Read Sumi Naga HOSIYA 2 Bible Online

HOSIYA 2 - Sumi Naga bible

HOSIYA 2

¹Ikemu nokusami Israilmi vilo “Alhou wu Timiqo” eno “AMPEU no kimiyekeqo” ipi pikilelo.

²Itianuliqo, ozaye inipu kumovea eno niye likimi kumovea kemu li putsatsulo. Lino kutuqha eno salha shupu chekeu qhivelopi li putsatsulo.

³Lino shichekeu qhivemo aye li punu ke tsalalo aphikumsake toi ino li phimini xaluve tsu nanike. Ino li pesu asutsuni ipeghimono, qhayikeu yeghi toi kughulhovetsu nani eno liye tughuthike launo thive nani.

⁴Li tianuli ghi ino kimiyemove nani, panonguye asalha tianuli ke

⁵kughengu panoqo pazano salhashupuke eno kujomza kepu ghushoghili shike. Lino ishi pike, “Niye ilojipumi khunoqono chuqu kusho itsu cheni, akuluphi, phepheyikeu phi itsu cheni eno oliv teli ngo atsayiji itsu cheni keno tipaqo lau wunie.”

⁶Tighenguno niye asahupho pesu li putukhani cheni eno aliwo shipesu li lakhani cheni.

⁷Lino alojipumi hawu nani ikemu panoqo hamla nani. Lino panoqo phuju nani ikemu phumla nani. Tithiuno lino ishi pi nani, “Niye ikimi atughiu lau idewoni cheni, niye itehiye puzuu pavi acheke.”

⁸Ino athi, atsayi ji, oliv teli, tsandiyi ngo shunayi kumtsu tsuno lino tipau pesu Baal, mlla chekeu liye khilemu ithi tsuni chemoe.

⁹Tighenguno ghile ghulokilo niye athi ngo atsayiji ino kumsagho tsuchekeu luchileve nani eno li pelo umini peniye akuluphi ngo phepheyikeu phi tsupuakeu luchileve nani.

¹⁰Ino li lojipumi zulono li phimini xalevetsu nani eno khunomu iu lono li xaphelu kepu shimo nani.

¹¹Lino tiqhetini tsala pinyi chekeu ngo, ampelo eno aqhilo tiqhetini tsala ikhiluchekeu eno Sabat pinye pinichekeu, lino achineyehlo kuhokumqo chekeu, hipaqo kumtsu ino lakhavetsu nani.

¹²Lino alojipumi gho shikeu ghenguno panoqono li tsukeu tsayibo ngo khughuthibo ino kutsalevetsu nani. Ino li tsayilu ngo axathili pesu agha kughulhovetsu nani, tughashino tipaqo shipusave nani.

¹³Lino Baal lau axokutsungu pitikumnani ye ikumsumave keu do ghenguno eno li lojipumi hasusu wuniaye achiku achipu pepukeu ghenguno ino li ghimeqhi nani. AMPEU no pike.

¹⁴Tighenguno ino itaghi asayeqha lo li sasu wuni cheni; tilauno kikimiye tsa pesu ino li putsaqhi kitheni cheni.

¹⁵Ino itaghi atsayilu li tsuchileni cheni, lino achekeu hu eno Akupuna Khila pesu lajupu hukikha lakhi shitsu nani. Lino lhothemi shiakelo, tiye lino Ijip lono ipeghike ghulokilo iputsa ketoi lino tilauno itaghi iputsa chile nani.

¹⁶Tithiuno lino itaghi ivilo li kimi kepi pi nani, liye khilemu ipesu liwu Baal kepi pimove nani.

¹⁷Niye li pelo khilemu Baal jeku kithe move pe nani.

¹⁸Tipa ghulokilo ino tughashi ngo aghau kumtsu sasu puloshoqhi lakhi shi nani, tishianguno panonguno iwu timiqo shipusamo nani. Ino aghakhu lono aghushi nanu, azutakihi asuzu ikhivetsu nani eno iwu timiqo pelo alokughuno eno ighukepu kuhano xulupe nani.

¹⁹Israil, ino opelo inipu shipeni; niye kuchou eno amikucho shini; Ino lhokta kikimiye ngo kupuqhiyikeu otsuni, eno noye alhokupujulo iwu shini.

²⁰Niye ishoqhi qhini eno opesu iwu shini, eno nono ipesu AMPEU kepi kighithi kileni.

²¹Tipa ghulokilo ino iwu timi Israilmi kighini khochiletsuni, ipi AMPEU no pi.

²²Ino ayeghi shou tsutsughu ghuqhipe nani, ayeghino athi atsayithi eno oliv lhoipeghi tsu nani.

²³Ino aghakhulo iwu timiqo qhiwo nani eno panoqo kinikulu shitsu nani. Khunoqo vilo “Kimiyemoke” ipiche keno tipaqo lau ino kikimiye piye nani, eno “Iwu Timiqo Kumoe” ipiche kemiqo vilo, Ino ishi pinani, “Nonguye iwu timiqoke” eno panonguno, “Noye niLhouke” ipi khochile nani.