Read Sumi Naga AKIKIHI 14 Bible Online

AKIKIHI 14 - Sumi Naga bible

AKIKIHI 14

¹Puthotsu timiqo ye avekusa launo ighathuve.

²Panonguno Muse ngo Aron pama shou muchhono ishi pi, “Ijip lono thive keu pavini cheke momu hilau asayeqha lono mu thive keu pavini cheke!

³AMPEU ye kushiye ni sasu ayeghi hupaulo wucheni kya? Ninguye aghushi lono thive nani eno ningu nipu nuli ye kughalu khave nanike. Ijip lo idewovekeu pavimo nikesha?”

⁴Ike panongu lakhino lakhi vilo ishi pi, “Ninguye sakipheu lakhi kisheluveno Ijip lo idewoveni nolo!”

⁵Tileno Muse ngo Aron pamaye timi kumtsu zulono agi pishiqholuve.

⁶Nun nu Joshua ngo Jefune nu Kaleb, pujuu kemiqo gholo pama ghi wuke, pamano amlo ghime launo pama phimini suxuveno

⁷timiqo vilo ishi pi, “Ayeghi nino xujuve keu huye ighono akiqheuke.

⁸AMPEU no ningu ju alokepu shi aghiaye pano ningu sasu tile wunani eno kinikulu ngo aghuma yeghi tipau ningu tsu nani.

⁹AMPEU hebide kevilo eno timi tilehi kughuna akemiqo jupesu musa kevilo. Ninguye mulalei panongu leluve nani. AMPEU no ningu sasu ani eno panoqo sushope akeqo ghahwu shou pano theqhiluvae, tighenguno panongu jupe musa kevilo.”

¹⁰Timi aqo kuchopu ghano atu pesu panoqo veqhi pithive nike shikichi thuve ikemu paikhavi lono AMPEU no ngoakeu saghusaghui keu kuvu Aphiki shou ipeghi keu timiqono ithuluve.

¹¹AMPEU no Muse vilo pi, “Timi hipaqo ye khitohi imilive ache nani kya? Ino panongu dolo akichiqhipu kumla kutomo shitsu pulano panonguye khitohi ipulu mlano auvea kya?

¹²Ino akusu ghime lakhi panongu shou puwuni eno panoqo kutsaveni ikemu ino opelo panongu nguno ashiayeh kuloghi eno akumtou kije lakhi papu kughulhove tsunie!”

¹³Ikemu Muse no AMPEU vilo pi, “Nono okuka lono timi hipaqo Ijip lono saighike. Nono owu timiqo shou kiu mlakeno tipau Ijipmi no chilukelo

¹⁴panonguno ayeghi hipaulo kughuna akemiqo vilo pinani. Timi hipaqono chilu puakeuno, AMPEU no ningu sasu acheni, kughou owu khungkusu no ningu shou ngoveni keno tileno vezalei oithuluve ani, puchouno khungkusu tsukucho lakhi lono eno putholo ami tsukucho lakhi lono ningu zuu cheni kepi ithi akhanike.

¹⁵Itehiye nono owu timiqo pithive aye ojekipi ghili chiluve kemi shiayehqono pinani,

¹⁶nono owu timiqo asayeqha lono pithikhave ke, kughengu nono ayeghi panoqo tsuniepi piqhi puakeu yeghilo panoqo saghimlave ke ipi pinani.

¹⁷Tighenguno AMPEU, itehino ino oqhuiniju anike okuka ningu piyelo eno nono piqhive keu shitsulo, nono ishi piveke toi,

¹⁸‘Ni, AMPEU ye mulalei aloghu ideve chemo, kimiye keu kije pukhukulu shipiye cheni, axine eno hebidekeu kipimi qhivetsu chenike. Tishimu niye apuaza khunoqono axine shiveni keno panoqo tianuli tiqheli akuthuu lono abidiu kutolo aghime tsumono phevekeu shimo nani.’

¹⁹Itehiye, AMPEU, owu iqemokeu kikimiye kije kiqi lono timi hipaqo xine qhivetsu lepi ino oqhuiniju ani ike tiye panonguno Ijip qhive kelono ishi kutolo nono panoqo xine qhivetsu ighive keu tho lono shitsulo.”

²⁰AMPEU no khochiletsu, “Nono khuke toi niye panoqo xine qhivetsu nani.

²¹Ikemu ino tushoqhi akeuno niye xu achenikeke,

²²timi hipaqo lakhimu ayeghi hupaulo ilokulupushi xu alumo nani. Panonguye ino sa akeu saghu saghui keu kuvu ithuluvae eno Ijip lo ngo asayeqhalo ino akichiqhipu kumla shikeu ithuluvae ikemu panonguno anguno anguno iwu kutuukulu ghukejuke eno ihebide auveke.

²³Ino panoqo puasu vilo ayeghi tsuniepi tushoqhi puakeulo panonguye khilemu ilomla nani. Imilive kemiqo gholo lakhimu tile ilomla nani.

²⁴Ikemu iqeu Kaleb ye pa lolo pakutakeu kukumsu ani paye ithamono iqhoqhu achenike ghenguno pano ayeghi khikhi xujuve akeno tipaulo ino pa sasu ighi nani eno pa lagha kughuko pelo ayeghi tipaulo amheghi ighilu penani,

²⁵khipa khilalo Amalekmi ngo Kananmi no itehi kughuna anikeno tipau yeghike. Thoghiuye cheide susu Aqaba Zucheku kudau asayeqha lo wuvelo.”

²⁶AMPEU no Muse ngo Aron pama vilo pi,

²⁷“Timi kixikila hipaqoye khitohi ishou muchho ache nani kya? Niye panonguno muchho keu lukumkhashi chiluvae!”

²⁸Itehiye khokichile hipau panongu tsulo, “Niye xuakeu ke ghenguno tsaquino ino tushoqhi anike nonguno ivilo khuve keu tho ino nongu lau shitsuni. Ni, AMPEU no pi anike.

²⁹Nonguye thive nani eno nongu kithi kumoye asayeqhalo kutholeve nani. Nonguno ishou muchhomunu pukuke ghenguno nongu apunu mpe muku shou shivekemi lakhimu ayeghi tipaulo ilomla nani.

³⁰Ino nongu pelo tile kughuna penikeu shi tushoqhike ikemu Kaleb ngo Joshua pama likhi thono kutami lakhimu tile ilolu pemo nani.

³¹Nonguno pikeuno nongu tianuli ye kutamino kughalu khave nani ipike ikemu ino panongu sasu nonguno milive keu yeghilo sailoni eno tipau pesu panoqo ghakhu shitsu nanike.

³²Nongu ye asayeqha hipau lono thinani.

³³Nongu tianuliye asayeqha lo ampe lhobidi iqhoiqi chenani, tiye nongu mikuchokumo ghenguno ime chenani, nongu gholo ashekhau kithi kutolo tishi chenani.

³⁴Nonguye nongu xine jume ampe lhobidi ime nani, nonguno ayeghi xujuwu kelo tsala lhobidi luvekeu hu atsala lakhikhino ampe lakhikhi qhemi shive peni. Nonguno ipelo nongu shou akumou shipeniye shikeu kiqiye kiukeno nonguno ithi nani!

³⁵Nongu kixikilami khunoqo kuqhano ighochile akeno tipaqo shou ino hi shitsunike tushoqhi ani. Nongu kumtsu hile asayeqha lono thikhave nani. Ni, AMPEU no pive ake.”

³⁶Muse no ayeghi xujuwu peniye puwukemi timiqo huno akimki tsa sughi puzu tipauno sukubangupe timiqoye AMPEU shou muchhomunu peke. Tighenguno AMPEU no kusukini pesu panoqo heve eno panonguye thive.

³⁸Pujukemi chighikini dolo Joshua ngo Kaleb pama likhi puxutsuke.

³⁹AMPEU no pikeu tsa pesu Muse no Israilmi vilo pikelo timiqoye shishe kunotshutshu shi qaukhave.

⁴⁰Thanau inaqhe itheno panonguye naghuto akeu ghakhuqo lenike chesu wuno ishi pi, “Itehiye AMPEU no a-a khipa ghili nivilo pikeno tipa alo ninguye wunike kutoluvae. Nino axine shivekeu ithivae.”

⁴¹Ikemu Muse no pi, “Tishiaye nonguye itehiye kushiye AMPEU ghobide ani kya? Nonguye tomla nani!

⁴²Wukevilo. AMPEU ye nongu gholo ngomovae eno nonguye aghumino nongu leluve nani.

⁴³Nonguno Amalekmi eno Kananmi sasu kusho kelo nonguye aghushi lono thive nani; AMPEU ye nongu gholo chemove nani kughengu nonguno pa papemove ke.”

⁴⁴AMPEU wu Puloshoqhi Bohu momu Muse mu aghazu phemphi amu timiqoye ighumono naghuto akeu qhalo iqhoke.

⁴⁵Tileno Amalekmi ngo Kananmi tilau kughuna akemi no Israilmi hale ighi no panoqo theqhiluve eno Horma kutolo hakuqosu ighike.