kaluve nani. Pano Siriya lo akukau aghushimiqo sasu aghushi nani, panongu ghutu vexu ilo panongu leve nani.

⁸Panongu lhou auno mlakeu eno shuna tsandiyino shikeu nhemgha alhou tsuve keu xapu chile Ijip lo wuve nani. Ado kusholo kulakishi achepuzu,

⁹Siriya lo akukauno Ijip leju nani ikemu kiumu shimla nani eno idewove nani.

¹⁰“Siriya lo akukau nuliqono aghushi nike ghenguno ghushimi kutomo hekutsu pe qhi nani. Panongu gholo lakhino amghazu qoleighi ketoi ighino aghumino shipua keu aghutu xa nani.

¹¹Tipauno Ijip lo akukau mlo shikighideve tsuno Siriya lo akukau sasu aghushino Siriyami ghushimi kutomo kughaluve nani.

¹²Pano tolukeu jupe qheza nani eno ti pano ghushimi kutomo heqhi lukeu ghenguno, ikemu paw tokuluye ado kusho womo nani.

¹³“Siriya lo akukauye ide wove nani eno azuu ghushimi nguno akichiu hekutsu nani. Kughono ado kivi ighini keno, aghushi nanu kupukulai pusu ide ighi nani.

¹⁴Tileno timi kutomono Ijip lo akukau sasu kupughu ipeghi nani. Danel, no yeghiqha dolo timi khami ashi aji kighidemiye, kungunhetsu ithukulu ghenguno mujochile nani, ikemu panonguye tomove nani.

¹⁵Tighenguno Siriya lo akukauno putuveho puakeu phughi lepuzu kughaluve nani. Ijip lo ghushimiqono aghushi tsumove nani. Panoqo dolo aghu kivimi ghi akumto kuhave nani.

¹⁶Le ighikemi Siriyami qono panonguno Ijipmi sasu kiu shinishi keno pano ghoshi nani mujo chilemove kehu. Pano tushokiqhi yeghilo puthughono tushokiqhi yeghi kumtsu pa kuka qholo qhiluve nani.

¹⁷“Siriya lo akukauno akukughu lakhi paw ghushimi kumtsu peitha nikeu shi. Tilehi pano pa ghumi kukaqha lenike ghenguno pa gholo supeniye pa nga kughape Ijip lo akukau sasu kulauvepe nani ikemu akukughu tipau tokulu shimo nani.

¹⁸Tipathiu pano shiyeh kutomo sasu azughi lono aghushi nani eno shiyeh kutomo shou toluve nani. Ikemu inami sakiphemi lakhino pa ikhiqhiveno pa qhekuza kumtsu ashekhashive tsu nani. Kuchouno pinikeuye Siriya kukauno qheza chekeu hu pano ikhiluve.

¹⁹Akukau ye aghutuno putuveho puakeu pa yeghilo ide wove nani. Ikemu paye tomove nani, eno tipau huno pa kuxu ashekha shive nani.

²⁰“Pa thiu kukami lakhi ipeghi nani, pa kukaqhalo akinni alau pekho nike ghenguno pano kijemi ayeghime kuqhami hape puwu puzu timiqo ghimeqhi ayeghime qhape nani. Ado kushowo womono akukau tipau heqhive nani, ikemu pa kithiye aqo zulomu kumo momu aghu lonomu kumo nani.”

²¹Kungumino hitoi pie, “Pa shelo Siriya lo akukau shini keuye alhoksami lakhi ipeghi peno khuu akukau shikuzu kumo ke ikemu pulumono akeno akuka suxa luve nani.

²²Timi khuuno pa mujo chile nikeno Alhou wu Achinetou shi aghimu, lakhimu ghumono mitheve tsu nani.

²³Ashiayeh kutami sasu kulave nikeu pulokileveno panongu pishiqhive nani. Pa kukaqhaye aghulo pimu pa kumto alau shikitheve nani.

²⁴Pano kinikulu kua yeghi lakhi azuuno kutughu mono lenani eno pazuu kukami qono khilemu shichemo keu shi nani. Pano aghu lono anhemgha suxa sughi keqo pa kusami sasu kijeve nani. Pano putu veho puakeu a lakhi lenike ghenguno akukughu shi nani kemu tishimla aphi lono pado kuhave nani.”

²⁵“Pano Ijip lo akukau sasu aghu shinike ghenguno akumto ghushimi alau sunani, ikemu Ijipmino ghushimi kumzapu eno akuka kuano panongu mujo chileju nani. Ikemu Ijip lo akukauye pishiqhiveno tomlave nani.

²⁶Pa qholo kupunukhoi xuchekemi kijemi lakhino pa shipsave nani. Pawu ghushimi kutomo tileno thive nani, eno pawu ghushimi kumtsu mitheve nani.

²⁷Tishiveno kukami kini kumtsa aghulhu kuchua lakhilo iqano chu nani, ikemu pama kini kujo akukumsu lhoksa xapu ngo nani eno pishiqhi kile nani. Panonguno shi nishi akeu doye ighi miphi kehu.

²⁸Siriya lo akukauye pano suxalukeu nhemgha pusu akilo ide wove, Alhou wu timiqo chineyeh puhavetsuni keu puloa. Pano kiu shinishi keno pa gho shimlaveno pa yeghilo idewove.

²⁹“Athiu ghi pano Ijip le nani, ikemu thwokhalo ishiulo kuta shive nani.

³⁰Rommino zukilu lono ighino pa mujo nani. Tileno paye ighuve nani. “Tileno pano amlo idesu ighino Alhou wu timiqono pulu chekeu chineyeh puhave tsu nike pukaputsa. Timi khunoqo azuu tipau chineyeh pecheno qhive keno panoqono kiu shile pikeno tipau pape nani.

³¹Pawu ghushimiqo dolo khamino achineki lono shipixi keu kumla shi nani. Tsala kipetsu ghiqhino mllachekeu lakhave tsu nani eno tilehi Jukikichipu qhitsu nani.

³²Azuu puluche keu chineyeh phevekeqo pishiqhiveno akukauno panongu launo akukaqha luve nani. Ikemu khunoqo Alhou pape chekeno panonguno mujo chile nani.

³³Timiqo sakiphemi alokutsumiqoye pa lokutsupe timi kumtsu sasu kusaje nani. Ikemu ado kitila dolono panongu khami aghukishi lono heqhive nani momu amino pitiqhive nani eno timi khami anhemgha luve tsuno kughape akughumi shive tsuni.

³⁴Tishi heqhi akelono panongu gholo sukemi akichiuno alakimine lono suapimu Alhou timiqono akukuphu kitila ithulu nani.

³⁵Alokutsumi sakiphemi dolo khami ghiqhive nani, ikemu tipau vechewo timiqo shikimthe kithelu nani. Alhou no ado lakhi kihikutha shipe qhitsu keu tsala ighimoke dolo, hitoi ananike.

³⁶“Siriya lo akukauno pano kiu shinikeno kumtsu shi nani. Paye Alhou nguno akijeu kepi qheza anani, akughushu ashekha kuhakeu Lhou nguno ghi pauno akijeu kepi kumsu nani. Alhou no aghime pa tsumoke kutolo pano kiu shinishi keno kumtsu tolu nani, Alhou ye pano kiu shinike akukughu shivekeno tipau toi shikupuve nani.

³⁷Akukauno papu asu noqono mllachekeu lhou ghi gihumo nani, eno totimiqono kimiye chekeu lhoughi phimo nani. Kuchouno pano kumsukeuye alhou jeli kumtsu nguno pauno akijeu kepi kumsu nani.

³⁸Tipauqo zuqhulo, khuuno pa kukaqha sushotsu nikeno tipau likhi gihu nani. Pano shuna, tsandi, akughuputu eno kutau kumsagho kivi kughape papu asuqono khilemu mlla chemokeu lhou mllawuve.

³⁹Pa ghukhua susho nike ghenguno pawu timi khunoqono inami lhou mlla chenikeno tipauqou peitha nani. Khunono akukau agigihu tsughi pa ikhilu nikeno panongu gihu nani tipaqo kughape hiyam akiqheulo mulape eno ayeghi kotha pe panongu aghotsu nani.”

⁴⁰Siriya lo akukau ghenguno atsala ashekha ighi nike kupunu sheveke mtsa, Ijip lo akukauno pa leighi nani eno Siriya lo akukauno pa kuka pagho pephe mujo chile nani, aghu kishi khurshi eno zukilu peitha nani. Pano aphughi kutomo amghazu kuqo toi ighino le nani.

⁴¹Pano ashoqhi yeghiqha lepuzu qhethonheno qhethonhe heqhive nani, ikemu aphughi, Edom, Muab eno Amun hipaqoye itshuluve nani.

⁴²Pano ayeghiqha tipaqo leukelo Ijip ghi puxumo nani.

⁴³Ijip lo kusu puakeu kinni, shuna tsandi eno amekusho nhemghaqo pano luve nani. Pano Libiya eno Sudan kuma leve nani.

⁴⁴Tileno asutsa akithe lakhi kipela kudau eno ahuu kudauno ighikeu chiluno ighono msave nani, tileno kumsapu shi aghushi puzu timi kutomo heqhive nani.

⁴⁵Azughi ngo naghuto kuma dolo achineki khile akeno tipa alo pano kukauno ngokepu phikiqo shisuthu nani, ikemu timi lakhi nomu pa kuphukemi kuhano tileno thive nani.