Read Sumi Naga OBADIA 1 Bible Online

OBADIA 1 - Sumi Naga bible

OBADIA 1

¹Hiye Obadia wu kungunhetsu ke: tiye AMPEU Alhou no Edom shiayeh ghenguno pikeuke. AMPEU no pa sutsa kipemi ashiayehqo lau puwu, ninguno pa tsape chiluvae: “Kutokugholulo! Ningu Edom sasu aghushi nike wuni nolo!”

²AMPEU no Edom vilo pi, “Ashiayehqo gholo noye miqemileyikeu ino shitsuni; kumtsuno ojukunatha nani.

³Omlolo aqhekuzano opishiqhivae. Nokungo-aye naghuto qhemghai kelo ani, omlo lono nono ishi pike, ‘Khuuno ituleqhi kulupu kya?’

⁴Nono okungoa aluqu pusu toi chuqumghai kelo shipuaghi namu, eno tiye ayepuqo gholo shipua keshi aghinamu, tikudauno ino osunheqhive nani.”

⁵“Kughou kupkamino putholo ighini keno panonguno kiu lunishi keno tipau likhi sunhe kishe pewuve cheni. Kughou timino atsayithi xoni keno panonguno pulhapuju hamiye qhivetsu cheni. Ikemu noghumiye nongu qhoyi jole sawuve nani.

⁶Esao laghamiqo, nokini pekutsu pua keu xulepuwuvae.

⁷Nogholo kuqhape akemi kumtsuno nongu pishiqhike, panonguno nongu hasusu alughi kutolo wuke. Timi khunoqono nongu sasu visho shipe achekeno tipaqono itehiye nongu leluvae. Shompami nongu sasu kumtsa chuchekeqono alichhe shipesu okheke; Panonguno noghili ishi pike, ‘Pano amqukini akeu khile ani kya?’ ”

⁸“Ino Edom ghimeqhike tsalalo ino panoqo gholo amqukinimi kutsaleve nani eno panoqo lokutsu kumtsu joleve tsu nani.

⁹Teman lo akumto kughushumiye musa ighuve nani, eno Edom lo ghushimi kumtsu ghiqhive nani.”

¹⁰“Nonguno nothikuzumi, Jakob laghamiqo pukaqhi eno ghiqhi ke ghenguno, nonguye alhokupujulo akukujopu shi nani eno nongu kutsa- leve nani.

¹¹Kughou aghumino panoqo khagho kubole akelo nonguye putosuu puthugho auveke. Nonguye inamino Jerusalem wu kinikulu xapu kijeluve kemiqo toi nongu ghi alomo kemiqoke.

¹²Nothikuzumi Juda lo akemi qono angukusa sholukeulo nonguye amlokiqi shimo kepushi ake. Panonguno avekusa shi akelo nonguye panoqo junumo kepu shi ake.

¹³Iwu timiqono aghesuqhi akelo nonguye pano khagholo ilomo kepushi ake; Juda no kutsakungo vekusa sholu ake tsalalo mughai ipimo kepu shia; Panongu vekusalo pano nhemgha lhepuwumo kepushi ake.

¹⁴Nonguye panoqono pokaluniye pukaputsa chekelo pano kugha- luniye alapalo puthughope ngomo kepushi ake. Nonguye panoqono avekusa shi ake tsalalo aghumi ulo panoqo suvetsumo kepushi ake.”

¹⁵“Ni, AMPEU no ashiayehqo shou kughathabeni keu tsalaye kupu nuvae. O Edom, nono kiu mla keno tipau oshou mla puku nani. Nono kiu tsupuani keno tipau ithuluchile nani.

¹⁶Ikimthe toghilo iwu timiqoye aghime kukhu kimji ajukhu lakhi shopuani. Ikemu sukumxalo ashiayeh akeqo kumtsuno tinguno alau aghime kukhu kimji ajukhu lakhi sho- nani; panongu kumtsu tipau shokhave nani, panonguye hauve nani.”

¹⁷“Ikemu Zion Toghilo khamiye pokawulu nani eno tiye akimthe-a lakhi shi nani. Jakob wu timiqono pano mheghi ayeghi hu pano wu shiluve nani.

¹⁸Jakob ngo Josef wu timiqoye ami toive nani; Amino ateni pitive keshi panonguno Isao wu timiqo kutsaleve nani. Esao polo kughukomi lakhimu puxumo nani. Ni, AMPEU no piqhiveake.”

¹⁹“Juda lo apeu akemiqono Edom qhasuluve nani; Kulolau naghuto pukhu kuxalo akemiqono Filistiya khasuno leluve nani, Israilmino Efraim ngo Samaria yeghi bocho pighiluve nani; Benjamin lo akemiqono Gilead luve nani.

²⁰Hapupovekemi ghushimi muqono Israil ahuuno ideighi puzu ahuu Zarefat kutolo Fonika yeghi leluve nani. Jerusalem lono hapiye pighive kemi Sardis lo akeqono Juda yeghi apeu taun akeqo khasuno leluve nani.

²¹Jerusalem lo tokulu shi achekemi qono Edom le nani eno tipau shou ayehpe nani. AMPEU no Akukau shiluve nani.”