Read Sumi Naga DANEL 6 Bible Online

DANEL 6 - Sumi Naga bible

DANEL 6

¹Darus no pa kuka qhalo hiyam peitha penike ghenguno ahng 120 susu nike xathaluve.

²Tipau shouno, Danel eno kutami kini kishepe ahng kumla jukutsu peni keu eno akukau kukumsuqo peitha tsupe nikeu shive.

³Ado kushowo kumphi lono Danel ye kutami jukutsu akemiqo eno ahng qo nguno akiviu shi mulalu akeu piye luve, kughengu paye ighono shitsami kehu, tileno akukauno pa pesu akukaqha kumtsu shou akijeu shipe nikeu kumsuve.

⁴Tileno kutami jukutsu akemi eno ahngqo kuqhano Danel yehkipelo akipimi phu nikeu pukaputsaju kemu akipimi kiumu phumlave, kughengu Danel no amikucho akikhi timi kehu eno pulube kulupu kehu.

⁵Panongu dolo ishi pikile, “Pano puluchekeu achineyeh kughape pa thenike kumoaye Danel kipimi shitsulukepu kiumu phuluni chemovae.”

⁶Tighenguno panonguno akukau sasu kuptsa niye wuno ishi akukau vilo pi, “Darus akukau, akiqheu, axushu peniu!

⁷Ningu kumtsu okukaqholo Jukutsu chekemi, ahngqo ahng kukuphuu eno tinguno alau kijemiqo pulokuqhaveno opelo ahza lakhi mukamghai bethatsu penishi ani. Ahza tsulo, timi kumtsu atsala shighi dolo no Akukau vilo kumo aye kutami lhou vilo mu timi vilomu inikhu pekevilo. Ahza hipau timi khuuno hexaveni keno pa kughape abongushuu khakuthabolo ikhisuve nikeu shilo.

⁸Tighenguno akiqheuno ayezah hitoi mlano oje suveno pekulhavelo. Mediami eno Persiami yezah ye khilemu kililu chemoke.”

⁹Darus akukauno ayezah lo jemchi yebeve.

¹⁰Kughono Danel no ayezah pephevapi chilu keno paye akilo wove. Aki bokutha kunguulo alashe lakhi Jerusalem kudau she puache, tipaulo azuuno kiutoi shichekeno titoi qhoqhunhepe atsalalo ghuthu kuthu alashe khaqhiveno Alhou vilo inikhu ache.

¹¹Kughono Danel ghumi qono Danel no Alhou vilo inikhu akeu miqe luve keno,

¹²panongu kumtsu hekutsupe Danel kipimi akukau vilo piniye wu. Panonguno pi, “Akiqheu, nono ahza lakhi mlakeuno atsala shighi dolo timi khuuno onguno alau alhou kutau momu timi kutami vilo inikhuni keno abongushu bokutha alo abongushu chhitoi suno tile vesuveni keushi ke kumo kesha?” Akukauno khochile, “Iyei, ahza mukamghaike lakhi Mediami eno Persiami yezah kilimula keu tsuke.”

¹³Tileno panonguno akukau vilo pi, “Danel, Juda lono haphevekemi lakhi no agigihu otsumono eno oyezah lumoveno paye atsalalo ghuthu kuthu akighini shi ani.”

¹⁴Akukauno kughou hi chilukeno paye ighono amlo kupunaveno Danel xaphe nikeu laghi phuju. Tsukinhe ilomo kekuto pukaputsa jua.

¹⁵Tileno timiqono pa lau ide ighino akukau vilopi, “Akiqheu, nono ithi anike, Mediami eno Persiami yezah kiqi loye kiu yezah mlave akeno tiye khilemu kililu chemoe.”

¹⁶Tileno Danel tsughape ighino abongushu kilo vesuvelopi akukauno ahza tsuve. Pano Danel vilopi, “OLhou khuu nono puloniqhiyi huthu acheni keno pa pelo oxalupelo.”

¹⁷Atu pesu abongushu ki mikeveno timi khuu pelomu Danel khaqhiphe pemoniye akukauno pawu mekhamichi eno pa qholo kijemiqo wu mekhamichi pe atulo amichishive.

¹⁸Tishiveno akukauye idesu pa kilo wove eno alibe mu chumo, pa loshipivi tsupe nikeu ghi pulomo eno tipaji zuhumo mitheve.

¹⁹Inaqhe vuipeghi kemtsa akukau no ithughi puzu mta posu abongushu kilo ighi.

²⁰Kughono tipau alo ighikeno, pano khekulhoshi ku, “Akuxupu Lhou qeu Danel! Nono pulopiniyi huthu chekeu Lhou no abongushu zulono oxaphe pe anima?”

²¹Danel no khochile, “Akiqheu, O pelo axushu peniu!

²²Alhou no pawu kungumi puwutsu puzu abongushu baxa khave tsu keu lono panonguye ighuza mlaveke. Pano ixalu keuye ikipimi kuha pikeu pano ithi puqai ake, tilikhi kumono niye ozuloghi pimipuamo pikeu pano ithi ake, Akiqheu.”

²³Akukauye alovi sheveno abongushu kilono Danel sunhephe luvelopi ahza tsuve. Tileno panonguno Danel sunhephe pe jukelauye kiu lomu ghuza puaghimove, kughengu pano Alhou shou pulube acheke.

²⁴Tileno akukauno timi khunoqono Danel shou athe shino pa kipimi shi sughi tsukeno panongu kugha lepi ahza tsuve eno panongu gholo anipu anuliqo kumtsu kughape abongushu kilo vesuve. Panongu kughape vesukelo abo tomono kunguu chephi lono abongushu qono muxape panonguqo ghi kubutha pinivetsu.

²⁵Tileno akukau Darus no ayeghiqhalo ashiayeh kumtsu, alikumtsu, atsajeli kumtsu lau asutsa yepe tsupuwu. “Petha lulo!

²⁶Ikukaqhalo timi kumtsuno Danel Lhou musa penike eno gihu penike ino ahza tsu ani. Paye akuxupu Lhou, pano ashekha kuha ayehpe nani. Pa kukaqha khilemu shipusamo nani. pa kukaye ashekha shive mla nani.

²⁷Paye xakuluu eno ikhiphekuluu, pano kungughalo ghi eno ayeghi loghi akumzapu, akichiqhiyi kepu shilu acheni. Pano abongushu kichi lono Danel xapheluke.”

²⁸Danel ye Darus kuka ghulokilo eno Persiami Cyrus kuka ghulokilo ajekipi shi xucheke.