Read Sumi Naga HOSIYA 7 Bible Online

HOSIYA 7 - Sumi Naga bible

HOSIYA 7

¹“Ino Israil lo iwu timiqo shipiviniye eno panoqo pelo itaghi kinikulu shipenishi kelauye, niye panoqono kixikila kumla shikeu eno panonguno alhoksa shikeu likhi ithulu ani. Panonguno lakhino lakhi pishiqhikile; panonguno aki-xu ilo puka; eno alaghilalo heqhino suxaluke.

²Niye alhoksa hipaqo kumtsu kumsuchilelu nanike pi panonguye kumsumlae; ikemu axineno panongu suhope akeu niye tipaqo ithumlavemoe.”

³AMPEU no pi, “Timiqono pano lhoksa kukughu pesu akukau ngo pawu kijemiqo pishiqhike.

⁴Timiqoye kumtsu ghano kimthikile eno akushu akumqhoke. Panonguno kimthikile keuye amiphokilo ami kuchughei puzu ashokishiuno asho kunulumoke kutolo chixe kuthomono akeu toike.

⁵Akukauno tiqhetini lo alokivishi ake tsalalo timiqono akukau ngo pawu kijemi aji pesu shokumzu eno shikughuzuke.

⁶Iye panonguno heqhi nike kuchughu keuye amiphoki toi panoqo pitipuzaqhike. Puthotsu panongu xu kighideye kuchughei eno inaqheno tipauye ami iqu ipeghi cheni.”

⁷“Pano mlo kighide kumqho lono panonguno ayehkipemi ghiqhive cheni. Panoqo shou kukamiqo apasushi ghiqhi pithive, ikemu milakhi nomu kuphu penike ivilo khumoe.”

⁸AMPEU no pi, “Israil lo akemiqoye ashopa xukidemokeu lakhi toike. Panonguno ashiayeh kutami panoqo suhupe akemiqo shou pukhupe acheni.

⁹Inaghami shou pukhukeu lono panoqo kumto musulukhave keu panonguye vethalumoe. Panongu tsalaye kihipe qhivae ikemu panonguye tipaumu ithi amoe.

¹⁰Israil lo akemiqo qhekuzano panoqo shou ighamuku auvae. Panoqo shou thwokha jeli shive kethiu ghi panonguye ni, panoqo Lhou AMPEU lau xa ideghimoke.

¹¹Israil ye munamghaikeu eno kumsukulu kuhakeu miqhedu lakhi toike; liwu timiqono atughushi Ijip vilo akukuphu khu eno tipathiuye Asiriya lau pove!

¹²Ikemu ino akhame lakhi qhape qhi nani eno panonguno wuche kelono aghau toi panoqo meluve nani. Panonguno alhoksa kumla shikeu ghenguno ino panoqo ghimeqhi nani.

¹³“Panoqoye ahasapuke! Panonguno iqhive puzu isasu kumjo ani. Panonguye kutsave nani. Niye panoqo xalunishi akemu panonguno imllakeuye kichileke.

¹⁴Panonguye amlo tsuqhiyi ivilo khuinimoe ikemu Alhou mlla chemo kemi toi iluqino huhushi igha cheni. Panonguno athi ngo atsayi ji ghenguno inikhu aye Alhou mllachemo kemi toi pano likhi pano hethapinyi cheni; panonguye isasu kumjo acheni!

¹⁵Ino panoqo sasu iqhoghino shikumtotsu ke ikemu panonguye ishou alhoksa kuchughuke.

¹⁶Panonguye ilauno tsughususu akuka kumto kuhakeu lhou lau wuve acheni. Panonguye asuzu kughuho lhoksa toi pukhubemlake. Panongu sakiphemiqono aqhekuza tsa kipi ghenguno panonguye ghuyi kithi sholu nani eno Ijipmino junuqhi nani.”