Read Sumi Naga AKIKIHI 15 Bible Online

AKIKIHI 15 - Sumi Naga bible

AKIKIHI 15

¹AMPEU no ayezah hipaqo pesu Muse tsukeu ye

²Israilmi pelo pano ayeghi tsuniye akeulo kithikiyi peche peniye tsuke.

³Amshitsu lakhi, bheritsu lakhi, bheri lakhi momu ane lakhi pesu AMPEU lau tsuluvi, tiye hitoikeu kumllagho shi tsuluvi, piti mllakeu gho momu ashoqhi shikupu keu ghakishi momu puloniqhiyi keu kumllagho momu thosulo nongu chine kishilo tsu chekeu ghoshighi tsuluvike; achuqupu kumllagho hipaqo xo kutsunguye AMPEU lau alokivipu shilu chenike.

⁴Khuu khumu bheri lakhi momu ane lakhi pesu AMPEU lau akiptigho shi tsuni keno paye lhoxu lakhikhi gholo asho kukubo kilogram lakhi pesu oliv teli liter lakhilo kununo atsaiji liter lakhi gholono athi kumllagho shi sughilo.

⁶Kughono bheritsu lakhi pesu mllani keno asho kukubo kilogram kini pesu oliv teli liter lakhino tuxalo kunu puzu athi kumllagho shi

⁷atsaiji liter lakhino tuxa gholono tsulo. Aghakishi hipau xokutsungu ye AMPEU mlo kiqipuke.

⁸Kughono amshitsu lakhi pesu akipti gho momu ashoqhi shikupu keu ghakishi lakhi momu kuposhukulu kumllagho lakhi shi mlla nikeno,

⁹asho kukubo kilogram kuthu pesu oliv teli liter kinilo kunu puzu athi kumllagho shi

¹⁰atsaiji liter kini gholono tsulo. Hipau ghashi keu xo kutsungu ye AMPEU mlo kiqipuke.

¹¹Hiye pesu amshitsu, bheritsu, bheri momu ane lakhi khi gholo mlla kepuke.

¹²Kughou lhoxu lakhi nguno alau pesu mllani keno tipau gholo mllakeu ghi kihitha keu kiqi lono alau pesu tsu masake.

¹³Israil ghakhumi lakhikhino pano AMPEU mlo kiqipu xo tsungquikeu achuqupu kumllagho tsukelo hi shilo.

¹⁴Kughokughomu inami nongu gholo akemi lakhino, ado ikhonhei ngokeu na alhokuthu ngo akemi namu pano AMPEU mlo kiqipu xo tsungquikeu achuqupu kumllagho shinikeno paye ayeh hipatho peithalo.

¹⁵Ighinikeu ghuloki kumtsulo ghenguno ayeh hipathono nongu eno inami nongu gholo kughuna akemi kumtsu tsugha anike. AMPEU zulo nongu kumtsu aphiphike;

¹⁶ayezah eno ayeh jeli aphiphi pesu nongu lau eno panoqo lau be ani ke.

¹⁷AMPEU no ayeh hipaqo pesu Muse tsukeuye pano ayeghi Israilmi tsuniye akeu yeghilo Israilmi pelo kithikiyi peche peniyeke.

¹⁹Kughono tilehi achuqupu ipeghi keu chuni keno, tipau hami pakutashi qhilo tiye AMPEU lau tsukeu shi ikhi thape qhilo.

²⁰Nonguno asho shikelo, athi kithe lono asho shukeqo shopa atughiu ye pakuta shi tsukeu shi AMPEU lau qhitsulo. Hipauye nonguno athi anileshi helukeu lono pakuta shi tsukeu paphi lono pesu tsumo ayesake.

²¹Ighinikeu ghuloki kumtsulo nonguno asho shukeu lono pekutsukeu gho hipau AMPEU tsuchelo.

²²Ikemu kumsujukelo timi khamino puthaputsano kumono AMPEU no Muse tsukeu yeh hipaqo hami pemlaveni

²³eno kumsujukelo athiu ghi aqo ahomi ghano AMPEU no Muse vechewono ahza tsukeu thwokha shimove aye;

²⁴tipau shimove keuye aqoahono mthave keu lono tishive aghi aye panonguye amshitsu lakhi pesu AMPEU mlo kiqi xo tsungqui keu shi akipti gho lakhi mllalo, achipi lono athi kumllagho ngo atsaiji kumllagho gholono tsulo. Tinguno alaughi panonguye anetsu lakhi pesu axine gha shikeu mllalo.

²⁵Achinemino aqoaho ghenguno shikimthe keu chine ghola lono peithatsulo tishino panongu kipimi peivetsu nani kughengu shipimi keu huye puthaputsa no kumoe eno panonguye pano xine kumllagho pesu achuqupu kumllagho shi AMPEU lau sughiveke.

²⁶Israilmi aqoaho kumtsu eno inami panongu gholo akeqo kumtsu kipimi peivetsu nani kughengu kumtsu ghano shipimive keulo chhosuve ake.

²⁷Timi luthu lakhino mthaveno axine shive aye paye ane lakhi ampe lakhi shi akeu pesu axine gha shikeu shi mllalo.

²⁸Akiptia lono achinemino pa xine lono mqhamiqhiyi vetsunike muqhamiqhiyi keu chine chinilo eno timi tipau xine peivetsu nani.

²⁹Israil ghakhumi shi aghina inaghami pinamu timi lakhino muthaveno axine shive kelo ayeh hipatho peitha nani.

³⁰Ikemu timi khuuno puthaputsano axine shiveni keno paye aghami shi aghina inaghami shi aghi mu paye AMPEU hebide vae, timi tipauye pithivelo,

³¹kughengu paye AMPEU no kiu pikeno miliveke eno puthaputsano pa yezah lakhi hephovae. Pa kithiye pa likhi pa makhoke.

³²Israilmino asayeqhalo achephilo ghuthu lakhi timi lakhino Sabat tsala lono asu sukughupu kichekumqo cheghike ithulu.

³³Pa sasu Muse ngo Aron eno aqoaho kumtsu lau wu,

³⁴eno ghukhemi pesu pa khepe, kughengu pa pe kiu shive kepukeno mutsumishei mokehu.

³⁵Tileno AMPEU no Muse vilo pi, “Timi huye pithive masake; aqoaho ghano aghazu nguno khalacheuno atu pesu pa veqhivelo.”

³⁶Tighenguno aqoaho kumtsuno timi hu aghazu nguno khalau saipe no AMPEU no ahza tsuve ketoi atu pesu pa veqhive.

³⁷AMPEU no Muse vilo Israilmi lau pipenike ahza tsu: “Nongu phimini shelo atsula pesu ayephotsulo tshupukulo. Nonguye ighinikeu ghuloki kumtsulo hipau shilo.

³⁹Aye photsuno nongu pelo kumsukidelu pe nani, tipaqo ghokulu shi nani tileno nonguye ilauno tsughusu wuveno kutuqhami shiuvemo nanike.

⁴⁰Aye photsu huno izahkutsu kumtsu pelupenike nongu loputsu tsu nani eno nonguye qhoi iwu shive nani.

⁴¹Niye nongu Lhou AMPEU ke; ino nongu Lhou shinike ghenguno Ijip lono nongu saipeghike. Niye AMPEU ke.”