Read Sumi Naga AKIKIHI 21 Bible Online

AKIKIHI 21 - Sumi Naga bible

AKIKIHI 21

¹Kanan ghakhu apeu kudau Kananmi kukau Arad no Israilmiye Atharim laghi kudauno cheni pikeu chilukelo,pano panoqo leu eno panongu khamiye kughaluve.

²Tileno Israilmino AMPEU lau shikupuni keu shoqhi lakhi shi: “Nono ningu pelo timi hipaqo leluvepe aye ninguno kiumu kihikulaimono panoqo ngo pano phughiqo ikhiphe pe otsuveni eno panongu kutsa khavenike.”

³AMPEU no panongu shoqhi chiluveno panongu pelo Kananmi shou toluve penike kuphutsu. Ikehu Israilmino tipaqo ngo panongu phughi qhoi kutsaleve eno tipa a pesu Horma kuvetsu.

⁴Israilmiye Hor Toghi qhive puzu Edom ghakhu vehomxa susu wunike ghenguno Aqaba Zucheku lo wukeu laghi lono cheve. Ikemu alalo chekelo timiqoye kutuu khamlave

⁵no Alhou ngo Muse pama shou atsa kumo piuve. Panonguno ishi muchho, “Noye kushiye Ijip lono ningu saipeghi puzu asayeqha hipaulo achuqupu momu azu ghi kuhakeu alono thivepe niye ani kya? Ninguye achuqupu lhoksa hipau chughi ngopushu mlae!”

⁶Tileno AMPEU no timiqo gholo tughukupu pighi puwu eno Israilmi kutomo mighi pithive.

⁷Timiqono Muse lau ighi no pi, “Ninguno AMPEU shou eno oshou atsa kumo pivekeu lono axine shivae. Itehiye AMPEU vilo inikhu tsuno apighi hipaqo ikhisuwuve tsupelo.” Tighenguno Muse no timiqo ghenguno inikhu.

⁸Tileno AMPEU no Muse vilo ayino shikeu pighi lakhi shipesu aqhaqhi lakhilo bepe qhilo pi tishianguno khuu khumu apighino mighi puaghikeu pelo tipau julu no viluve peniyeke.

⁹Titoi Muse no alazayi pesu apighi lakhi kughulhono aqhaqhi lakhi shou bepe qhi. Khuu khumu mighi puaghikemiye alazayino shikeu pighi shou jupukuno viluve cheke.

¹⁰Israilmi ye iqesu wuve eno Obot lo aghazu shilu.

¹¹Tipa-a qhive kethiu, panonguye Muab ghakhu kipelau asayeqha lo Abarim pughave keulo aghazu shilu.

¹²Tithiu panonguye Zered khilalo aghazu shi.

¹³Tilauno panonguye itaghi iqesusu wuveno Arnon ghoki ahuu kudau Amarimi ghakhu kutolo asayeqha xachhowo akeulo aghazu shilu. (Arnon ye Muabmi ngo Amarimi dolo alughi shi ake.)

¹⁴Tighenguno AMPEU wu Aghukishi Kaku lo ishi pi puanike “Sufa qhalo Waheb taun eno akhila qo; Arnon ghoki;

¹⁵eno Muab lughi kudau Ar taun lono akhila chhojoi iqi akeu kuto.”

¹⁶Tikudauno panonguno Azukikheqo ipi chekeu alo wuke, “Timiqo hekutsulo eno ino azu panongu tsunike.”

¹⁷Tipa ghulokilo Israilmino ale hipau pheke: “Azukikheqo, nozu ipeghipelo; Eno ninguno ale lakhi pheghi tipau sasu kushoni.

¹⁸Timi sakiphemi eno kukapumiqono chhukeu zukikhe, Kukami kusu eno panoqo kusu pesu chhukeu zukikhe,” Panonguno asayeqha lono Matana lo iqesu wuve

¹⁹tilauno panonguye Nahaliel lo wuve no Nahaliel lono Banot lo wuve,

²⁰Bamot lono Muabmi ghakhu akhila lo wuve tiye Pisga Toghi qholoke, asayeqha kudau jupuwolu akeuloke.

²¹Tithiu Israilmino Amarimi kukau Sihon vilo ishi pipenike aghinikishimi puwu:

²²“Ningu pelo oyeghi kathasu wulupelo. Ningu eno nitsu-aqu ye alaghila qhiveno noluqa momu atsailu lo wutsumoke eno ninguye no zukikhe zu yetsu moke; ninguno oghakhu vechelumoke kutolo ninguye alaghilalo likhi cheche nanike.”

²³Ikemu Sihon no Israilmi pelo pa ghakhuqha kathasu wunikeu lakhave. Pano paw ghushimi hekutsu no asayeqhalo Jahaz ipikeulo wuveno Israilmi leke.

²⁴Ikemu Israilmino aghushi lono aghumi kutomo heqhi pithivetsuno panoqo yeghi Arnon ghoki lono ahuu Jabok kutolo qhasuluve, tiye Amunmi kutoloke, kughengu Amun lughiye akumto shi khepe ngo ake.

²⁵Ike Israilmino Amarimi phughi kumtsu leluve,tipaqo gholo Heshbon ngo tipau sukumxalo taun akeqo kumtsuke eno tipaqolo acheuve.

²⁶Heshbon ye Amarimi kukau Sihon phughitouke, akukau hipauno puzuu Muab kukau sasu aghushi no Arnon ghoki kutolo pa yeghi kumtsu leluveke.

²⁷Tighenguno ale kiyiqimino ishi pheke, “Akukau Sihon phughi Heshbon lo ighilo! Tipau shikithe pesu atho shive keu ninguno junishi.

²⁸Ghuthu lakhiye Heshbon hipau lono Sihon wu aghushimino ami lakhi paphi shi ipeche; Tipauno Muab lo Ar phughi kutsaleve ke. Eno Arnon lashou lo naghutoqo tsuchuve ke.

²⁹Muabmiqo, nongu ghenguno kishi kumsa kimshipu kela! Nongu Khemos kumllamiqo ye kutsale khavae! No lhouye timi pelo kupokichemi shivepeke! Eno totimiqoye Amarimi kukau kughumi shive.

³⁰Ikemu itehiye panoqo kughuko ye kutsalevae, Tiye Heshbon lono Dibon kuto, Nashim lono Medeba kupunu lo Nofa kutoloke.”

³¹Ike Israilmino Amarimi ghakhuqha lo ngoluveno,

³²Jazer phughi lenike ghenguno alaghi akiviu jupenike Muse no timi khami puwu. Israilmino tipau phughi eno tipau sukumxalo taun akeqo khasupe leluve eno Amarimi tilehi kughuna aghikemiqo hapupove.

³³Tithiu Israilmiye tsughu susu Bashan lo wukeu laghilo wuve, ikelo Bashan lo akukau Og no pawu ghushimi sasu ighi puzu Edrei lono panoqo lenikeu shi.

³⁴Tileno AMPEU no Muse vilo pi, “Pa jupe msa ichi kevilo. Ino pa shou ngo pawu timiqo kumtsu eno pa yeghi shou opelo toluvepe nani. Nono Amarimi kukau Sihon, Heshbon lo ayehkipeu shou kiu shikeno tipaphi shi pa shou ghi shitsulo.”

³⁵Tighenguno Israilmino Og ngo panuli eno pawu timi kumtsu lakhimu ghupe qhitsumono heqhi pithive eno tithiu ye panonguno pa yeghi qhasuluve.