Read Sumi Naga AKIKIHI 18 Bible Online

AKIKIHI 18 - Sumi Naga bible

AKIKIHI 18

¹AMPEU no Aron vilo pi, “No, onuliqo eno Levi laghaqono ino ngochekeu Phiki lo thosulo mlacheu kikimelo kiuano kuqulu aye tipau kipimiye nonguno pumayesa ke, ikemu no eno onuli likhino achineu kumla sajelo shipimilu keu makho pumayesa nani

²Nosholokumi, Levi lagha pelo no eno onuli no Aphikilo mla akelo kuphu penike saighilo.

³Panonguye olau panongu kumlapu saje shikupu pe masa eno Aphiki ghenguno panoqo kumla makho ghi shimasake ikemu panonguye Akimthe-a lo momu akiptia lo akimthe shi akeu thimeqo dilu pekevilo. Panonguno tishive aye panongu ghi noghi pithive nanike.

⁴Aphikilo akumlapu kumtsulo panonguye osasu mlapelo eno panoqo makho shikupupelo,ikemu akuzupu kumomiye osasu mlape kevilo.

⁵No eno onuli likhino Akimthea lo eno akiptia lo akumla shikepu makho shikupu tsulo, tishi anguno iloghu kighide Israilmi shou ikughi pe monike.

⁶Nowu timi Israilmi gholono ino no sholokumi Levi lagha kishephe pesu agho lakhi toi otsuke. Panonguye shikimthe pesu itsuve keqo ke ghenguno panonguno Aphikilo panoqo kumlapu shilu nani.

⁷Ikemu no eno onuli likhino akiptia eno Shishe Akimthea lo kiu shikepu keno tipau chineyeh shi nikeu makho kumtsu shikupu masake. Hipaqono nongu makho ke kughengu achine kumla peitha penikeu gho ino otsuve ake. Akuzupu kumomi khuukhumu shikimtheve keu thimeqo kupunu ighikeu ye pithive nani.”

⁸AMPEU no Aron vilo pi, “Aghashi pitikeu kumono kutau pakutakeu jeli qhasuwo itsu keu kumtsu ino nongu tsu ani kepi kumsululo. Ino tipaqo pesu no eno olaghalo kughuko tsuakeuye alhokupujulo nongu sala shiche peniyeke.

⁹Shikimthe pesu akumllagho tsukeu akiptia lo pitimokeu jeli hipaqoye nongu salake; athi kumllagho jeli, axine kumllagho jeli,eno lochilekeu kumllagho jeli. Kiukiu pinamu shimthe pesu imllakeu gho jeliye no eno onuliqo salake.

¹⁰Nonguye akimthea lono hipaqo chumasake eno kiptimi likhino tipaqo chulu nani; tipaqo akimthe kepi kumsululo.

¹¹“Hinguno alau ghi, Israilmino pakutakeu qhasuwo ilau tsukeu jeli kutau kiukiumu nongu wu shinani. Tipaqoye ighinikeu ghuloki kumtsulo no, onuli eno ongaqo lau ino tsu anike. Okibolomi khuukhumu chini keulo mithe akemino tipaqo chulu nani.

¹²“Ampe ampe lo Israilmino tuxatini ipeghikeu akiviu pesu itsukeu kumtsu pesu ino nongu tsu ani, tiye oliv teli, atsaiji eno athi.

¹³Tipaqo kumtsu nongu wuke. Nokibolomi khuukhumu chini kepu lono mithe akemino tipaqo chulu nani.

¹⁴“Israilmi gholo kiu kiumu kihikula mono ikhiphe pesu itsuve keuye nongu salake.

¹⁵Israilmino apuanga punutughiu momu lhoxu piti tughiu itsukeuye nongu salake. Ikemu apuanga punu tughiu thaqhuye qhuchilelu nike ame tsukelo nonguye tipau luvetsu masake.

¹⁶Apuanga no aqhi lakhi shi akelono ayeh lono betha puakeu kiqi lono tsandi tachu pungu bethakeu pesuno qhuchile luveni.

¹⁷Ikemu amshi, bheri eno aneqo piti tughiu ye qhuchile lumoni; tipaqoye qhoi isalake eno heqhipe aghashilo. Tipaqo jih pesu akiptia shou vepukulo eno tipaqo tha ye achuqupu kumllagho shi pitilo, imlo kiqishi tsungulu kepu lakhike.

¹⁸Pakutakeu kumllagho shikelo amlashi ngo aluko ajeu toi tipaqo ghi osalake.

¹⁹“Israilmino pakutakeu shi imtshakeu kumtsu ighi nikeu ghuloki kumtsulo ino no, onuli eno ongaqo tsuanike. Hiye ino no eno olaghaqo sasu amtizu puloshoqhi lakhi shive ake.”

²⁰AMPEU no Aron vilo pi, “Noye amheghi ighilu kepu aki alu kiumu ithulumo nani eno Israilmi yeghi khipa leqhi mu osala shimo nani. Omheghiye ni, AMPEU anike.”

²¹AMPEU no pike, “Israilmino chighilo saje lakhi kiu kiumu itsukeu pesu ino Levi laghami tsu ani. Hiye ino ngochekeu Phiki jukuto keu kumla shikeu jumeke.

²²Hinguno hilauye Israilmi kutamiye Aphiki kupunu ighipe kevilo tiye panonguno axine pucheghi no thive nosake.

²³Hinguno hilau ye Levimi likhino Aphiki jukutolo eno tipau makho kuchopu pumasake. Iqemokepu yeh hipauye nolagha kughuko shou ghi be anike. Levimiye Israil lo iqemokeu kialu mheghi pighimoni,

²⁴kughengu Israilmino pakutakeu shi imtshakeu chighi saje itsukeno tipauye panoqo sala shipenike ino panoqo tsuvae. Ikehu panonguye Israil lo iqemokeu kialu kuha nani kepi ino panoqo vilo pivae.”

²⁵Israilmi vilo pipenike AMPEU no

²⁶Muse vilo ishi ahza tsu: “Nonguno Israilmi launo chighi saje khikhi nowu akutsa shilu penike AMPEU no nongu tsukeu panoqo launo ithulu nikeno nonguye tipau lono chighi saje lakhi pesu pakutakeu shi AMPEU mtshalo.

²⁷Pakutakeu shi mtshakeu hipauye aluchemi lakhino athi kithe eno atsaiji kithe pesu akumllagho shikeu qhemi shi kihivetsu nanike.

²⁸Hipa gholauno nonguno Israilmi launo chighi saje ithulu keu kumtsu lono AMPEU saje shi ghi akumllagho tsulo eno tipau lono Achineu Aron lau AMPEU kumllagho tsulo.

²⁹Nonguno ithulukeu gholono akiviu pesu tsulo.

³⁰Nonguno saje akiviu tsuve kethiuno nonguno kutauqo hu qhilulo, alukichimino pa kumllagho tsuve kethiuye kiu aghipuzu qhiluvekeno titoi shilo.

³¹No eno okibolomino khile khilemu ti qhilukeu chulu nani kughengu tiye nonguno Aphikilo akumla shikeu jume tsu anike.

³²Nonguno tipau lono akiviu pesu AMPEU lau tsuve aghiaye nonguno chukeulo kiumu akipimi shive amoe. IKemu Israilmino akimthe gho sutsukeu lono akiviu leqhi pesu mlla mphi lono chuve puzu agho tsukeu shipixi nosake mutsuqheyi shi paghilo; nonguno tishivemo aye nongu pithive nanike.”