Read Sumi Naga HOSIYA 4 Bible Online

HOSIYA 4 - Sumi Naga bible

HOSIYA 4

¹Hipa ghakhulo kughuna akemiqo shou AMPEU no ngukukepu lakhi sughini cheni. Israilmiqo, pano kiu piani keno inijulo: “Aghakhu hipaulo amikucho momu kikimiye kuhake eno timiqoye niye Alhou kepi ithitsu amoe.

²Panonguno tushoqhi cheni eno tipaqo kubove cheni; panonguno miki, ghiqhi, puka eno salha cheni. Heqhi buqhi keuno alaushi ani eno ghiqhi heqhikeuno ghiqhi-heqhi pape auvae.

³Tighenguno aghakhuye qhaive nani eno tile xuaghi keu kumtsu thikhave nani. Lhoxu jeli, aghau jeli eno akha jeli kumtsu thive nani.”

⁴AMPEU no pi, “Khuu pelomu timiqo nguku momu panoqo sakiyi pekevilo; ino muchho akeuye nongu achinemiqo shouke.

⁵Puthopucho nonguno kupuxalu ani eno tungkupumi ghi nongu nguno akiviu kiumu shiamoe. Niye nongu paza Israil kutsaveni cheni.

⁶Iwu timiqo puhave nikeu shivae kughengu panonguno ni ikhilumoke. Nongu achinemiqono ni ikhilumoe eno ino kutsupiyekeu milive, ikehu ino nongu milive eno nongu nuliye ichinemi shi nikeu ino panoqo ikhilu move nani.

⁷“Nongu achinemi khijehi kutomo shiveni keno nonguno ishou axine alau shi cheni, ike nongu gigihupu pesu nongu kukujopu shitsu nani.

⁸Iwu timiqono axine shikeu lono nonguno kinimi shiluve ani ikehu nonguye panoqo pelo alau alau axine shipenishi cheni.

⁹Timiqono aghime sholukeu qhemi nongu ghi aghime sholu nani! Ino nongu ghimeqhi nani, eno nonguno alhoksa shikeu lochilepe nani.

¹⁰Aghashipe mllakeulo nolikhi nosaje nonguno chu nani ikeghi muzuthi nani. Nonguno lhokighishepu lhouqo mlla nani ikemu atianuli kuha nani kughengu nonguno kutau lhouqo papeniaye ilauno tsughusu wuveke.”

¹¹AMPEU no pi, “Atsayiji akiye eno akitheno iwu timiqo lokutsu xulepuwuvetsu anie!

¹²Panonguno asu tachu lakhi launo piyesukeu khuju cheni! Asuta lakhino panonguno kiu ithi nishi keno panoqo vilo pitsu cheni!Panonguye iqhiveake. Totimi lakhino kutuqhalimi shiwuveke toi iwu timiqoye kutau lhouqo lau pano pesu tsuvae.

¹³Naghuto kutsuqalo achine-alo panonguno lhoxu heqhipe mlla cheni eno atoghilo chuqumughai eno sukhosuzai keu suboqo qholo panonguno tsungquikeu ta pitikumna cheni kughengu asubo kicheqholo aloponyi kehuke! “Tishikeu lono nonga noqoye kutuqhalimi shi peithauve eno nomukishiu noqono salhake.

¹⁴Ikeghi niye panoqo ghimeqhimoe kughengu nongu ampino achinekilo kutuqhalimi sasu wuve cheni eno nongu kumtsa wupuzu nonguno asu-atu lau lhoxu heqhipe mlla cheni. Ahole lakhilo piketoi, ‘Alokutsu kuhakemi timiye shipusa piniyive nani.’

¹⁵“Nongu Israilmino ilau pichebemla keu shiaghie pinamu, Juda pelo tipaphi shi kuqupe kevilo. Gilgal momu Bethel lo mllawu kevilo momu tilau akuxupu AMPEU jelono ashoqhi shikevilo.

¹⁶Israil lo akemiqoye gadahatsu toi kuthoviloke. Niye kishi puzu atsuni kiviqalo bheritiqo toi panoqo lojiluni kya?

¹⁷Israil lo akemiqoye ajulho shisukeuno shikughuzu pesu ani, panoqo pelo pano ghoshi wuve pelo.

¹⁸Atsayiji shishe shove kethiu panonguye kutuqhakeulo azukuvu shi cheni; agigihupu nguno kujomzakeu pavi cheni.

¹⁹Amlhuno fupewuve keshi panonguye xapuwuve nani eno panonguno asu-atu lau heqhipe mlla chekeulo jukove kepu shi nani.”