Read Sumi Naga AMUS 1 Bible Online

AMUS 1 - Sumi Naga bible

AMUS 1

¹Hiye Amus tsake, paye Tekoa taunlo bherikhemi lakhike. Ayeghi ithanikeu ampe kini aphilo eno Uziya no Juda lo akukau shia, Jehoash nu Jeroboam no Israil lo akukau shiake ghuloki lono Alhou no Israil ghili hipaqo kumtsu pesu Amus lau piyesuke.

²Amus no pi, “AMPEU no Zion lono igha, Jerusalem lo pa sutsano tsutsu kusu toike. Bherikhemino achukumza chekeu ighuyive, Karmel Toghilo Atsunino hughaive.”

³AMPEU no pi, “Damaska lo kuamiye anguno anguno axine shi acheni eno tipau ghenguno niye mutsuqheyino panoqo ghimeqhi nani. Panonguno ayikusu pesu Gilead lo kuamiqo peithake.

⁴Tighenguno akukau Xazael no akighiki shipuakeu shou ino ami suvetsu nani eno akukau Benhadad no aliwo qoghe shipuakeu pitilevetsu nani.

⁵Ino Damaska phughilo khagho kubolevetsu nani eno Aven Khilalo kughuna akemi ngo Betheden lo ayehkipemi ikhive nani. Siriya lo akemiye Kir yeghilo akughumi shi sasu wuve nani.”

⁶AMPEU no pi, “Gaza lo kuamiye anguno anguno axine shi acheni eno tipau ghenguno niye mutsuqheyino panoqo ghimeqhi nani. Panonguno ashiayeh lakhilo timi kumtsu sawuve eno Edom lo akemi quaxemi shipe nike panoqo jesuveke.

⁷Tighenguno Gaza lo aphughi liwo kuptu shou ino ami suvetsu nani eno tipau liwo qogheqo pitilevetsu nani.

⁸Ashdod phughilo ngo Ashkelon lo ayehkipemi ino ikhive nani. Ino Ekron phughi ghimeqhi nani eno Filistiyami xuaghikeqo kumtsu puhave nani.”

⁹AMPEU no pi, “Tur lo kuamiye anguno anguno axine shi acheni eno tipau ghenguno niye mutsuqheyino panoqo ghimeqhi nani. Panonguno ashiayeh lakhilo timi lhoxu kumtsu Edom yeghilo piyighiuve peke eno visho shipuakeu pemoveke.

¹⁰Tighenguno Tur lo aphughi kuptu shou ino ami suvetsu nani eno tipau liwo qogheqo pitilevetsu nani.”

¹¹AMPEU no pi, “Edom lo kuamiye anguno anguno axine shi acheni eno tipau ghenguno niye mutsuqheino panoqo ghimeqhi nani. Panonguno panoqo thikuzumi Israilmi ashi hakeshi haqhike eno kitilamu panoqo shou kupukeu kuhake. Panongu mulo kighideye ashekha kuha eno khilemu tipau hauve pemoe.

¹²Tighenguno Teman phughi shou ino ami suvetsu nani eno Bozra liwo qogheqo pitilevetsu nani.”

¹³AMPEU no pi, “Amun lo kuamiye anguno anguno axine shi acheni eno tipau ghenguno niye mutsuqheino panoqo ghimeqhi nani. Panonguno alughi alau ikowoniaye aghu shikeulo panonguye Gilead lo totimi mishipu aghikemi po ghilevetsuke.

¹⁴Tighenguno Rabba phughi kuptu shou ino ami suvetsu nani eno tipau liwo qogheqo pitilevetsu nani. Tile aghushi ake tsalalo yeyeshi igha nani eno aghukishiye pasapagha toi muqhumzayi nani.

¹⁵Panoqo kukau ngo kijemiqoye piyighive nani.”