Read Sumi Naga AKIKIHI 13 Bible Online

AKIKIHI 13 - Sumi Naga bible

AKIKIHI 13

¹AMPEU no Muse vilo pi,

²“Israil lagha chighikini dolono sakiphemi lakhikhi kishephelo eno ino Kanan yeghi pesu Israilmi tsuniepi pipuakeu pujuu penike pukujumi puwulo.”

³Muse no aghokulu shi Paran sayeqha lono sakiphemi hipaqo hape puwu: [Alagha] — [Sakiphemi] Ruben — Zakur nu Shamua Simon — Hori nu Shafat Juda — Jefune nu Kaleb Isakhar — Josef nu Igal Efraim — Nun nu Hoshea Benjamin — Rafu nu Palti Zebulun — Sodi nu Gadiel Manase — Susi nu Gadi Dan — Gemali nu Amiel Asher — Mechael nu Sethur Naftali — Vopsi nu Nabi Gad — Makhi nu Geuel

¹⁶Hipaqoye Muse no ayeghi hu juno ighipeniye miqe chekemi shi hapuwu keqoke. Pano Nun nu Hoshea je kukide pesu Joshua kuvetsu.

¹⁷Muse no panongu hapuwu no panoqo vilo pi, “Hileno ahuu kudau chesu Kanan yeghi apeu wulo eno tilauno naghuto ake kudau wujulo.

¹⁸Tiye kiutoikeu ghakhu, tilehi timi khijehi kughuna ani eno kiutoi akumtoshi anikeno puju wulo.

¹⁹Timi tilehi kughuna kuami ye akivi keo alhoksa keno julo eno timiqoye chholalei kughuna anikeo aliwo putukha no kughuna anikeno julo.

²⁰Ayeghi ye aghuma akeu momu asubo akeu yeghi kemo keno julo. Eno axathi pithi aghikeu hami xo sughilo.” (Tiye atsayi lothi ni ipechekeu tusho shi ake.)

²¹Ikehu timiqono ahuu no xususu Zin sayeqha apeu Hamat Kita phivilo Rehob kutolo wuke.

²²Atughushi panonguno ayeghi apeu kudau wuke eno Hebron lo ighi, khilehi subosughi Anakim ipi chekeu lono ikoighikemi Ahiman, Sheshai eno Talmai limi xu achekeu alo ighike. (Hebron ye Ijip lo Zoan nguno ampe tsunino azuu shighi aphu shive ake,)

²³Panonguno Eskol Khilalo ighi eno tilehi atsaithi apho kije pithi aghikeu lakhi michethalu ike tipau xathi phoye mishishei kehu timi mikinino asu suno kuhopeke. Panonguno khaghatu ngo khughuthi ghi hami xopusu ighi.

²⁴(Tipa a je pesu Eskol Khila kutsuke kughengu Israilmi tilehino atsayithi pho michetha sughike.)

²⁵Atsala lhobidi ayeghi tipau xuve kethiu pukujumi ye idechile susu

²⁶Paran sayeqha lo Kades ipikeu alo Muse ngo Aron eno Israilmi laghaqo lau ighi. Panonguno kiu ithulu keno tipau pesu pitsu eno axathi panonguno sughikeu pesu panongu piyeke.

²⁷Panonguno Muse vilo pi, “Ninguye ayeghi xujuluvae eno tipauye akini aghuma akeu shi ithulue eno tipaulo ipeghikeu xathi hami hi anie.

²⁸Ikemu timi tile kughuna akeqoye akumto kutsasake eno panoqo phughi ye kijejeke eno akivishi aliwo putukha pesu ani. Tinguno akusauno suboghimi tile akeu ninguno ithuluke.

²⁹Amalekmi ayeghi apeu qhalo kughuna ani eno Hatimi ngo Jebusimi eno Amarimi no ato ghakhulo anie; eno Kananmino Mediteriya Zughi phivilo ngo Jordan ghoki muku kuxalo kughuna anie.”

³⁰Kaleb no timi khunoqono Muse shou muchho ghi pi akeno tipaqo ghasuveno pi, “Ninguye itehino wuno ayeghi hu leluve kepue; ninguye tipau leluve kepu kuka anie.”

³¹Ikemu Kaleb sasu wukemino pi, “Moe, ninguye panongu lelu kepu kumto lukumkha shi amoe, timi tile akeqoye ningu nguno akumtomi ke.”

³²Titoi shi panonguye panonguno xuju keu yeghi ghili akimki launo Israilmi gholo vekulha vetsu. Panonguno ishi pi, “Ayeghi tipauye timi tilehi akeqo ghengu ghi chukumkha mla phelu amoe. Ninguno ithulukemi kumtsu shishe chuqumghaike

³³eno ninguno Anak laghami shishe subosughimi ghi ithulue. Nilikhi nijupesu tulhaqu qhemishi kumsulue eno panongu zulo ninguye tishi ithulu aghi nanike.”