Read Sumi Naga DANEL 3 Bible Online

DANEL 3 - Sumi Naga bible

DANEL 3

¹Akukau Nebukadnezar no shunano ajulho lakhi mla keu akiqhe lau miter mukutsuni, akijelau miter kuthu, ike tipaupe Babilon yeghilo Dura ipikeu bokhulo ghope qhi.

²Akukauno pa qholo kijemi kumtsu palau ighilepi ahza tsuve, kukapumi, ahngqo, pangtong, tsapili jukutsu chekeqo, xakuthami, atsa kukughami eno tinguno alau kijemi kumtsu akukau Nebukadnezar no ajulho mlapuakeu shikimthe keu tsalalo sulepi kusu,

³Kijemi kumtsu shikimthe nikeu alo ighi no ajulho zulo puthugho.

⁴Asutsa ighono mughachhoi shi asheshu, “Ashiayeh kumtsu atsa ajeli pichekemi timi jeli kumtsu

⁵Afuko igha keu nonguno chilu nani, fulili, alebo, akighilebo eno tinguno alau alekiphebo pe alepheke mtsa asheshu nani, tipau sutsa chilu kemtsa nongu kumtsu pishiqhope akukau Nebukadnezar no shunano shikeu julho mllalo.

⁶Khuuno pishiqhope mlla monikeno pa kughape amilo vesuveni.”

⁷Timi, ashiayeh jeli kumtsu, atsa jeli kumtsu afuko ighakeu chiluke mtsa pishiqhope shunano shikeu julho Nebukadnezar no qhi puakeu mllathuve.

⁸Babilonmi khamino Judami shou hipau lono akipimi tsulu kepu adokivi ithuluve.

⁹Panonguno akukau Nebukadnezar vilo hitoi pi, “Akukau pelo axushu peniu!

¹⁰Akukauno ahza lakhi tsukeu alepheke mtsa timi kumtsu pishiqhope shuna julho mlla penikeu shi.

¹¹Eno tilehi khuuno piqhiqhope mllamo nikeno kughape amilo vesuve nikeu shike.

¹²Ike Judami gholo khami nono kishepe Babilon lo akhoto kumlalo ampiu shi apekeqo Shadrak, Meshak eno Abednego, panonguye ozah kutsu hebidevae, panonguye olhou, nono ajulho qhitsukeu zulo pishiqhope mllatsumoe.”

¹³Akukau vilo pike mtsa paye amlo idesheveno pano kuthu akukau zulo saghilopi ahza tsuve.

¹⁴Pano Shadrak, Meshak eno Abednego pano kuthu vilo hitoi pi, “Nonguye ilhou mlla move pikeu chilu anike eno shunano shikeu julho zulo pishiqhope mllamove pikeu hu kuchou kesha?

¹⁵Itehi julo, afuko ighakeu alekiphebo ajeli pe ighakeu sutsa chiluke mtsa pishiqhope ajulho mllalo. Tsala nonguno titoi shimove aye nongu kughape ami kuyiqualo vesuve nani. Alhou kutau nongu xakulupu aghi nani kepi kumsu anikesha?”

¹⁶Shadrak, Meshak eno Abednego pano kuthuno hitoi pi, “Akukau hipatsa loye nilikhi ningukula tsa mu pukaputsa pinishimoe.

¹⁷Nino puluchekeu Lhou ye pano pulo aye ami lono eno okuka zulono nixaphe luve nani.

¹⁸Tsala tipau lono ni xaphe lumove kepushi aghi pimu, akukau noghi thebei ithi aniuno ninguye olhou mllamo nani eno shuna julho nono qhipuakeu zulomu pishiqhope mllamo nani.”

¹⁹Tileno Nebukednezar no axuideve puzu agi huchui pe Shadrak, Meshak eno Abednego pano kuthu gilo jupuku. Pano pawu timiqo vilo thosulo mikulu nguno akutsuniuno alau shi ami shilepi ahza tsuve.

²⁰Pano pawu ghushimiqo dolo ighono subosughi akumtomi vilo pano kuthu kughape aphi au tsugha vetsuno amipholo vesuve lopi ahza tsuve.

²¹Tileno pano kuthu aphi mini kupukulai pe pipeveno aphiau tsughave tsu puzu amilo vesuve.

²²Akukauno ami thosulo nguno akuluu shilopi kehu ami mili apho kije vechighi iqu akeu lono timi pano kuthu kughape vesukeqo ghi amino pitiqhive.

²³Shadrak, Meshak eno Abednego panonguye aphiau tsughape amipho mtalo vesuve.

²⁴Zuleno Nebukadnezar no chuka ithughi puzu akichiqhi ngono pa qholo kijemiqo vilo iniju. “Ninguye timi kuthu likhi kughape amilo vesuke kumo kesha?” Panonguno khochile, “Iyei, kuthuke, akukau.”

²⁵Akukauno iniju, “Tishi aye kishino niye pano bidi ami mutalo alache iqho iqi chekeu ithulu anikea? Panongu phiau tsughapua moe, panonguye kitilamu ami gholo ake mihi amoe, eno panoqo gholo abidiuye alhou lakhi jutoi ithulu anie.”

²⁶Nebukadnezar no ami iqu akeu akulaghilo wuno ipeghi velopi, “Akughushu Kukau Lhou qemi; Shadrak, Meshak eno Abednego ipeghivelo!”

²⁷Panonguno mtazu ipeghive. Kukapumi ahng kumtsu eno akukau qholo kijemiqo kumtsu shekuha ighino kumqope amino pitimono ipeghive keu pano kuthu jua. Panongu philo asamu ghamo, aphi aminighi pitimo eno panongu philo amichhimu munamoe.

²⁸Akukauno pi, “Shadrak, Meshak eno Abednego noqo Lhou shelo, pano kungumi puwu puzu pa pulu chekeqo xapheluve peke. Panongu kuxu puwove tsumu tano panongu Lhou nguno alau kutau zulo pishiqhope mllamopi ino ahza tsu keu ghi lutsu moveke.

²⁹“Ike itehi ino ahza tsu ani. Kiu kiu shiayeh shi aghi namu atsa ajeli kututa picheghi kemi pimu, Shadrak, Meshak eno Abednego pano kuthu Lhou thakeu tsa pikeqo phiau hechhepini pevetsuni eno paki hexapini puhave tsuni. Alhou kutauye hitoi xalukepu kuhae.”

³⁰Akukauno Shadrak, Meshak eno Abednego pano kuthu suqhe kithepe Babilon yeghiqhalo akhoto kumlalo ampemi shiluvepe.