Read Sumi Naga DANEL 4 Bible Online

DANEL 4 - Sumi Naga bible

DANEL 4

¹Akukau Nebukadnezar no asutsa hipaqo kiyepe ayeghiqha lo shiyeh kumtsu, alimi kumtsu eno atsa jeli kumtsu lau kutughu tsu. “Petha lulo!

²Akuka kughushu Lhou no akumzapu, akichiqhi kepu ilau piyesu tsukeu pinike inijulo.

³“Akumzapu Alhou no ipiyesu keu kiutoi kije kya? Pano akumzapu shipe piye keuye kiu toi mutotoi kya? Alhou ye alhokupujulo akukauke, pano tiqhelino tiqheli kuto ayehpe nani.”

⁴“Akuka kilo ngono imlo kiqishi akua kini peitha ghi ilo kughunoshi ache.

⁵Ikemu akuighupu samo lakhi pumolu, zuake lono kungunhetsu lono ithulukeu akumsapuke.

⁶Ino ahza tsukeuno Babilon yeghiqhalo akukau qholo kijemi kumtsu ilau saghi eno asamo kiqi ivilo pitsulo pike.

⁷Tileno auyekujumi, kuduumi, aghahwu kusami eno ayepu kighithimi sasu ighi, tileno ino isamo panongu vilo pikemu akiqi ivilo pilunikemi kuhave.

⁸Pa shelo Danel no ighi (pa je Belthashazar ghi kucheni nilhou je kiqi lono). Akimthe lhou ghungu pa gholo achenike ike ino kiu pumo lukeno pa vilo lhe. Ino pa vilo pikeuno:

⁹Belthashazar, tungkupu tsa kipimi dolo atou, Akimthe Lhou ghungu hu ogholo anipi ino ithi ani eno tuqhou thime kumtsu kighithiuke. Isamoye hike, akiqi kiu keno ivilo pilo.

¹⁰“Ino zuake lono kungunhetsu lakhi ayeghi mtalo asubo ighono kije kusho lakhi ithulu.

¹¹Asubo tipauye ayeghiqhalo timi kumtsuno vezalei ithuluke kutolo alau shi thuu iku atsutsu chokhoive.

¹²Anipaqo ighono juvi eno axathino aloka kumtsu jokha tshunayi pithi eno ayeghiqhalo timi kumtsuno chumu chukhamla kepushia. Aghalo tughashi qono tipau subo kicheqholo zuno akulhoqhi. Aghauqono aloka kumtsulo panongu pusu pesu. Ashi aghau lhoxu kumtsu axathi chumo keu kuha.

¹³“Ino kungunhetsulo ithulu keu kumsuju ghi ake lono kungugha lono kungumi lakhi kutokupui tsukhu tsuvaike lakhi iqi cheghike ithulu.

¹⁴Asutsa ighono mghachhoi asheshu, ‘Asubo hipau yeqhipe alu aluno michethavelo, anika xidive eno axathi sukini qhi khavelo. Asubo qholo tughashi jeli khijehi ngo ani keno hapiye pighivelo.

¹⁵Ikemu ayeghi shou asu zungu likhi ayikighino tshupe qhivelo. Aluzalo awotsanaghu gholo qhivelo. Itehi pa shou atsuzu qi pukughi aghasalo tughashi gholo xu acheuve peniu.

¹⁶Ampe tsuni dolo timi kukumsu kuhaveno tughashi kukumsu pa lolo auvepeni.

¹⁷Hiye tsukhu tsuvai, kutokupui keu kungumi huno xakutha shitsu keu tsake. Tishi pive keu vechewo ayeghi qhalo timi kumtsu pelo akuka kua Lhou ye timi kukaphu shou ghi akuka ani kena ipi ithipeniye ke eno khuu pelo akukau shipeni keno pa gho lono akhoto kumomi shi aghi pimu kishe cheni.

¹⁸“Ino pumo lukeu samoye hike,” ipi akukau Nebukadnezar no pi. “Belthashazar nono hipau kiqi ivilo pilo, igholo akemi alokutsumi lakhimu ivilo pimlaveake, ikemu olikhino ivilo pilu nani kughengu ogholoye Alhou anike.”

¹⁹Tilehi Danel pa je kutau ghi Belthashazar ipi kuche keuye akichiqhiyi kehu atsamu pimono thughuyi ngove. Akukau no pa vilo pi. “Belthashazar, asamo hipau eno pa kiqi pelo okichiqhiyi pekivilo.” Belthashazar no khochile, “Akiqheu, asamo eno pa kiqi pelo oghenguno kumono oghumi sala pumo lukeu shi aghi peniu.

²⁰Asubo hu, chuqu mughai tsutsu chokhoipe akeuye ayeghiqhalo timi kumtsuno ithukulupu shi ake.

²¹Anipaqo ighono juvi eno axathi tile pithi akeu huno ayeghiqha kumtsu loji mukha kepu qheae. Aghalo ashi aghauqono akicheqholo zu eno aghauqono panongu pusu aloka kumtsulo pesuqheke.

²²“Akiqheu, asubo chuqu mughai eno ighono akumtoshi ithulu akeuye no ampeuke. Nono kije shi thuu iku atsutsu toke eno okukano ayeghiqha kumtsu chhitoike.

²³Akiqheu, nono kumsuju ake lono kungumi lakhi kungugha lono iqighino ishipi, ‘Asubo hipau yeqhipe pevelo ikemu asu zungu likhi qhivelo. Ayikichhe kighi kughape abophi lono tshupe qhivelo eno aluzalo aghatsuni gholo tishi qhivelo. Atsuzu pelo timi hipau shou qipuku apelo, eno papelo ampe tsuni tughashi gholo itsu cheuve pelo.’

²⁴“Akiqheu, akiqiye hike, Akughushu Lhou no olau kiu ighi nani keno tipau pephepe opiye anike.

²⁵Timi gholono ohaveno aghasalo tughashi gholo acheuvepe nani, ampe tsuni dolo amshitsu toi atsuni muza chughi acheuvepe nani, eno ashou zukelono atsuzuno oshou iji ikughi nani, tileno nono Akughushu Lhou no timi kukaphu kumtsu shou ayehkipeu kena ipi ithi nani eno pano khuno tsuni shi keno tipano kishelu cheni.

²⁶Kungumi huno asuzungu likhi qhivelopi ahza tsuke. Tipau kiqiye Alhou ye ayeghiqha kumtsu shou akukau kepi nono ikhiluaye noye akiniu ghi kani aphi.

²⁷Tishiaye, akiqheu, ino okutsu keu tsa inilo eno axine shikithe akevino kiuno achipi keno tipau shilo eno kumlhomi kimiyelo, tishi keuno okuxu akivipu shilu nani.”

²⁸Akukau Nebukadnezar lau hipaqo kumtsu shikupuve.

²⁹Aqhi chighi kini thiu kughono pano Babilon lo akukau ki kunguu ilichekeno,

³⁰pano pi, “Babilon jukelo kiu toi kije eno juvi kela! Aphughi kiqhe hipauye ino mlake, hileno ikuka, ikumto ijekipi akughushu pephe piyeniyeke.”

³¹Pa mlo lono kumsu akeu pa kichi lono ashou piphe ipeghi mphi lono, kungugha lono asutsa lakhi ighi, “Akukau Nebukadnezar, ino pi akeu inijulo, okuka hu itehi olauno ikhiluve tsuae.

³²Noye timi qo-aho gholono ohapheveni ake, aghalo tughashiqo gholo acheuve nani eno ampe tsuni dolo amshitsu toi atsuni muzachughi itsucheuve nani.”

³³Atsa hu itheno shikupuve. Nebukadnezar ye timi gholono have puzu amshitsu toi atsuni muzachughi wuve. Atsuzuno pa shou qipuku, pasano aluqu mhi toi kushuwo shi thuwuve. Pau mutsuno aghau pukhu mutsu toi kushowo shive.

³⁴Kughono ampe tsuni tove keno akukauno ishipi,”Ino kughono kunguu atsutsulo jukeno, ilokutsu ide ighive. Tighenguno Akughushu Lhou oje sheqhe tsue eno agigihu aje kipi kumtsu kughape tiqheli tiqhelilo achekeu tsuke.” “Pano ashekha kuha ayehpeni, eno pa kukaphuye tiqheli tiqheli kuto ache nani.

³⁵Ayeghilo timiqo jukelo ame kuhaghi ithulu acheni, Kungughalo kungumi eno ayeghi lo timi kumtsu pa ghakusu qholo acheni. Khunomu pa mujochile mla, pano kiu shive keno kiu shiye tishi vekea ipi iniju chile mla.

³⁶“Kughono ilokutsu ilau ide ighive keno, agigihu, akuka eno ajekipi kukaphu kumtsu ilau ide ighive. Igholo iwu kijemi kivimi kumtsuno panongu mlo kiqi shi ni ikhilu ayehkipe kuka hu azuu nguno akiqheu pe itsuve.

³⁷Ni Nebukadnezar no, akishe, agigihu pe Kungughalo kukau tsu ani. Pano kiu mlakeno kumtsu amikucho eno achipike eno pano aqhekuzami kughape kumtsu nguno aghulou shive tsukepu kuka ani.”