Read Sumi Naga AKIKIHI 17 Bible Online

AKIKIHI 17 - Sumi Naga bible

AKIKIHI 17

¹AMPEU no Muse vilo pi,

²“Israilmi vilo panongu alagha lakhilo sakiphemi lakhi launo akusu lakhikhi pesu akusu chighikini otsulo pilo. Milakhikhi je pa kusulo yepukulo,

³Levi lagha zuqhu shikeu kusulo Aron je yepukulo. Alaghalo sakiphemi lakhi ghengu akusu lakhi shinani.

⁴Tipaqo pesu ino achekeu Phikilo sughino Puloshoqhi Bohu zulo qhilo,tileno ino osasu kusholunike.

⁵Tithiu ino kisheluve keu timi wu akusu huye ani mini ipeghi nani. Hitoi shikeu lono Israilmino oshou tamono muchho achekeu ino lakhave tsunani.”

⁶Ike Muse no Israilmi putsa eno panongu sakiphemi lakhikhino akusu lakhi pa tsu, alagha lakhi ghengu akusu lakhi, kuqha kelo chighikini, eno Aron kusu ghi tipaqo gholo qhike.

⁷Tithiu Muse no akusu kumtsu pewo Aphikilo AMPEU wu Puloshoqhi Bohu zulo qhive.

⁸Thoghu tsalalo Muse no Aphikilo iloghi kelo Aron kusu ti Levi lagha zuqhushi akeu huye mini shoba aghivekeu ithulu. Tipauye akumu ipeghi,ani mini puile eno almon xathi niveghi pithi akeu ithulu!

⁹Muse no akusuqo kumtsu ikhipesu Israilmiqo piye. Panonguno kiu shivekeno ithuluve no sakiphemi lakhikhino pututa kusu ikhichileluve.

¹⁰AMPEU no Muse vilo pi, “Aron wu akusu ikhichile suwo Puloshoqhi Bohu zulo qhilo. Tiye hekibidemi Israilmi lau shikimchi keu lakhi shi qhipuatsulo, tishi anguno panonguno muchho chekeu tavemoaye panongu ye thive nani.”

¹¹AMPEU no ahza tsukeu toi Muse no shivetsu.

¹²Israilmino Muse vilo pi, “Tishiaye tino nikuxu shekha shivae!

¹³Timi khuu khuumu Aphiki kupunu ighikeuye thi masake, tipau kiqiye ningu kumtsu thiveke kumlho shivae!”