Read Sumi Naga AKIKIHI 20 Bible Online

AKIKIHI 20 - Sumi Naga bible

AKIKIHI 20

¹Aqhi atughiulo Israilmi aqoaho kuchopu Zin sayeqhalo ighi eno Kades lo aghazu shilu. Tilehi Miriam thiveno qhove.

²Aghazu alo azu kuhae tighenguno timiqono Muse ngo Aron pama suhope kumqoluve

³no ishi muchhouve: “Ninguye AMPEU Phiki zulono nikusami Israilmi gholono thivekeu pavini cheke.

⁴Nokujoye kushiye ni sasu ipeghi puzu asayeqha hipaulo saighi kya? Puthaputsano niu pichepighi gholono hile thipeniye kesha?

⁵Nokujoye kushiye Ijip lono ningu saipeghi puzu khilehi kiumu lho ipeghimokeu akijikusa a hipaulo saighi kya? Hileye athimu, khughuthi mu atsaithi mu khaghatu mu kuhake. Azu yekepu ghi kuhake!”

⁶Muse ngo Aron pamano timiqo launo iqesu wuve eno Aphiki kulaghilo puthugho. Pamano ayeghilo pama gi pishiqhope itsaiqi kelo AMPEU no akeu saghu saghui keu kuvu pama lau ipeghi.

⁷AMPEU no Muse vilo pi,

⁸“Puloshoqhi Bohu zulo akusu akeu ikhilulo eno tipa shelo Aron okujono aqoaho kuchopu kukumqolo. Tileno panoqo kumtsu gizu lono atuqu hu akeu putsalo eno tipau lono azu shei qoipeghi nani. Hitoi shipuzu timiqo ghenguno nono atuqu lono azu ipeghipe nanike, panongu eno pano pichepighi pelo yelupenike.”

⁹AMPEU no ahza tsukeu toi Muse no wupuzu akusu ikhilu.

¹⁰Aron ngo Muse pamano aqoaho kuchopu atuquzulo sawo kumqono Muse nopi, “Hi inilo nongu hekibidemiqo! Nipelo nongu ghenguno atuqu hipau lono azu tsuni kesha?”

¹¹Tishino Muse no akusu peqhe puzu tipau pesu atuqu shou ghuthu kini ghapuku ikelo azupuki zu kije lakhi shei qoipeghino timi ngo lhoxu kumtsu azu yelupe.

¹²Ikemu AMPEU no Muse ngo Aron pama sakiyi. Pano ishipi, “Nokujono akupulu kupukuno shi Israilmi zulo ikimthe kuka akeu ikhilu piye moveke ghenguno ino panoqo tsunikeu shi tushoqhive keu yeghilo nokujoye panoqo sailomo nanike.”

¹³hiye Meriba lonoke, tilehi Israilmi no AMPEU shou muchhoke eno tileno paye akimthe kepi pano panoqo piyeke.

¹⁴Muse no Kades lono Edom kukau lau aghinikishimi puwu. Aghinimiqono pi, “Asutsa hipauye nolaghami Israil shiayeh launo ke. Ninguno akijiksa ghime sholukeu nonguno ithi ani,

¹⁵nipu asuqono Ijip lo wuve no tilau ampe kutomo acheuveke. Ijipmino nipu asunoqo eno ningu peithapusae,

¹⁶eno ninguno AMPEU lau ighamuku kuphulepike. Pano ningu kuqakumlo chilutsu puzu kungumi lakhi puwu tsu, tipauno Ijip lono nisaipeghike. Itehi ninguye noghakhu lughilo Kades taunlo ani.

¹⁷Kishimoa ningu pelo noghakhu vechesu katha wulupelo. Ningu na nitsu-aqu pinamu alaghi nguno kutaulo wumoke momu noluqa momu atsailulo wutsumo ke eno ninguye nongu zukikhe zumu yetsumo nanike. Ninguno noghakhu vechevemoke kutolo ninguye alaghila likhi pula nanike.”

¹⁸Ikemu Edommino ishi khochile, “Ninguye nongu pelo nighakhu kathasu wupeni chemoe! Nonguno tishinike pukaputsa aye chesu ighi puzu nongu le ighi nani.”

¹⁹Israilmino pi, “Ninguye alaghila lo likhi cheche nani eno ningu pina nitsu aquqono now azu yevetsu aye ninguno tipau me tsuve nanike, ninguye kathasu wukeu likhi shini chenike.”

²⁰Edommino pikide ghi pi, “Tishi mlae!” eno panonguno Israilmi lenike ghenguno aghushimi akumto sasu chesu ipeghive.

²¹Edommino Israilmi pelo pano ghakhu kathasu wupemoke ghenguno Israilmiye idechile susu ala kutauno wuve.

²²Israilmi aqoaho kuchopu Kades qhive puzu Hor Toghilo ighiluve,

²³tiye Edom lughilo ke. Tileno AMPEU no Muse ngo Aron pama vilo pi,

²⁴“Aron ye ino Israilmi tsuni keu shi tushoqhive keu ghakhulo iloni chemoe; paye thiveni cheni kughengu nokujono Meriba lo izahkutsu hebideveke.

²⁵Aron ngo panu Eleazar pama sasu Hor Toghilo iqholo,

²⁶eno tilau no Aron wu achine phikuzu xapesu Eleazar pu uvelo. Aron ye tilauno thive nanike.”

²⁷AMPEU no ahza tsukeu toi Muse no tishivetsu. Panonguno aqoaho kuchopu nhekithe lono Hor Toghi lo iqhove,

²⁸eno Muse no Aron wu achine phikuzu xaveno Eleazar pu-uve. Tilau naghuto kutsuqa lono Aron ye thive eno Muse ngo Eleazar pamaye ide iqighive.

²⁹Aqoaho kuchopuno Aron thivekeu ithive eno panongu kumtsu atsala shighi kutolo pa ghenguno mloqa.