Read Sumi Naga HOSIYA 9 Bible Online

HOSIYA 9 - Sumi Naga bible

HOSIYA 9

¹Israil lo akemiqo, ashiayeh kutamiqo toi ahukulushi tiqhetini shi akevilo. Nonguye nongu Lhou launo tsughusu wuvae eno pa lau amikucho kumo shiauvae. Kusalhami toi aghakhuqha kumtsulo nonguye Baal lhou lau nolikhi no-jesuvae eno pano athi pesu ame shi-ghi nongu tsukepi nonguno kumsuchekeu alokutu acheni!

²Ikemu paikhavino nonguye athi ngo oliv teli lukumkha shimove nani eno atsayiji kuhave nani.

³Israil lo akemiqoye AMPEU yeghilo ngopemove nani ikemu Ijip lo idewove kepu shi nani eno mithemo keu chuqu Asiriya lono chu nani.

⁴Inaghami yeghilo panonguye atsayiji pesu AMPEU lau akumllagho tsulukepu shimo nani momu lhoxu heqhipe pa lau sughi mla nani. Khunoqono panoqo chuqupu chuni keno kumtsu kitiqeve nani, tiye akumo shiqhokelo chuqupu toi nani. Tiye panongu khuava ghapiqini keulo likhi peitha nani; tipaqo gholo lakhimu AMPEU chinekilo akumllagho shi puwulumo nani.

⁵Kughou AMPEU gigihupushi kishekiphe tiqhetini tsala ighini keno, panonguye tilehino kiu shi nani kya?

⁶Kughou kutsakungo keu ighini keno eno timiqoye apanagha kuhapoveni keno, Ijipmino panoqo xukumqo nani, panonqo xukumqo sawo Memfi lo qhove niyeke! Panoqo wu tsandiyino kini kulushi achekeu ngo panoqo ki khilehi shipuakeno tipaqoye alupi ngo asahuphono qunhave nani.

⁷Aghime sholu kepu ghuloki ighivae; timiqono kiu ithulu kuzupu shiani keno tipau ithulu kepu ghuloki shivae. Kughono tishini keno tileno Israil lo akemino ithi ani! Nonguno picheni, “Tungkupu hipauye kughuzumike. Timi mlolo pisutsu chekemi hipauye izupho kicheyivae.” Nonguno shishe ijumithi keuye nongu xineye kumzapu kehue.

⁸Alhou no pawu timi Israilmi kutughu peniaye tungkupumi lakhi shi-ghi ipuwuke. Ikeghi, ino khile khile wuni keno tikumtsulo aghau lakhi toi imeluveniye nonguno pukaputsa cheni. Alhou wu ayeghilo akemiqoye tungkupmi ghumike.

⁹Panonguye kutho kuzushi kusakugha shiukhavae, tiye panonguno Gibea lo shicheke toike. Alhou no panoqo xine kumsupuluveno tipau ghenguno panoqo ghimeqhi nani.

¹⁰AMPEU no pi, “Ino Israil phulu tughuloye tiye asayeqha lo atsayithi phulu aketoike. Kughou ino nongu puasuqo ithulu keno khughuthi kipithi ghulokilo khughuthi kini amusuu toike. Ikemu kughou panonguno Peor Toghi lo ighikeno panonguno Baal mllathuve, eno paikhavino panonguno kupuqhiyi chekeu lhouqo toi panonguye niqhunilaive.

¹¹Israil no kije shiakeu huye aghau toi yewuve nani eno panoqo gholo atianuli punumove nani, totimi mishipukemi kuha nani eno atianuli mishimove nani.

¹²Ike panonguno atianuli saputhu puaghi pinamu ino tipaqo ikhisuwuve nani eno milakhimu puxumove nani. Kughou ino timi hipaqo qhiveni keno akumsa kuighupu panoqo shou ikughi nani.”

¹³AMPEU, panoqo tianuli haqhi puzu pithivekeu ino ithulu ani.

¹⁴Timi hipaqo lau kiu shipenike niye ovilo inijuni kya? Panoqo gholo totimiqo anuha shivetsulo! Panoqo pelo panonga kughunu tucho hiju mlakepu shitsulo!

¹⁵AMPEU no pi, “Panoqono alhoksa kumla shikeu kumtsu Gilgal lono huthuke. Tileno niye panoqo jumithi thuveke. Panonguno alhoksa shike ghenguno ino iyeghi lono panoqo hapheve nani. Niye hinguno alauye panoqo kimiyemo nani. Panongu sakiphemi kumtsuno imjochileke.

¹⁶Israil lo akemiqoye asubo lakhi akuhu qhaiveno axathi pithimovekeu toivae. Panonguye atianuli kuha nani, eno panonguno atianuli lhoe pinamu panonguno shishe kimiye akeu tianuli ino pithivetsu nani.”

¹⁷Ino qechekeu Lhou no timi hipaqo peve nani kughengu panonguno pa tsa lumoke. Panonguye ashiayeh kutami gholo iqho iqiju puha cheuve nani.