Read Sumi Naga JONA 2 Bible Online

JONA 2 - Sumi Naga bible

JONA 2

¹Akhapo lono Jona no AMPEU pa Lhou vilo akighini shike:

²“O AMPEU, ivekusa launo ino okuke, nono ikhochileke. Kithimi yeghi kutho lono kuphupenike ino ighake eno nono isutsa chilutsuke.

³Nono azughi pola kutolo ivesuve, azuno aqha kumtsulo isuholuve, nono puwukeu azu kighideno ishou ide iluke.

⁴Niye ozulono haphevae eno khilemu okimthe Achine ki itaghi ithulu kithemoake pi ino kumsuveke.

⁵Azuno inhaluve; azughi kuthono qhoi inhaluveke, azu lupino ikutsu kuzupholuveke.

⁶Niye naghuto kuhuqo qhou iqiveke, akhadu pulhapuju khaluve chekeu yeghilo iloke. Ikemu O AMPEU iLhou, nono akuthoku lono isachile saghino xulupeke.

⁷Kughou ikuxu hau chekeu ino ithi keno, tileno O AMPEU, ino ovilo khuinike, oAchine ki kimthe lono nono isutsa chilutsuke.

⁸Khunoqono kichileu julho mlla cheni keno panonguye oghokulu phevae.

⁹Ikemu niye osheqhe shipilini; niye aghakishi pesu omlla nike eno ino piqhivekeu shini. Xaphekuluye AMPEU launo ighike!”

¹⁰Tileno AMPEU no akha ahza tsuno Jona azu mukulo puqulevepe.