Read Sumi Naga JONA 4 Bible Online

JONA 4 - Sumi Naga bible

JONA 4

¹Ikemu Jona ye shishe amlo qimlave eno paye aloghu idea.

²Pano ishi inikhu, “O AMPEU, ino nighakhu qhimphi lonomu noye hikithipu shi nani kepi piake kumo kesha? Tighenguno ino mutazu Tarshis lo poveniye pukaputsa! Noye kimiyekini eno kupukini Lhou kepi ino ithiake, pulhapujulo kheakulu, pulhapuju kimiyeqhiyikeu pulhapujulo okukumsu kilive cheni eno ghimeqhi chemoke.

³Tighenguno O AMPEU, itehino ikuxu luvetsulo. Niye xu anikepu ye thivekeu pavike.”

⁴AMPEU no khochile pi, “Noye aloghu ide kuzupu kiu ani kya?”

⁵Tipathiu Jona no aphughi kipelau wuveno iqa-a. Pano apusho lakhi mlano tipau kicheqholo ngoa puzu Nineve phughiye kishive nani kelapi kheju ake.

⁶Tileno AMPEU no apoxibo lakhi kutopua eno tipauno Jona shou qu iku, tiye akicheqho patsu peniyeke, tishianguno paye alokughuno alau shipeniyeke. Jona ye apoxibo ghenguno ighono amlo kiqishive.

⁷Ikemu thanau inaqhe Alhou no ahza tsukeu lono apithe lakhino apoxibo tsaqhipe eno tiye thizumuyive.

⁸Tsukinhe ipeghikelo, Alhou no shukuthuyi keu mulhu kipelauno puwu eno tsukinhe kushuno pa kutsulo pughaqhi kelauno Jona ye izuvulayi iluqiveni cheghi, ike paye thive nishiuve. Tileno pano pi, “Niye xuani kepuye thivekeu pavike.”

⁹Ikemu Alhou no pa vilo pi, “Noye apoxibo ghenguno aloghu ide kuzupu kiu ani kya?” “Niye aloghu ide kuzu pu anie, thivenikeu loghu ide kuzu anike,” ipi Jona no khochile.

¹⁰AMPEU no pa vilo pi, “Apoxibo hipauye kijili lakhino ipeghi puzu thanauye hauveke; noye tipau ghenguno kiumu shipe puamoe eno nono ipeghipeke kumoe, ikeghi noye hipau ghenguno amlo sa ani!

¹¹Tishiaye, niye tinguno alaushi Nineve shou kupukeu ani, aphughi tipaulo kiumu pimimo kemi ititunu 120,000 shou ani eno pichepighi ghi kumzapu anike!”