Read Sumi Naga JOYIL 3 Bible Online

JOYIL 3 - Sumi Naga bible

JOYIL 3

¹AMPEU no pi, “Julo, tipa ghulokilo ino Juda ngo Jerusalem kinikulu suchile saghi nani.

²Ino ashiayeh hekutsu puzu Jehoshafat [1] Khilalo panoqo saghi nani. Tilehino panonguno iwu timiqo shou shipepuakeu jeli kumtsu ghe- ghuno ino panoqo shou kughathabe nani. Panonguno inaghami yeghilo Israilmi apanagha haleveke, eno iyeghi, Israil kijethavetsuke.

³Panonguno khuuno akughumi luni kela pi asaqhike. Panonguno apumi ngo ilimiqo aquaxemi shive peniaye jesuve tiye kutuqhami shipenike eno aji shonikepu ghenguno pesu loveke.

⁴“Tur, Sidon eno Filistiya tokujolo akeqo, nonguye ishou kiu shinike pukaputsa ani kya? Nonguye kiuala ghenguno ilochile nike pukaputsa ani kesha? Nonguno tishi aghiaye ino paikhavino nongu lochile nani!

⁵Nonguno iwu shunayi ngo tsandiyi luveke eno ikini pekutsupuakeu nochinekilo xapu iloveke.

⁶Nonguno Juda ngo Jerusalem lo akemiqo pano yeghi lono putou sawuve eno Grikmi vilo panoqo jesuveke.

⁷Itehiye nonguno panoqo khilehi jesuvekeno tipa-alono ino panoqo saghi nani. Nonguno panoqo lau kiu shikeno tipau ino nongu lau shi nani.

⁸Ino nongu pelo nonu ngo nongaqo pesu Juda lo akemiqo lau jesuvepe nani; eno panonguno tipanoqo pesu ashiayeh putou akemi Sabiyami vilo jesuve nani. Ni, AMPEU no piqhi anike.

⁹“Ashiayeh kutamiqo gholo hipau asheshulo: ‘Aghushinike kutolo; no-ghutomiqo ku-kumqolo; no-ghushimiqo kumtsu hekutsuno chelo!

¹⁰Nowu hokile kuphu hepha pesu azutakihi mlalo, eno no zutachi pesu angu mlalo. Miqemilei keu ghi aghu shimasake.

¹¹Mutazulo eno ighilo, nongu ashiayeh kutami acheaxulo akeqo, akhilalo hekutsulo.’ ” O AMPEU, owu ghushimi panoqo hale kepushi piqi tsulo!

¹²“Ashiayehqoye kutokupuilu masake eno Jehoshafat Khilalo ighilo. Tilehino, ni AMPEU no iqano acheaxulo ashiayehqo kumtsu shou kughatha nani.

¹³Panonguye shishe lhoksakughake; ghile tsalalo athi ghokeshi panoqo ghiqhilo; Atsayi kutsughubo chhitoikeulo atsayiji qole ipeghive moke kutolo atsayithi chinepho keshi panoqo chinedaqhilo.”

¹⁴Jehoshafat Khilalo aqokitikhi kumzapushi anike. Tilehino AMPEU tsala itheno ighinani.

¹⁵Tsukinhe ngo aqhiye zumoive, eno ayepuqoye yepuvumove nani.

¹⁶Zion Toghi lono AMPEU no igha; Jerusalem lono pa sutsa tsutsukusu toi pike; ayeghi ngo atsutsuno khokhoshike. Ikemu pano pawu timiqo susholu nani.

¹⁷“Tishiaye, O Israil, niye nongu Lhou AMPEU kepi nonguno ithi nani. Niye ikimthe toghi Zion lo acheni. Jerusalem ye akimthe phughi lakhi shi nani; inaghamiye khilemu tipau itaghi lelumo nani.

¹⁸‘Tipa ghulokiloye naghutoqoye atsayiluno nhachhive nani, Atoghi kumtsulo amshi cheghi nani; Juda lo aghokiti akeu kumtsulo azuno lukumkha shi auve nani. AMPEU Achine ki kudauno aghoki lakhi qoipeghi nani, eno tipauno Akasiabo Khila azu putsuwo nani.

¹⁹“Ijip ye asayeqha shiwuve nani, Edom yeghiye shipusape adou shive nani, kughengu panonguno Juda yeghi leighike eno tipaulo kiu lhoksa mu shimokemi ghiqhike

²⁰Ikemu Juda ngo Jerusalem ye alhokupujulo timi kughuna cheuve nani.

²¹Ino panoqo ghiqhikeu mukhu lutsu nani eno kuquvekeu niye qhimonanike, kughengu ni AMPEU no Zion Toghilo acheuve nanike.”