Read Sumi Naga AMUS 4 Bible Online

AMUS 4 - Sumi Naga bible

AMUS 4

¹Hipau inijulo, nongu Samariami totimiqo, Bashan lo amshiqu ashi pubeyi keqo toi athapubei keqo, kumlhomi peitha pusa chekeqo, shiluksami qodaqhi chekeqo eno nongu kimiqo vilo aji xapuwo tsu alepi khuchekeqo!

²AMPEU Alhou ye akimthe kehu pano tushoqhivae, “Aghumino ayikuhokeu pesu nongu sunhe kiti sawunikeu tsala ighi nani; nongu kumtsu akhakumsupu yilo akha fupe akeu toi nani.

³Nonguye aliwo kuptu kighipe kutolo sunhe kiti sawu puzu Harmon lo vephe puwuve nani.”

⁴AMPEU Alhou no pi, “Israil lo akemiqo, nonguno wumasa kuchou shiaghiaye Bethel lo akimthe-alo wupuzu axine shialo! Gilgal lo wupuzu nongu kuka kumto kumtsu pesu axine shialo! Tishi puzu inaqhe atsu-tsu heqhi mlla nike lhoxuqo sughilo eno atsala akuthunilo nongu wu chighi saje lakhi sughi alo.

⁵Tishi puzu shikimthikeu shi-ghi kholaqhi sukeu sho pesu Alhou mllalo eno nonguno akumllagho achili sughikeu asheshu alo! Nonguno hikithipu kupuqhiyi achenike.”

⁶“Nongu phughi kumtsulo puqumiye sughikeu huye inoke ikeghi nonguye ilau xaideghimoke.

⁷Nongu xaboqono tsutsughu avehupu shikutu akelo ino tsutsughu suchileluveke. Ino aphughi lakhilo tsughutsu ikemu lakhiu loye lakhaveke. Alu lakhiloye tsughusupe ikemu alu lakhiu loye qhai vepeke.

⁸Tughuthikeuno qeinaive puzu aphughi kini kuthulo akemiqono aphughi lakhiulo azu phulu nimalaye wuke, ikemu tilaghi yekepu lukumkhashi kuhae. Tishi keghi nonguye ilau xaidechile ighimoe.”

⁹“Nongu xabo fupithive penike ino shukuthuyi keu mulhu puwuke. Tulhaqu no noghutu ngo atsayilu, khughuthibo eno oliv subo tsakhave tsuke. Tishi keghi nonguye ilau xaidechile ighimoe.”

¹⁰“Ino Ijipmi shou pusa puwukeu lakhi toi nongu shou ghi puwuke. Ino aghukishi lono nowu lhothemi ghiqhi pithivetsuke eno nowu khurshiqo suwuve tsuke. No ghunoalo kithimi kumono tsu muna keuno nongu nigi chhivepeke. Tishi keghi nonguye ilau xaidechile ighimoe.”

¹¹“Ino Sodom ngo Gomora phughi kutsave ketoi ino nongu gholo khami kutsave. Nongu khunoqomi puxupuaghi keno tipaqoye ami lono amisu puxupheluke toike. Tishi keghi nonguye ilau xaidechile ighimoe,” ipi AMPEU no pi.

¹²“O Israil lo akemiqo, niye nongu shou kughathabeni cheni. Ino hipau shini chenike ghenguno oLhou sasu kusho kepushi kutolulo!”

¹³Naghutoqo eno amlhu lhokeuye Alhou likhinoke. Pano timi pelo pa kukumsu ithipe cheni; pano puchou pesu putho shivepe cheni. Paye ayeghi kuchuqu shou nepuku cheni, pa jeye hike: AMPEU, Aqokitikhi Lhou ke!