Read Sumi Naga AKIKIHI 19 Bible Online

AKIKIHI 19 - Sumi Naga bible

AKIKIHI 19

¹Peche kepuyeh hipaqo Israilmi tsupenike AMPEU no Muse ngo Aron pama lau ahza tsu.

²Amshi ali hughai keu lakhi kiumu atiche kuha keu eno khilemu sasu akumla shimphi keu saghino

³tipau pesu achineu Eleazar tsulo. Tiye aghazu nguno khalau saipe puzu pa gizu lono heqhilo.

⁴Tithiu Eleazar no ajih hami ikhi pesu paulotino Aphiki kudau ghuthu tsuni kuzupuuni.

⁵Lhoxu tipauye ayiko, ashicho, ajih eno kighinoli kumtsu akuchopu pesu achineu gizulono pitive peni.

⁶Tithiu paye kedar-su hami ailobo loka lakhi eno huchuyi keu kighikipili lakhi ishi ikhilu puzu tipaqo pesu amilo vesuvelo.

⁷Tipathiu paye pa phimini ishive eno tithiuno pano aghazu lo ide ilolu nani; ikemu paye avelau kutolo achinelo mithemono aniaphike.

⁸Timi khuuno amshi piti keno pa phimini ishive eno pa likhi pa shou azu lepuku masake eno paye avelau kutolo mithemono aniake.

⁹Tithiu timi lakhi achinepulo mithe akeuno amshi pitive keu yevu xukumqo pesu ighino aghazu nguno khalau achinepu lo mithevekeu alo qhini,Israilmi achinepu lo mithemove kelo ikhivetsulu chekeu zu kuto kelo peitha penikeu alo qhitsulo. Chinikeu hipauye axine peivenikeu chineke.

¹⁰Timi khuuno ayevu xukumqo sughi keno paye pa phimini ishive masa eno paye avelau kutolo mithemono anani. Peitha kepu yeh hipauye ighini keu ghuloki kumtsulo athoke, tiye Israilmi ghengu ghi eno panoqo gholo inaghami xuchekeqo ghengu ghike.

¹¹Khuu khumu akithikumo diluve keuye atsala tsuni ghenguno achinepulo mithemo nani.

¹²Paye qhukimthe chekeu zu pesu akuthuni eno atsala akutsunini pa likhi pa qhukimthe masake eno tithiuno paye mithelu nani. Ikemu pano atsala akuthuni ghi eno akutsunini lo ghi pa likhi pa qhukimthe moaye paye mithemo nani.

¹³Khuu khumu akithikumo dilu puzu pa likhi pa qhukimthemo aye tishi mithemono anani, kughengu qhukimthe kepu zu pa shou lepuku mphike. Paye AMPEU Phiki kitiqeve nanike eno Alhou wu timiqo gholo lakhi kepi kihisumove nani.

¹⁴Timi lakhino Aphiki lono thive aye akithi ghulokilo khunono aphiki alou anikeno momu khuno tipau alou ilonikeno paye atsala tsuni kutolo achinepulo mithemovae.

¹⁵Aphikilo abohu ngo ali khijehino akunha kuha keno tipaqo ghi mithemovae.

¹⁶Timi lakhino khalauno timi heqhi puaghi kemi momu alhoayeh kithi lono thivekemi dive aye momu timi lakhino timi saghi momu akumoki dive aye paye atsala tsuni kutolo mithemovae.

¹⁷Mithemove keu ikhive nike ghenguno amshi ali hughai keu khikhi axine peivetsu nike ghenguno piti keno tipau yevu hami lupuzu ali lakhilo sulo eno azu kuxu lesulo.

¹⁸Tithiu achinelo mithe akemi lakhino ailobo loka lakhi pesu azulo tipau chosuno aphiki kuzute, tile akeu kumtsu kuzute, timi tile aghikeqo kuzute eno timi khuno asaghi dilu momu akumoki bulu keu shou ghi azu kuzute pukulo.

¹⁹Atsala akuthuni eno akutsuninilo timi khuuno achinepulo mithe anikeno pano azu pesu mithemono akemi shou kuzute pukulo. Akutsunini pano timi hu qhu kimthe lo eno timi huye pa phimini ishive eno pa likhi pa shou azu lepukuno avelau paye achine lono mitheluve nani.

²⁰Timi khuuno achinepulo mithemoveni eno pa likhi pa qhukimthemove nikeno paye mithemono auvenia kehu qhukimthe keu zu pa shou vepukumoe. Paye AMPEU Phiki kitiqeve ani eno Alhou wu timi lakhi kepi pa kihimove nani.

²¹Nonguye ighini keu ghuloki kumtsu lo hipau yeh pepimhe chelo. Timi khuno qhukimthekeu zu kuzutenike no pa ghi pa phimini ishive masake; timi khuu khumu azu tipau dilu keuye avela kutolo achinepulo mithemono anani.

²²Kiu kiu pinamu mithemokemino dilu keuye mithemovae eno timi kutami khualano tipau dilu aye avelau kutolo pa ghi mithemono auveni ake.