Read Sumi Naga AKIKIHI 16 Bible Online

AKIKIHI 16 - Sumi Naga bible

AKIKIHI 16

¹Levi lagha lono ighikeu Kohat limi Izhar nu Kora ye ighumo mitheno Muse hebide. Pa gholo Ruben laghami kuthu, Eliab nu Dathan ngo Abiram eno Pelet nu On eno Israilmi kutami 250, aqoahono kishephelu puzu akivishi ithichekemi sakiphemi no pa gholo sukuqhaluve.

³Panonguno Muse ngo Aron zulo kumqoluve puzu panoqo vilo pi, “Nokujoye ihughalovae! Aqoahomi kumtsu AMPEU wu timiqo shiluvae eno AMPEU ye ningu kumtsu gholo anie. Tishi aye Muse noye kushiye AMPEU wu aqoahomi shou nouno akiqheu kepi pukha anikya?”

⁴Muse no hipatsa chilu kelo paye ayeghilo iluqive eno inikhu auve.

⁵Tishieno pano Kora ngo pa pape chekemi vilo pi; “Thoghiu AMPEU no khunoqono pawu keno pano ningu piyeni cheni; khuuno pawu keno, tipau kiqiye pano kisheluve akeno tipau pelo akiptia lo pa kupunu ighipe nani.

⁶Thoghiu no eno opapemiye amikhu ikhilulo, amibalu kuchugheikeu tile sulo eno tipau shou tsungquita belo eno tipau pesu akiptia lo wulo. Tileno AMPEU no ningu khuu kishepuanikeno ninguno ithulu nani. Nongu Levi laghamiuno ihughalo shulo huvae!”

⁷

⁸Muse no Kora vilo ishi pikibe, “Hi inilo nongu Levi laghaqo!

⁹Nonguye Israil Lhou no aqoaho kutamiqo launo nongu kutashi qhikeu huye kitila vehu kughashi kesha? Tishikeu lono nonguye pa lau kupunu ighino, AMPEU Phikilo nongu kumla shilu eno aqoaho peitha eno panoqo qelupeke kumo kesha?

¹⁰Pano nongu pelo eno Levi laghami pelo agigihupu hipau shilupeke eno itehiye nonguno achinemi muqo kumla ghi luve nike pukaputsa ani kenalae!

¹¹Nonguno Aron shou muchho keu hu tiye kuchouno AMPEU shou nonguno eno nongu papemiqono hebide anike.”

¹²Tithiu Muse no Dathan ngo Abiram pama kupuwu ikemu pamano ishi pi, “Nikujoye ighini chemoe!

¹³Nono ningu sasu Ijip kinikulu yeghi lono saipeghi puzu asayeqha hilauno ningu pithiveniye shi akeu hino kughokumo sheno noye hilaghi ningu shou ampiu shi qhasu aniye keshea?

¹⁴Noye kuchouno ningu sasu kinikulu yeghilo ighi nikekumoe momu nimheghi shipe nike khilehi aluqa ngo atsayilu nitsuni chemoe, noye ningu pishiqhivenike pukaputsa anie. Nikujoye ighimo nanike!”

¹⁵Muse ye agha ideveno AMPEU vilo pi, “Timi hipaqono akumllagho sughikeu ikhilu tsukevilo. Niye panoqo wu gadaha lakhimu lupuamoe.”

¹⁶Muse no Kora vilo pi, “Thoghi tsala lo no eno opapemi timi 250 ishi AMPEU no achekeu Phikilo ighi masake; Aron ghi tilehi aghinani.

¹⁷Okujo milakhikhino pututa mikhu sughilo eno tsungqu-ta tipau shou sulo eno tithiuno akiptia lo qhilo.”

¹⁸Ikehu milakhi khino pututa mikhu ikhilu puzu ami iqu akeu amibalu ngo tsungqu-ta tipau shou ikhisuluve puzu Muse ngo Aron gholo Aphiki kulaghi lo puthugholuve.

¹⁹Tithiu Kora no aqoaho kumtsu hekumqo pesu Aphiki kulaghilo Muse ngo Aron pama lau jupuwo ghi puthugholuve. Paikhavino AMPEU akeu kuvu saghusaghui keu aqoaho kumtsu lau ipeghi

²⁰eno AMPEU no Muse ngo Aron pama vilo pi,

²¹“Timi hipaqo launo idewo puthughovelo eno paikhavi lono ino panoqo kutsavenike.”

²²Ikemu Muse ngo Aron pamano ayeghilo agi pishiqho ghi itsaqiveno pi, “O Alhou noye kumtsu kuxu khuki ke. Timi lakhino axine shive keno noye aqoaho kuchopu shou agha ideni kesha?”

²³AMPEU no Muse vilo pi,

²⁴“Timiqo vilo Kora, Dathan eno Abiram noqo ghazu lono wuvelo pilo.”

²⁵Tithiu Muse no Israilmi sakiphemi sasu Dathan ngo Abiram pama lau ighi.

²⁶Muse no timiqo vilopi, “Timi kixikilami hipaqo launo putou ngovelo eno panongu nhemgha kiumu bukevilo, tikumoaye nonguye panoqo xine ghenguno nongu joleve nanike.”

²⁷Tighenguno panonguye Kora, Dathan eno Abiram phiki lono iqesu wuve. Dathan ngo Abiram pamaye pama phiki lono khalacheu ipeghi puzu pama nipu nuliqo sasu aphiki kulaghilo puthugho ake.

²⁸Muse no timiqo vilo pi, “Hipau lono nonguno ithi nanike AMPEU no hipaqo kumtsu shipeniye ipuwuke eno ilikhi ino kishelu keu lono hipaqo shi amoe.

²⁹Timi hipaqo Alhou launo aghime hami tsumono alhoayeh kithi lono thi aye, AMPEU ye ipuwu puamoe.

³⁰Ikemu khilemu chimla aphikeu kiula AMPEU no shi aye ayeghi no ikothape mukuluveno panongu gholono pichepighi kumtsu munove aye tishikeu lono panonguye xuaphi lono kithimi yeghilo iqive aye, tileno timi hipaqoye AMPEU milive kemiqo kepi nonguno ithi nani. “

³¹Pano atsa pikhalu kemtsa Dathan ngo Abiram pama qhouno ayeghi mpakho sulave

³²Kora papemi ngo panongu pichepighi eno pano kibolomi kumtsu munove.

³³Tighenguno panonguye xuaphi lono panongu pichepighi gholono kithimi yeghilo iqive. Ayeghino panongu shou nhaluve eno panonguye ithumlave.

³⁴Tilehi Israilmi akeqono panoqono ighakeu sutsa chilu kelo panonguye koha khave. Panonguno asheshu pi, “Polulo, ayeghino ningu ghi munove nosake!”

³⁵Tithiu AMPEU no pitimuha keu mi puwu puzu khunonguno tsungqu-ta suwo qhitsukeno timi 250 hu pithivepe.

³⁶Tithiu AMPEU no Muse vilo pi,

³⁷“Aron nu Eleazar achineu vilo pipuzu timi pitiqhipe puakeqo launo alazayi mikhu ikhi suwuve pelo eno amikhulo amiyi balu akeqo khileala pevelo pilo, kughengu amikhuye akimthe shive ake.

³⁸Tipaqoye AMPEU wu akiptia lo qhivetsu keu lono akimthe shive ake. Tighenguno khunoqo axine ghenguno pithive akeno timi tipaqo mikhu ikhilu puzu tipaqo apashi ipumihei hephano akiptia kuzu kepu shilo. Tino Israilmi shikimchi tsukeu lakhi shi nani.”

³⁹Ikehu achineu Eleazar no amikhuqo ikhilu puzu tipaqo hepha pesu ipumihei shino akiptia kukuzu ghenguno mlatsu.

⁴⁰Hi shikimchi keu pesu Israilmi tsukeuye khunoqono Aron kughuko kumokeno tipaqoye akiptia lo ighi puzu tsungqu-ta piti pesu AMPEU mlla pemoniyeke. Tishimoaye Kora ngo pawu timiqo toi pa kutsave nanike. AMPEU no Muse vechewo ahza Eleazar tsukeu toi hipaqo kumtsu shive.

⁴¹Tishiwo thoghiuye aqoaho kuchopu ghano Muse ngo Aron pama shou muchho pi,”Nokujoye AMPEU wu timi khami pithive tsuae.”

⁴²Panonguno Muse ngo Aron pama ghechile niye kumqoluve kethiu panonguno Aphiki kudau ighikelo khungkusuno tipau kuzupholuve eno AMPEU no akeu kuvu saghusaghui ipeghi keu ithulu.

⁴³Muse ngo Aron pamano wupuzu Aphiki gizulo puthugho,

⁴⁴AMPEU no Muse vilo pi,

⁴⁵“Timi hipaqo launo idewo puthughovelo ino hupa-a lono panoqo kutsavenike!” Pamano ayeghilo agi pishiqhope itsaqive,

⁴⁶Muse no Aron vilo pi, “Omikhu ikhilu puzu akiptia lono ami iqu akeu amibalu ikhisulo eno tsungqu-ta hami tipau shou bepuzu mtazu tipau pesu timiqo lau wulo, panoqo ghenguno mqhamiqhiyi keu chine chinivetsulo. Mtazu wulo! AMPEU gha kighide ipeghiveno asagha huthuwuve ake.”

⁴⁷Aron no aghokulu shi pa mikhu ikhipesu timi kumqo ake mtalo poilo. Kughou pusa kusu huthuve aghikeu ithulu keno pano tsungqu-ta pesu amiyi shou beno timiqo ghenguno mqhamiqhiyi keu chine chinivetsu.

⁴⁸Hino pusa lakhaluve eno paye kuxumi ngo kithimi dolo puthughope ngoluve.

⁴⁹Timi thivekeqo kihikutsuju kelo 14,700 shi aghi, tiye Kora hekibide lono thive kemiqo kihisu moke.

⁵⁰Kughou pusa kusu huno tavekeno Aron no xaidesu Aphiki kulaghilo Muse lau ighi.