Read Sumi Naga AKIKIHI 11 Bible Online

AKIKIHI 11 - Sumi Naga bible

AKIKIHI 11

¹Timiqono panongu kijiksa ghili pesu AMPEU vilo muchho keu AMPEU no panoqo sutsa chilukelo, paye amlo ideve eno timiqo shou ami puwutsu. Tipauno panongu dolo iqu ipeghi eno aghazuqha halau piti pusave.

²Timiqono Muse vilo kuphu tsulepi ighamukuke; pano AMPEU vilo inikhu eno ami inheve.

³Tighenguno a-a tipau je pesu Tabera kuvetsu, kughengu AMPEU mi panongu dolono iqu kehu.

⁴Israilmi gholo inami ghi izu che. Panonguye ashi mine kutu keu ae eno Israilmi dolo ghi muchho keu ae eno ishi pi: “Ninguye ashi hami likhimu ithuluke ayela!

⁵Ijip loye nino chunishi ketoi akha kutomo kumsano ithulu cheke. Akukaqo, apoxi akungou, atsuna anikuchuu, pez tsuna eno anhetsuna kumsu kutu moni keshea!

⁶Ikemu itehiye nikumto wokhavae. Kiumu chukepu kuhavea, kutau kuhano mana sho atsala atsala lo tsu akeu thono!”

⁷(Mana ye axathi lothi kititi toi akimye ngo awune jukite ketoi.

⁸Tipauye putho atsuzu qike mtsa lono aghazu shou qi ikughi che. Thanau timiqoye aghazu veho mxasu wuno tipau sukumqolu no amkhu shi kubo eno shopalei shiche. Tipau micheju kelo oliv suno asho shike toike.)

¹⁰Timiqono panongu ghazu phiki kulaghilo kumqo ngono muchho munu akeu Muse no chiluve. Paye amlo imeve kughengu AMPEU no panongu shou aloghu ideveke,

¹¹eno pano AMPEU vilo pi,”Noye kushiye ighono isapusa anikya? Noye iju amlo shimove kya? Noye kushiye timi hipaqo pe imakho shitsu anikya?

¹²Niye panongu pulhosumoe momu panongu punu moe! Noye kushiye ipelo anga kusami toi panongu tucho anipe eno angaqo khape ketoi panongu khapeno nono panongu puasu tsuniepi tushoqhi puakeu yeghilo wuchekeu la kupujulo wucheni pekya?

¹³Niye khilauno timi hijejehi ghenguno ashi lukumkha ithuluni kya? Panonguye nhenheshi ani eno ashi khu ani.

¹⁴Niye ilikhino timi hipaqo kumtsu ghenguno amakho pumlae; hiye ighenguno ihulo kutuvae!

¹⁵Nono hitoi isa kughujuni aye kishimo ake ipithivelo, tishi anguno niye oyiksa kumla puqhemoake.”

¹⁶AMPEU no Muse vilo pi, “Timiqono gihu chekeqo lhotsuni,khunoqo pelo sakiphemi shipenike kisheve akeno tipaqo sawo ino ngoche keu Phikilo kumqolo eno panongu ye ophivilo puthugho ngolo pilo.

¹⁷Ino tilehi iqighi no osasu kuptsani eno ino anguagha pe otsuveke toikeu sughino panongu tsuni. Tithiuno panonguno timiqo ghenguno amakho pukelo okuphulu peni eno noye olikhino amakho tipau pupemove nike.

¹⁸Itehiye timiqo vilo pilo, ‘Nongu likhi nongu shikimthe luvelo pilo thoghiu tsalalo nonguye ashi chukepu ithuluni ake.Nonguno nonguye Ijip lo aghike aye ashi chulu aghini chekepi nhenheshi piakeu AMPEU no chiluvea. Itehiye AMPEU no ashi nongu tsunia eno nonguye ti chuluni ake.

¹⁹Nongu ye atsala lakhi momu kini momu pungu momu chighi momu tsala muku kutolo likhi chuni chenike kumoe,

²⁰ikemu aqhi kupuju kutolo tipauno nongu kini lono ipeghimoke kutolo eno angamoke kutolo chuni ake. Hiye tishini putsa kughengu nonguno AMPEU nongu gholo hile akeu milive eno pavilo nonguye Ijip khilemu qhimono aghike aye alonicheke pi pa shou muchhoke.’ ”

²¹Muse no AMPEU vilo pi, “Hilehi niye timi 600,000 sasu cheni eno nono pikeuye ashi aqhi lakhi chumkha panongu tsunie piya?

²²Amshi ngo bheri lukumkha heqhipe panongu ghapiqilu nani keshea? Azughilo akha akeu kumtsu panoqo ghenguno lumkha nani kesha?”

²³AMPEU no khochile, “Ikukaye kihithaluni keshea? Ino kiupi keno shikupu nikeu mokeu kushuwo womono nono ti ithive nani!”

²⁴Ike Muse no khalau ipe puzu AMPEU no kiu pa vilo pi keno tipau pesu timiqo vilo pi. Pano sakiphemi lhotsuni kusawo kumqono Aphiki phivilo qhi.

²⁵Tithiu AMPEU no khungkusu lono iqighino pa putsa. Pano anguagha Muse tsupua keu hami pesu sakiphemi lhotsuniqo tsue. Kughono aghunguno panongu lau ighi keno panonguye tungkupu toi ighono asheshu atsa pilu ikemu ado kushuwo ghenguno kumoe.

²⁶Lhotsuni gholo mikini ti Eldad ngo Medad pamaye aghazulo ngo auveno Aphikilo ipeghimove. Aghazu tilau ghi aghunguno pama shou ikughi eno pama ghi tungukupmi toi ighono asheshu atsa pilue.

²⁷Apumi lakhino poighino Eldad ngo Medad pamano kiu shi akeno pesu Muse vilo pi.

²⁸Tithiu Nun nu Joshua Muse kukuphuu ye apumi lakhi kehu asheshu Muse vilo, “Akijeu, panongu lakhavelo!” ipi.

²⁹Muse no ishi khochileve, “Noye ighenguno alokumsu shitsu ani keshea? Niye AMPEU pelo pa ghungu pesu pawu timi kumtsu tsupenishi ani eno kumtsu pelo tungkupu toi atsa pilupe nishike!”

³⁰Tithiu Muse ngo sakiphemi pano lhotsuniye aghazu lo idewove.

³¹AMPEU no paikhavino azughi mulhu lono atsungu sughitsu, tiye ayeghi lono miter lakhi qhemi lono ye ighi. Tipaqono aghazu phiki shou yeo ngove eno tipau sumxa pesu kilometer kushuwo kutolo yewo kuchope aqha kumtsu lo ngove.

³²Tishi kelono tipa tsala ajupuka puthotsu eno thoghiu tsala ajupuka timiqo ye atsungu kughalu aukhave; milakhi nomu kilogram 1000 nguno akimkheu kughalu keu shimoe. Panonguno aghazu phiki sukumxa kumtsulo tipaqo heqhipe phu piki woke.

³³Panonguno ashi chukepu kutomo aphi lono AMPEU no timiqo shou amlo ideve eno panongu dolo kitixe wokeu kusu ikughivepe.

³⁴Tipa-a pesu “Minekeu Kumoki” ipi jekuvetsu kughengu tilehi panonguno ashi mine kemi kumo qhove kehu.

³⁵Tilehino timiqoye iqe susu Hazerot lo wuve eno tilau aghazu shiluve.