Read Sumi Naga AKIKIHI 10 Bible Online

AKIKIHI 10 - Sumi Naga bible

AKIKIHI 10

¹AMPEU no Muse vilo pi,

²“Timiqono aghazu xakiqesu wuve nikelo kukumqo kepushi tsandiyi no iqikeu fuko kini mlalo.

³Kughono afuko kuma pesu kuigha chho ghi ighani keno aqoaho kuchopuno ino ngoche keu Phikilo ilocheke lalo homxa pesu ngopelo.

⁴Ikemu afuko lakhi likhi igha aye sakiphemiqo likhino homxa kumqo ngopelo.

⁵Kughono afuko ikhonhei ighani keno alagha kipela kudau aghazu shipe akeqo lagha no ala cheni.

⁶Kughono akiniu afuko ikhonhei ighani keno apeu kudau aghazu shipesu akemiqono ala chelo. Titoi afuko ikhonhei igha keloye aghazu xavelo,

⁷ikemu aqoaho kukumqoni keloye afuko kushuwo fuchho lo.

⁸Afuko huye Aron nu achinemino igha penikeu shilo. “Ayezah huye ighinikeu tsala kumtsulo peche penike ghengunoke.”

⁹Nonguno noyeghilo aghu shi akelo afuko hipaqo ighano aghulo wuno noghumi nongu le ighi akeqo mujo chileno nolikhi no susholo pi akeu michike. Ni AMPEU nongu Lhou no nongu kuphuni eno nongu ghumi launo nongu xaluni.

¹⁰Itaghi nonguno aqhi kithe lokivi pinye qolo eno nongu chine pinye kutau qolo pitikepu gho sughikelo eno kuposhukulu gho sughi kelo nonguw afukoqo ighalo. Tishi aye ino nongu kuphuni. Niye nongu Lhou AMPEU ke.

¹¹Timiqono Ijip qhiwo ampe akiniulo aqhi akiniu atsala muku shi akeni, khungkusu Aphiki shou pho akeu saikuve,

¹²eno Israilmiye Sinai Sayeto lono chesu wuve. Khungkusu huno Paran Sayeqha shou ngove.

¹³Panonguye AMPEU no Muse vechewo ahza tsukeu kiqi lono ala chethuve

¹⁴eno ghuthu lakhikhilo panonguno ala chekelo thosulo zah kutsu paphi lono iqesu wuche. Khunono Juda lagha kokutha michi phi peche keno panono atughushi chethu ti Aminadab nu Nahshon qholono aloji aloji shi che.

¹⁵Zuar nu Nethanel no Isakhar lagha sakipheu shi,

¹⁶Helon nu Eliab no Zebulun lagha sakipheu shike.

¹⁷Tithiu Aphiki xaqhino Gershon ngo Merari limi kuma khunoqono Aphiki puni keushi akeno tipaqono xape ala chenikeushi.

¹⁸Tipashelo, Ruben lagha kikijelo Shedeur nu Elizur sakiphe qholo amchiphi pe akeqono aloji, alojino ala chekeu shi.

¹⁹Tipashelo Simon lagha sakipheu Zurishadai nu Shelemeil no chewu

²⁰eno tipa shelo Gad lagha sakipheu Deuel nu Eliasaf no chewu.

²¹Tithiu Levi lagha kughuko Kohat no limiqo akimthe nhemghaqo xapusu ala chenikeu shi. Tipa ghulokilo panonguno tipau shelo aghazu akeu toluno akiniu Aphiki shisulu.

²²Tipashelo Efraim lagha kikijelo Amihud nu Elishama sakiphe qholo amchiphi pe akeqono aloji alojino ala che. Tipashelo

²³Manase lagha sakipheu Pedazur nu Gamaliel qholo akeqono alache,

²⁴eno tipashelo Benjamin lagha sakipheu Gideoni nu Abidan qholo akeqono ala che.

²⁵Ashekhaloye, Dan lagha kikijelo sakipheu Amishadai nu Ahiezer qholo amchiphi pe kikije kutauqo kumtsu thiu shino apa nekha chekeqono aloji alojino ala che.

²⁶Asher lagha lo Okhran nu Pagiel no sakipheu shi.

²⁷Naftali lagha lo Enan nu Ahira no sakipheu shi.

²⁸Hi shikeuye kugho kughomu Israilmino aghazu xaveno aloji alojino wuvecheke gholake.

²⁹Muse no pangu Hobab Midian noghami Jethro nu vilo pi, “Ninguye AMPEU no pano ningu tsuniepi akeu alo wuniye kuto ayeake, pano Israilmi pesu kinikulu shitsuni ipi piqhipe puani, tighenguno ningu wuni ighilo eno nonguno kinikulu shikulu osasu kusajenike.”

³⁰Hobab no khochile pi, “Moe niye nighakhulo idewo cheae.”

³¹Muse no pi, “Kishimake ningu qhive kevilo. Noye ninguno asayeqha khilehi aghazu shinikeno ithi ani kehu nono nila kichepiye kepushilo.

³²Nono ningu gholo ighi aye ninguye AMPEU no ningu kumgha tsukeu kumtsu pe osasu kusajenike.”

³³Timiqono Sinai akimthe naghuto qhiveno atsala kuthu izu chekelo AMPEU wu Puloshoqhi Bohu huno panonguno khile aghazu shikepu shi akeno panongu piyenike panongu zuu shino cheche.

³⁴Panonguno aghazu lakhikhi alono iqe wuke kumtsulo puchou tsala thaqhulo AMPEU wu khungkusuno panongu nhape che.

³⁵Kugho kughomu Puloshoqhi Bohu hu pekiqesu chethukelo Muse no piche. “AMPEU, ithu puzu oghumi qo apanagha hapupove tsulo.”

³⁶Kugho kughomu tipauno ngoveni kelo pano ishi piche, “AMPEU ide ighilo, Israilmi qhethonhe kibo shou ighilo.”