Read Sumi Naga DANEL 5 Bible Online

DANEL 5 - Sumi Naga bible

DANEL 5

¹Kijili lakhi akukau Belshazar no aghulhu kije lakhi shikeulo kijemi 1,000 kusu eno panongu kumtsa aji shoa.

²Kughou panonguno aji sho akeno, Belshazar no shuna ngo tsandiyi no shikeu ajukhu eno akhuqo papu Nebukadnezar no Jerusalem chineki lono ghepe ighikeu sughilopi ahza tsuve. Akukauno pawu kijemiqo, pa nipuqo eno pa lojilimi pelo tipau lono aji sho penike ghenguno sughilepive.

³Paikhavi lono akhu ajukhu sughitsuke tileno panongu kumtsu shoa.

⁴Eno shuna, tsandi, alazayi, ayi, asu eno atuno shikeu lhou akishe tsuthuve.

⁵Akuluqo lono akuvu ipeghi keu huno shishe vuqai yepe akeu alo, zuleno timi-u lakhi ipeghino akukau kilo atu tozulo yethuve. Akukauno tile yepuku akeu ithulu.

⁶Paye msakeuno phalayive eno pa khonheno thuthushive.

⁷Timi khami muta wuno kuduumi, aghahwu kusami eno aqhi ayepu kighithimi kusaghi tsulopi asheshu. Kughono panongu ighikeno akukauno panongu vilo pi, “Nongu gholo khuuno hipau yepua keu philuni keno eno tipau kiqi ivilo piluni keno akuka phi pa pipeno shunano shikeu yila pe agigihu kiqi shi pa ku-olo khatsuni eno ikukaphulo akuka tsu puakeqo dolo akuthuu shipeni.

⁸Akukau qholo alokutsumi ighi kemu khunomu yepuakeu phimlave momu akiqi hu pesu akukau vilo pimlave.

⁹Amlo ghimeno akukau Belshazar ye ighono phalai aji kuha kitheve eno pa qholo kijemiqono kiu shitsu masakeno akukumsu ghi kuhave.”

¹⁰Akukaliu pazano tilehi akukau eno pa qholo kijemino kuptsa akeu chiluveno aghulhu alo iloghi. Lino pi, “Akiqheu, opelo axushu peniu! kimiyeno omlo ime kutu kevilo eno amlo kijeshilo.

¹¹Oyehkipe qholo akemi timi lakhi ani pa gholo akimthe Lhou ghungu anike. Kughono opuno ka akeno timi tipauno alokutsu, akighithi eno Alhou kighithi kutho toi keu kichepiye luke. Akukau Nebukadnezar, opuno timi tipau pesu ashe azuu ghili piche kemi, kuduumi, aghahwu kusami eno ayepu kighithimi kumtsu shou atou shivepeke.

¹²Timino shilu chemo keu shikulupu, alokutsu, asamo pikulupu, ahole tsa kighithi eno tuqhou thime kighithi pikulupu anike, ike Danel hu kusaghilo, khuu Belthashazar ipi akukauno aje kukideve tsukeno, hipaqo kiqi kumtsu kughape ovilo pive tsu nani.”

¹³Paikhavi Danel sasu akukau zulo ighi, tilehi akukauno pa vilo pi, “Ipuno akukau shi ake ghuloki lono Judami hapheve kemi Juda lono sasu ighikeu Danel hu no kesha?

¹⁴Akimthe Lhou ghunguno ogholo acheni ipikeu ino chiluve ake eno tishikeu lono shikulupu eno akighithi alokutsu anike.

¹⁵Alokutsumi eno kuduumi sasu ighi puzu yepua keu phi pesu akiqi ghi hephope ipiyelopi kemu panonguye kiumu phuphe mlave.

¹⁶Itehi ino chilu keuno noye kusupuakeu kiqi ghi ithuluno pikulupu anipike. Tsala nono hi yepuakeu philu eno tipa kiqi ivilo pitsulu aye, okughape akukaphi puu puzu shuna yila pe agigihu kiqi oku-olo khatsu puzu akukaphulo akuka tsupua keqo dolo akuthuu shive peni.”

¹⁷Danel no khochile, “Agho tipauye osalashi qhipuavelo momu timi khami tsuvelo. Ino phipe akiqheu piyeni kiu yepuani keno eno kiu kiqi kela tighi ovilo pitsuni.”

¹⁸Akughushu Lhou no opu Nebukadnezar kughape akukau shitsuke eno angu agha akiqheu tsuke.

¹⁹Pa kuka ighono kije kushowo akiqheu kehu ayeghiqhalo timi kumtsu, shiyeh kumtsu eno atsajeli kumtsu msa khokhoshi pa qholo xu acheke. Tsala pano timi khami heqhive nishi aye pa gho shi heqhive che, timi khami puxuve nishimu tishi luche, pano peqhe nishi pina, piqive nishimu tishilu che.

²⁰Ikemu pano qhezave, agholumo eno ayikusa shive keghenguno akukau lakhu lono pa hapheveke eno alokughuno agigihua puhave.

²¹Timi qo-aho gholono pa hapheve eno pa kukumsuye tughashi kukumsu toive. Paye gadahaqo gholo ngono amshitsu lakhi toi atsuni muzachu cheuve eno khalau zupuzu kiu nomu pa susho kepu kuhano atsuzuno pa shou ikughi. Ashekha lono pano Akughushu Lhou no timi kukaphu kumtsu shou ghakusuu eno pano tsunishi kinimi tsuchenipi ikhiluke.

²²“Ikemu noye panu lakhi shino akumtsha akughuvu kuhake azuu kiu shive keno tipaqo ithi pulaghi.

²³Nono kungughalo kuau hebide ghi achineki lono sughikeu ajukhu eno akhuqo peithake. Nono owu kijemi, onipuqo eno olojilimi sasu tipau lono aji sho eno shuna, tsandi, alazayi, ayi, asu eno atuno shikeu lhou akishe tsuveke, tipaqo lhouye ithulu momu chilu chemo eno kiumu ithi chemoke. Ikemu noye Alhou khuu okuxu puatsuni pina, puhave tsunipimu pa ghoshi cheni keno eno thime jeli kumtsu shou ampeu Alhou keno pa gihumoveke.

²⁴Tighenguno Alhou no atsa yetsu peniye a-u puwu tsuke.

²⁵“Atozulo yepukukeu tsaye hike, ‘Akikihi, akikihi, akimighi, akikije.’[1]

²⁶Akiqiye hike: Akikihi, Alhou no okukaphu atsala kihithape qhive tsuae eno ashekha shivetsu ae.

²⁷Akimighi, okuka pe ahulo suno mighiju kelauye ahu tomo sheve aghike.

²⁸Akikije, okukaphuye kijepe Mediami eno Persiami tsuvae.”

²⁹Belshazar no mutazu aqemiqo vilo akuka phimini Danel pepipeno shuna yila pesu agigihu michi pa ku-o lo khatsu lepi ahza tsuve. Eno pa pesu akukaphulo akukape akemi gholo akuthuu shiluvepe.

³⁰Tipaji no Babilon lo akukau Belshazar heqhive.

³¹Mediami Darus khuu apunumpe lhotsugho kini shiakeno pano pa kuka suxaluve.