Read Sumi Naga DANEL 7 Bible Online

DANEL 7 - Sumi Naga bible

DANEL 7

¹Babilon lo Belshazar no kalukeu mpe atughiulo ino asamo lakhi pumolu eno tipajino kungunhetsu lono ithulu. Ino asamo yepe qhive,

²eno tipaji kiu ithulu keno tipauye hike: Aqha kumtsu lono amlhu ipeghino azughi tukucho thuve.

³Azughi lono tughashi kuloghi bidi ipeghi, panongu lakhimu kimihimo mithe.

⁴Atughiuye abongushu toi ithulu, ikemu aluqu chishibo pu. Ino tipau jupulano, achishibo ita ikiqive. Tughashi khape puthu puzu timi toi puthughovepe. Timi kukumsu pa lolo suvetsu.

⁵Tughashi akiniuye ava toi athiu pukhu lono puthughope akeu ithulu. Akuchughi kuthu pahuno mikipe ae eno asutsa lakhino pa vilo pi, “Wulo eno ashi chukulu thaqhu chulo.”

⁶Ino juake dolono tughashi kutau lakhi ipeghi. Tipauye angushu lakhi toi ithulu, ikemu pa mqalo achishibo bidi a, tipaqo aghau chishibo toi eno akutsu bidi pua. Tipaulo akuka akeu ithulu.

⁷Ino juake dolono tughashi abidiu ipeghive. Tipau ighono akuka kua, akuighupu, akumsapu. Pahuqo ighono kije ayino shikeu huno lhoxu heqhi eno tipaqo nedaqhi. Tipauye tughashi kutauqo toimono akibo chighi puake.

⁸Ino akiboqo ju akelono akibo aghulo lakhi kutau gholo ipeghi keu ithulu. Tipauno tilehi azuu akibo akeqo gholo kuthu fuchhevetsu. Akibo tipaulo timi nhethi eno akichi lakhi puno tileno aqhekuza tsa pia.

⁹Ino ju akelono, akuka lakhuqo kutope qhiwo. Alholo acheghi keu lakhi huno akuka lakhuqo dolo lakhilo iqave. Pa phimini murasu toi metsughoi, pa sano amhiyeho akiviu toi, pa kuka lakhuye ami toi keu yeghikilu pukhuno mutu qhepe vuqai iqua.

¹⁰Tipau lono ami ghokiti qoipeghia. Tilehi timi qhethonhe kutomo pa mllanike ngoa eno timi 100,000 shou pa zulo puthughoa. Aki tipaulo akumlla huthuve eno kakuqo lhaphepe qhi.

¹¹Ino ju akelo itaghi akibo aghulo lakhino aqhekuzashi pikeu chilu. Ino jupulano tughashi abidiu hu heqhive, eno pasukumo khape amilo vesuveno pitive.

¹²Tughashi kutauqo kuka luvetsu ikemu panonguye ado kihitha pe qhitsu keu kutolo likhi xu apenikeu shi ahza tsuve.

¹³Kijiliu ino kungunhetsu shi ake ghulokilo, timi ju kimihi lakhi ithulu, khungkusuno kuzuphope puzu ikudau ighi, paye alholo acheghi keu kudau wuno pa zulo ngove.

¹⁴Akuka, agigihu eno ayehkipe kuka pe pa tsuve, ayeghiqhalo timi kumtsu, shiyeh kumtsu ali kumtsu eno atsa jeli kumtsu paqe peniye ke. Pa kukaye alholo acheni keu eno pa kukaqhaye khilemu ashekha shivemoe.

¹⁵Kungunhetsu ithulu keuno ipelo thughuive pe, shishe imlolo kupunaqhi awuve.

¹⁶Puthugho akeu lau ino wuno pa vilo kishekulushi ivilo pitsu lopi iniju. Tileno pano akiqi ivilo pitsu.

¹⁷Pano pi, “Tughashi kuloghi hipano bidiye akukaqha bidi ke, ayeghiqha hipaulo ipeghini kuauke.

¹⁸Akughushu Lhou timiqono ayehkipe kuka ithuluveno alholo pecheuve nani.”

¹⁹Tileno tughashi abidiu kiu lonomu kutau tughashiqo mihimo keu ghili ino alau ithinishia, tipau hu kumsapu tughashi alazayino au mutsu shipu, ayino ahushipu puzu lhoxu pa zulo wovenikeqo heqhi eno hedave ake.

²⁰Pa kutsulo akibo chighi akeloye akibo lakhi athiuno ipeghi keu huno kutau akibo kuthu helaqhive tsu keu ithini shia. Tipau anhethi kutomo eno akichi lakhi pua tileno aqhekuza tsa pia. Tughashi kutauqo nguno alau jukumsapuke.

²¹Kughono ino ju akeno akibo tipauno Alhou wu timi sasu aghushino toluve.

²²Tileno alholono acheghi keu lakhi huno ipeghino Akughushu Lhou wu timi saphu ghi atsa kugha xatha vetsu. Alhou wu timiqono ayehpe kuka ithulu nikeu do tove.

²³Akiqiqo hitoi itsuke: “Tughashi abidiuye akukaqha abidiuke ayeghi hipaulo ipeghini kuau akukaqha kutau toimo nanike. Pano ayeghiqha kumtsu puhave tsu nani eno pa pukhuno qodavetsu nani.

²⁴Akibo chighi huye kukami chighi akukaqha tipaulo ka nikeu ke. Tipashelo kukami kutau ipeghi nani. Paye azuu kukamiqo toimo nani eno kukami pano ikhi qhive nani.

²⁵Pano Akughushu Lhou ghobide keu tsa pi nani eno Alhou wu timiqo ghime nani. Pano panongu chineyeh eno pinyichekeu kilivetsu nike pukaputsa nani. Eno Alhou timiqo pa kuka qholo ampe kuthuno tuxa ngo nani.

²⁶Tileno kungughalo kughaki lono atsa kugha huthuve, pa kuka ikhiluvetsu eno qhoi puhavetsu.

²⁷Ayeghilo akuka kughushu ajekipi kumtsu kughape Akughushu Lhou wu timiqo tsuve nani. Panongu yehkipe kuka ashekha kuha nani eno ayeghilo kukami kumtsu pa huthu pa gholu nani.”

²⁸Ino yepe qhikeu hino ashekha. Niye akumsano ajimu kuha ketoi phalaive eno tipaqo kumtsu imlolo qhiluve.